თბილისში პოლონეთის სამი მოქალაქე დაჭრეს, მათ შორის ორი მესაზღვრე
პოლონეთის სამი მოქალაქე დაჭრეს
თბილისში პოლონეთის სამი მოქალაქე დაჭრეს, მათ შორის ორი მესაზღვრე. ამის შესახებ პოლონური მედია წერს. გამოცემის ცნობით, პოლონელი მესაზღვრეებს თავს თბილისში დაესხნენ, მათ შორის ცივი იარაღით. მიღებული მძიმე ტრავმების გამო მათი ჰოსპიტალიზება გახდა საჭირო.
საქართველოს შინაგან საქმეთა სამინისტრო ადასტურებს მომხდარს და აცხადებს, რომ დაჭრის ბრალდებით ორი პირი, 2004 წელს დაბადებული ს.ჯ. და წარსულში სხვადასხვა მძიმე დანაშაულისთვის ნასამართლევი და 1985 წელს დაბადებული ე.გ. ორი ან მეტი პირის მიმართ ჩადენილი ძალადობის ბრალდებით დააკავეს.
რას ამბობს პოლონური მხარე
პოლონური მედიის ცნობით, ინციდენტი ოთხშაბათს მოხდა ევროპის სასაზღვრო და სანაპირო დაცვის სააგენტოსთან (Frontex) ერთობლივად ორგანიზებული დაბრუნების ოპერაციის შემდეგ. ოფიცრებს, სავარაუდოდ, ხელკეტებითა და დანით თავს დაესხნენ.
პოლონელ ოფიცრებზე თავდასხმა სასაზღვრო დაცვის მთავარსარდლის, ლეიტენანტ-პოლკოვნიკის, ანდჟეი იუჟვიაკის პრესმდივანმა დაადასტურა.
“თბილისში სასაზღვრო დაცვის თანამშრომელთა ჯგუფს თავს დაესხნენ. ამ ინციდენტის შედეგად, ჩვენი ორი ოფიცერი თავის არეში მძიმე დაზიანებებით საავადმყოფოში მოათავსეს“, – განაცხადა სასაზღვრო დაცვის წარმომადგენელმა, მისი თქმით, დაჭრილ მესაზღვრეებს ოპერაცია გაუკეთეს.
მან აღნიშნა, რომ დაბრუნების ოპერაცია ხორციელდებოდა ქართველებისა და პაკისტანელების, პოლონეთიდან იძულებით გაძევების მიზნით.
“ადგილობრივი პოლიცია აწარმოებს გამოძიებას და ამ დროისთვის მხოლოდ ამის თქმა შეგვიძლია.“ – დასძინა პოდპოლკოვნიკმა იუჟვიაკმა.
რას ამბობს შსს
“გამოძიებით დადგინდა, რომ ბრალდებულებმა, ურთიერთშელაპარაკების ნიადაგზე, თბილისში მდებარე ერთ-ერთი რესტორნის მიმდებარე ტერიტორიაზე, სხვადასხვა სახის დაზიანებები მიაყენეს პოლონეთის სამ მოქალაქეს, ხოლო ფიზიკური დაპირისპირებისას ერთ-ერთმა ბრალდებულმა, ე.გ-მ ბლაგვი საგნის გამოყენებით ფიზიკურად იძალადა მათზე.
მომხდარის შემდეგ, დანაშაულში ბრალდებული პირები შემთხვევის ადგილიდან მიიმალნენ. დაშავებული უცხო ქვეყნის მოქალაქეები შესაბამისი სამედიცინო დახმარების გაწევის მიზნით კლინიკაში გადაიყვანეს.” – ნათქვამია განცხადებაში.
მომხდარზე გამოძიება სისხლის სამართლის კოდექსის 126-ე მუხლის პირველი პრიმა ნაწილით მიმდინარეობს.
