"პროგნოზი არ არის საიმედო" - რა ითქვა საკოორდინაციო საბჭოს დასრულების შემდეგ

გაუარესებული ეპიდვითარების ფონზე, დღეს საკოორდინაციო საბჭოს სხდომა გაიმართა, რომლის დასრულების შემდეგ, კომენტარები გააკეთეს დაავადებათა კონტროლის ეროვნული ცენტრის დირექტორმა ამირან გამყრელიძემ და ჯანდაცვის მინისტრის მოადგილემ თამარ გაბუნიამ.

როგორც გამყრელიძემ აღნიშნა, კორონაპანდემიასთან დაკავშირებთ პროგნოზი არ არის საიმედო და საქართველო უკვე მეხუთე ტალღაში იმყოფება. მისივე თქმით, დღესაც იქნა დავალებები გაცემული, რომ მომზადდეს პაკეტი შემდგომი გადაწყვეტილებებისთვის:

“დარწმუნებული იყავით, რომ [მწვანე პასპორტები] ამოქმედდება. არის მრავალი მიდგომა მწვანე პასპორტთან მიმართებაში – რომელს აირჩევს საქართველო, უნდა იქნეს წარდგენილი საკოორდინაციო საბჭოზე.” 

როგორც გამყრელიძე აცხადებს, ჯერჯერობით ქვეყანაში მხოლოდ “დელტა შტამი” ცირკულირებს, მაგრამ მას აღმოაჩნდა სერიოზული თავისებურებები – “დელტა შტამი ” ახალგაზრდა ასაკში უფრო აგრესიულად მიდის და, რაც მთავარია, დელტა შტამს რეინფიცირების უფრო დიდი პოტენციალი აქვს.

გამყრელიძისვე თქმით, ბათუმში მოსახლეობის 60%-ია ორჯერადად აცრილი, თბილისში კი 54%, და სწორედ ამიტომ არის, რომ ამ ქალაქებში ვითარება შედარებით მშვიდია.

“რატომ გვაქვს შედარებით უფრო მშვიდი სიტუაცია ამ 5 000 შემთხვევის ფონზე აჭარაში? იმიტომ, რომ აჭარა ვაქცინაციის მოცვის მაჩვენებლით თბილისის შემდეგ არის მეორე. ბათუმმა უკვე მიაღწია 60%-იან ნიშნულს. რაც ჩვენ წელს გვქონდა სამიზნედ, მოზრდილი მოსახლეობის 60%-ზე გასვლა, ბათუმი უკვე გავიდა 60%-ზე. თბილისი უახლოვდება ამას, თბილისში მოზრდილი მოსახლეობის 54%-ია ორჯერადად აცრილი, რაც ძალიან მნიშვნელოვანია. სამწუხაროდ, სხვა რეგიონები, გარდა რაჭა-ლეჩხუმისა (37%), 30%-ის ფარგლებში არიან. 100 000 მოსახლეზე გადათვლით, თბილისი და აჭარა უკეთეს სიტუაციაში არიან”, – ამბობს გამყრელიძე.

მისი თქმით, რაც გაანალიზებულია, 9,3-ჯერ ნაკლებია აქვს ვაქცინირებულს გადადების რისკი არავაქცინირებულთან შედარებით:

“ანუ თუ არავაქცინირებულს და ვაქცინირებულს ექნა კონტაქტი ინფიცირებულთან, ვაქცინირებულის რისკი, რომ მას გადაედოს 9,3-ჯერ ნაკლებია.”

სავალდებულო ვაქცინაციაზე ისაუბრა ჯანდაცვის მინისტრის მოადგილემ, თამარ გაბუნიამ. მისი განმარტებით, თეორიულად არ არსებობს ალბათობა, რომ ძალდატანებით მოხდეს ადამიანის ვაქცინაცია.

გაბუნიას თქმით, ერთადერთი გზა შეიძლება იყოს რეგულაციების დაწესება ეპიდუსაფრთხოებასთან მიმართებაში, როდესაც პირს აქვს არჩევანის შესაძლებლობა – აიცრას ან გაიკეთოს PCR ტესტი და წარმოადგინოს PCR ტესტის პასუხი:

“ეს არის სწორი და ეთიკურად დაბალანსებული მიდგომა, რაც ჩვენ შეგვიძლია გამოვიყენოთ.” 

მინისტრის მოადგილე ამბობს იმასაც, რომ ჯამურად, მასწავლებლების ვაქცინაციის მაჩვენებელი 65%-ს აღწევს. გაბუნია ხაზს უსვამს იმას, რომ ეს მაჩვენებელი არ არის ცუდი, თუმცა, იმისთვის, რომ სკოლებში ინფექციის გავრცელება შეჩერდეს, სასურველია ეს იყოს 80%-ზე მეტი:

“რაც შეეხება სკოლების დისტანციურ რეჟიმზე გადასვლას, ბოლო მაჩვენებლები ასეთია, რომ 150 სკოლაში მოხდა დისტანციურ რეჟიმზე გადასვლა და ასევე 400-მდე ინდივიდუალურ კლასში გახდა საჭირო დისტანციურ რეჟიმზე მათი გადაყვანა. სკოლების საერთო რაოდენობასთან შედარებით, ეს არ არის მაღალი მაჩვენებელი. კარგია ის, რომ სკოლები ახერხებენ აქტიურად ინფექციის შიდა გავრცელების მართვას და ამდენად, ვფიქრობთ, რომ ეს იქნება ის მექანიზმი, რაც საშუალებას მოგვცემს, შევინარჩუნოთ სკოლები გახსნილ სასწავლო რეჟიმში.”

● თენგიზ ცერცვაძე: როგორც ჩანს, კოვიდი კიდევ დიდხანს დარჩება ჩვენთან
● საქართველოში 50 წლის ზემოთ მოქალაქეებს მესამე დოზით აცრიან. ვის ეკუთვნის “ბუსტერი”
● საქართველოს კლინიკების ასოციაცია: ლეტალობის ასეთი მაჩვენებელი კატასტროფულია

საქართველოში კორონავირუსის საწინააღმდეგო ვაქცინაცია 15 მარტს დაიწყო. ბოლო დროს, ვაქცინაციის ტემპი საგრძნობლად დაეცა. თუ აგვისტოს ბოლოს დღეში 20 ათასზე მეტი ადამიანი იცრებოდა, ბოლო პერიოდში დღეში საშუალოდ 5 ათასი დოზა ვაქცინა კეთდება.

რამდენიმე დღის წინ, დაავადებათა კონტროლის ცენტრმა 50 წლის ზემოთ მოქალაქეებისთვის მესამე დოზით, ე.წ. ბუსტერით აცრა დაუშვა.

როგორც ჯანდაცვის მინისტრის მოადგილე თამარ გაბუნიამ განმარტავს, ბუსტერ დოზის გაკეთება შეუძლიათ შემდეგ ჯგუფებს, რომელთა მეორე დოზის აცრიდან გასულია მინიმუმ 6 თვე;

● 50 წელს გადაცილებული მოქალაქეებს;
● ქრონიკული დაავადებების მქონე ნებისმიერი ასაკის პირებს;
● სამედიცინო პერსონალს
● სხვა მაღალი რისკის პროფესიების ადამიანებს;
● დახურული დაწესებულებების თანამშრომლებს და იქ მცხოვრებ ადამიანებს;

ბუსტერს გაუკეთებენ ასევე უკვე აცრილ მოქალაქეებსაც, რომლებიც სამოგზაუროდ მიდიან.

20 ოქტომბრის მონაცემებით, საქართველოში 1 926 893 დოზა ვაქცინა გაკეთდა. სულ მცირე 1 დოზით ვაქცინირებულია 1 015 699ადამიანი – მოზრდილი მოსახლეობის 35.7 %; სრულად ვაქცინირებულია 874 060 ადამიანი – მოზრდილი მოსახლეობის 30.9 %.

ბოლო 24 საათში საქართველოში კორონავირუსის 5 219 ახალი შემთხვევა გამოვლინდა და 42 ადამიანი გარდაიცვალა.