პოლიტპატიმარი სასამართლო დარბაზიდან გაათავისუფლეს
ცნობილ მეცნიერს, პოლიტოლოგ არიფ იუნუსსა და მის მეუღლეს, უფლებადამცველ ლეილა იუნუსს 7 და 8,5 წელი ჰქონდათ მისჯილი. მათ ეკონომიკური დანაშაულები და სახელმწიფოს ღალატი ედებოდათ ბრალად. 12 ნოემბერს, ჯანმრთელობის გაუარესების გამო, არიფ იუნუსს სასჯელი შიდაპატიმრობით შეუცვალეს.
იუნუსის ადვოკატმა, აფგან მამედოვმა “რადიო თავისუფლებისთვის” მიცემულ ინტერვიუში განაცხადა, რომ ასეთ გადაწყვეტილებას არ ელოდა.
არიფ იუნუსოვი პენიტენციალური სისტემის სამედიცინო განყოფილებაში მკურნალობდა, მაგრამ – ამაოდ. დაცვის მხარეს ჯერ კიდევ 5 ნოემბერს ჰქონდა დაყენებული შუამდგომლობა აღმკვეთი ღონისძიების შეცვლის შესახებ, მაგრამ სასამართლომ აღნიშნული თხოვნა არ დააკმაყოფილა.
თავის პირველ ინტერვიუში არიფ იუნუსმა თქვა, რომ მეუღლის გათავისუფლებას მოითხოვს, რადგანაც ლეილა სავავალო მდგომარეობაშია. “6 ნოემბერს დავიწყე შიმშილობა მოთხოვნით, გაეთავისუფლებინათ ჩემი ცოლი. მას ყოველ დღე სცემენ და აწამებენ. ის ასაკოვანი ქალია და მისი მდგომარეობა მილიონჯერ უარესია, ვიდრე ჩემი. აზერბაიჯანში ხშირად ლაპარაკობენ ეროვნულ ღირებულებებსა და ჰუმანიზმზე; ჩვენ კი ავადმყოფ, ასაკოვან ქალთან გვაქვს საქმე, რომელიც, სხვა თუ არაფერი, მხოლოდ იმიტომ უნდა გაათავისუფლონ, რომ მძიმედ არის ავად.”
შეკითხვაზე “რას აპირებთ” არიფ იუნუსმა უპასუხა: “ჩემი ერთადერთი იარაღი სიტყვაა და მე გაჩუმებას არ ვაპირებ.” მისი სიტყვებით, ლეილა იუნუსს არ სჯერა, რომ გაათავისუფლებენ. “უნდათ, რომ ქალთა კოლონიაში გადაიყვანონ, სადაც საშინელი პირობებია; ანუ, ფაქტობრივად, მის სიკვდილზეა საუბარი. გერმანიის საუკეთესო კლინიკაშიც რომ გაიგზავნოს, სულ ცოტა, ორი წელიწადი დასჭირდება იმისთვის, რომ ნორმალურად იგრძნოს თავი. გინდათ, რომ ამაზე არ ვილაპარაკო?! რანაირი კაცი ვიქნებოდი, ამაზე ხმა რომ არ ამომეღო?! 37 წელია, რაც ჩემს ცოლთან ერთად ვცხოვრობ და ვერ ვუღალატებ.”
ბრალდებების არსის შესახებ არიფ იუნუსი ამბობს, რომ დაპატიმრება პოლიტიკური შეკვეთით მოხდა. “არც რაიმე დოკუმენტს ვაწერდი ხელს, და არც შეკითხვებს ვპასუხობდი. კითხვაზე, თუ რატომ ვიქცეოდი ასე, ვუპასუხე, რომ ჩვენ შეკვეთით დაგვაპატიმრეს. ყველა ბრალდება გაზეთებიდან ჰქონდათ ამოკრებილი. ასეთი საქციელისთვის ნორმალურ ქვეყანაში ბრალდების მხარეს სასამართლოში უჩივლებდნენ. ეს სასამართლო გამოძიება კი არა, ჩვეულებრივი “შეკვეთა” იყო.”
დაპატიმრებამდე რამდენიმე წლის განმავლობაში აქტიურად იცავდა მოქალაქეების დემოკრატიულ და საკუთრების უფლებებს, ყურადღებას უთმობდა პოლიტპატიმრებს და ხელმძღვანელობდა ორგანიზაციას სახელწოდებით “მშვიდობისა და დემოკრატიის ინსტიტუტი.” 2015 წლის 9 ოქტომბერს საერთაშორისო ორგანიზაციამ, Human Rights Watch-მა იუნუსების წყვილის დაუყოვნებლოვ გათავისუფლება მოითხოვა.
