პრემიერის გადადგომა, რუსეთისთვის ცის ჩაკეტვა და განაცხადი EU-ს წევრობაზე - მასშტაბური აქცია თბილისში
მასშტაბური აქცია თბილისში
უკრაინისადმი სოლიდარობის ნიშნად, 1-ელ მარტს თბილისში მორიგი მასშტაბური აქცია გაიმართა. ხალხმრავალ აქციაზე, რომელიც საქართველოს დედაქალაქში, თბილისში, უკვე რამდენიმე დღეა იმართება, დღეს პირველად პოლიტიკური მოთხოვნები გაისმა. აქციის მონაწილეებმა ხელისუფლებას სამი მოთხოვნა წაუყენეს:
- გადადგეს საქართველოს პრემიერ-მინისტრი ირაკლი ღარიბაშვილი
- დაეხმაროს საქართველო უკრაინას
- საქართველომ შეიტანოს განაცხადი ევროკავშირის წევრობაზე, რაც შეიძლება მალე
ეს აქცია მას შემდეგ დაიგეგმა, რაც უკრაინის პრეზიდენტმა ვოლოდიმირ ზელენსკიმ საქართველოდან ელჩი კონსულტაციებისთვის გაიწვია. მისი თქმით, ამ გადაწყვეტილების მიზეზი უკრაინის ომთან დაკავშირებით საქართველოს ხელისუფლების პოზიციაა.
საქართველოს ხელისუფლებამ ხელი შეუშალა მოხალისეების უკრაინაში გაფრენას, ასევე, უარი თქვა რუსეთისთვის სანქციების დაწესებაზე.
მთავრობის წევრები ყველა გადაწყვეტილებას “ეროვნული ინტერესებითა” და “ქვეყნის უსაფრთხოებით” ხსნიან. მმართველი პარტია “ქართული ოცნების” თავმჯდომარემ უკრაინის ელჩის გაწვევას საქართველოს ომში ჩათრევის მცდელობა უწოდა.
ხელისუფლების წევრების ამ განცხადებებს საზოგადოების მძაფრი რეაქცია მოჰყვა. ეს დღეს საქართველოს დედაქალაქში გამართულ აქციაზეც იგრძნობოდა.
დღეს აქცია ყველაზე მასშტაბური, ხალხმრავალი და ემოციური იყო. წინა დღეებისგან განსხვავებით, ტრიბუნასთან გამოჩნდნენ ოპოზიციონერი პოლიტიკოსებიც, ემოციური და მკაცრი მოწოდებებით.
ხელისუფლებისთვის წაყენებული მოთხოვნები, ოპოზიციური პოლიტიკური პარტიის, “დროას” ლიდერმა, ელენე ხოშტარიამ გაახმოვანა:
„პირველი – წავიდეს და თან წაიყოლოს მთავრობა ირაკლი ღარიბაშვილმა, მოშორდნენ აქედან. „ქართული ოცნებ“ ჩვენ არ წარმოგვადგენს, ამიტომ უპირველესი მოთხოვნა არის მისი წასვლა. ის სირცხვლი, რომელიც მან მოსცხო საქართველო, ჩვენი ჩამოსარეცხია და აუცილებლად უნდა წავიდეს, აღარ უნდა წრამოადგენდეს ჩვენს ღირსეულ ხალხს.
მეორე – ჩვენ უნდა გადავიდეთ ქმედით და კონკრეტულ ნაბიჯებზე, რომ დავეხმაროთ უკრაინას და რეალურად ვიყოთ მათი სოლიდარულები. დავუხუროთ ცა რუსეთს, გავუხსნათ ცა უკრაინას.
მესამე – დღეს უკრაინამ საკუთარი მსხვერპლით, რომელიც ხუთი ღამეა ყველას გვატირებს, გახსნა შესაძლებლობები რომ ჩვენც ყველა ერთად გავხდეთ თავისუფალი ევროპის ნაწილი და ეს შესაძლებლობა რომელიც ესიზმრებოდა ჩვენს წინაპრებს დღეს დევს მაგიდაზე და ეს უგნურები ამბობენ რომ არ გვინდა, ამიტომ ჩვენი მოთხოვნაა საქართველომ შეიტანოს განაცხადი ევროკავშირის წევრობაზე.
ჩვენ გვაქვს რწმენა რომ ერთად დგომით ამ სამივე პირობას მივაღწევთ, პასუხისმგებლობას ავიღებთ ჩვენს თავზე, არ დავიღლებით, არ დავნებდებით და გავათავისუფლებთ ამ ქვეყანას იმიტომ რომ ამის იქით ზღვარი აღარ არსებობს“, – თქვა ელენე ხოშტარიამ.
- ირაკლი ღარიბაშვილი: ომის შემჩერებელი არავინაა, სანქციები არაა ეფექტური
- მოსაზრება: ვის მხარესაა საქართველო უკრაინის კონფლიქტში?
მკაცრი და ემოციური იყო კიდევ ერთი ოპოზიციური პარტიის “გირჩი მეტი თავისუფლების” ლიდერის ზურაბ ჯაფარიძის გამოსვლაც. მან თქვა, რომ გამოსავალი არის რიგგარეშე არჩევნები:
“მე მგონია, რომ მთავარი, რამაც დღეს ჩვენ ყველა გამოგვიყვანა, არის ბრაზი, სირცხვილის გამო, რომელიც ყველამ ერთად ვჭამეთ. დღეს რუკაზე დიდი ასოებით დაგვაწერეს ამ ქვეყანას, რომ ვართ “ჩმორები”…
არავის არ აქვს ზუსტი წარმოდგენა, რა შეიძლება ჩვენ ვქნათ. მე შემიძლია გითხრათ, მე რას ვფიქრობ პირადად. დღეს უკრაინის პრეზიდენტმა ზელენსკიმ გვითხრა, რომ ეს შენობა [საქართველოს პარლამენტის], რომელიც ჩვენს უკან არის და რომელსაც უზარმაზარი სიმბოლური მნიშვნელობა აქვს დამოუკიდებელი საქართველოს ისტორიაში, არის კრემლი...
ჩვენ უნდა მივიდეთ რიგგარეშე არჩევნებამდე, მაგრამ გამოსავალი არის ის, რომ ამ შენობიდან უნდა გამოვიდნენ ისინი, ვინც კრემლს წარმოადგენენ. მათ შორის უნდა გამოვიდნენ ისინი, ვისაც ოპოზიციური დეპუტატები ჰქვიათ”, – განაცხადა ზურაბ ჯაფარიძემ.
რუსთაველიე გამზრიზე აქცია 19:00 საათზე დაიწყო.
პარტია „დროას“ ლიდერმა ელენე ხოშტარიამ განაცხადა, რომ აქციის მონაწილეები მთელი ღამის განმავლობაში პარლამენტის წინ დარჩებიან, ხოლო დილის 8 საათზე გადაინაცვლებენ კანცელარიასთან, რომ ხელი შეუშალონ პრემიერ-მინისტრის ირაკლი ღარიბაშვილის კანცელარიაში შესვლას.
რუსეთმა უკრაინაში შეჭრა 2022 წლის 24 თებერვალს დაიწყო. უკვე რამდენიმე დღეა მძიმე ბრძოლები მიმდინარეობს უკრაინის დედაქალაქ კიევისთვის, ასევე ქვეყნის მრავალ ქალაქში. რუსეთის ხელისუფლება აცხადებს, რომ შემოჭრის მიზანია ხელისუფლების შეცვლა, უკრაინის „დემილიტარიზაცია და დენაციფიკაცია“.
დასავლეთის ქვეყნებმა განაცხადეს, რომ რუსეთმა მოახდინა არაპროვოცირებული შეჭრა დამოუკიდებელ ქვეყანაში და დააწესეს ახალი სანქციები რუსეთის წინააღმდეგ, ასევე უკრაინას დახმარებას უწევენ იარაღით და ჰუმანიტარული დახმარებით.
