PCR-ტესტი, კარანტინი და თვითიზოლაცია - რა უნდა იცოდეთ, თუ საქართველოში შემოსვლას ან საქართველოდან წასვლას აპირებთ
კორონავირუსის პანდემიის გავრცელების თავიდან აცილების მიზნით, საქართველოს მთავრობამ უცხოეთიდან საქართველოში შემომსვლელთათვის გარკვეული წესები დაადგინა. JAMnews-ი გთავაზობთ პასუხს ყველა იმ კითხვაზე, რაც შეიძლება საქართველოში შემოსვლის ან საქართველოდან გასვლის თაობაზე გაგიჩნდეთ.
● რომელი ქვეყნებისთვის იხსნება საქართველოს საზღვრები?
ამ დროისთვის საქართველოს საზღვრები იხსნება ევროკავშირის წევრი 5 ქვეყნისთვის. ეს ქვეყნებია: გერმანია, საფრანგეთი, ესტონეთი, ლატვია და ლიეტუვა. ამ ქვეყნების მოქალაქეებს/მუდმივი ბინადრობის ნებართვის მქონე პირებს საქართველოში შემოსვლა საჰაერო გზით მხოლოდ ამ 5 ქვეყნიდან გამომგზავრების შემთხვევაში შეუძლიათ. მაგ. ლატვიის მოქალაქე/ბინადრობის უფლების მქონე პირი გერმანიიდან უპირობოდ შემოვა საქართველოში.
საქართველოს საზღვრის გადმოკვეთამდე მათ უნდა შეავსონ საგანგებოდ შემუშავებული სპეციალური, ელექტრონული ანკეტა, სადაც უნდა მიუთითონ საქართველოში შემოსვლამდე ბოლო 14 დღის განმავლობაში მოგზაურობის ისტორია, ის ადგილი, სადაც საქართველოში ვიზიტის დროს დარჩებიან და საკონტაქტო ინფორმაცია.
მათივე თანხმობის შემთხვევაში, აეროპორტში მათ ჩაუტარდებათ PCR ტესტი (სახელმწიფოს ხარჯით).
მას, ვისაც საზღვარზე თერმოსკრინინგის გავლის შემდეგ 37 გრადუსზე მაღალი ტემპერატურა ექნება, სამედიცინო დაწესებულებაში გადაიყვანენ.
ევროკავშირის იმ ქვეყნების მოქალაქეებს, რომლებმაც საქართველო შეიყვანეს ე.წ. მწვანე სიაში (იტალია, კვიპროსი, საბერძნეთი, ესპანეთი, შვედეთი, ლუქსემბურგი, ნიდერლანდები, პოლონეთი, პორტუგალია, რუმინეთი, ხორვატია) ან დაუწესეს სხვადასხვა სახის შეზღუდვები, საქართველოში შემოსვლა შეეძლებათ 14-დღიანი სავალდებულო კარანტინის პირობით, რომლის ხარჯსაც თავად დაფარავენ.
იმ შემთხვევაში, თუ ზემოაღნიშნული 5 ქვეყნის მოქალაქე/მუდმივი ბინადრობის უფლების მქონე პირი საჰაერო გზით ჩამოდის ევროკავშირის იმ ქვეყნიდან, რომელთანაც საქართველო დათქმით ხსნის საზღვარს (იტალია, კვიპროსი, საბერძნეთი, ესპანეთი, შვედეთი, ლუქსემბურგი, ნიდერლანდები, პოლონეთი, პორტუგალია, რუმინეთი, ხორვატია) ან იმ ქვეყნებიდან, რომელთანაც საქართველოს არ აქვს საზღვარი გახსნილი, აგრეთვე, თუ ბოლო 14 დღის განმავლობაში აქვს მოგზაურობის ისტორია ხსენებული 5 ქვეყნის გარდა სხვა ქვეყნებში, ექვემდებარება 14-დღიან სავალდებულო კარანტინს, საკუთარი ხარჯით.
● ევროკავშირის წევრ რომელ ქვეყნებთან არ იხსნება საზღვრები?
ამ დროისთვის ევროკავშირის 11 წევრ ქვყანასთან არ არის გახსნილი საზღვრები. ეს ქვეყნებია: სლოვენია, ავსტრია, ბელგია, ბულგარეთი, დანია, მალტა, სლოვაკეთი, ფინეთი, უნგრეთი, ჩეხეთი და ხორვატია.
● საქმიანი ვიზიტით თუ უნდა ჩამოსვლა ბიზნესმენს, რა უნდა გააკეთოს?
საქმიანი ვიზიტები მსოფლიოს ყველა ქვეყნიდან შეუფერხებლად განხორციელდება წინასწარ, შესაბამისი ფორმის შევსებისა და შესაბამის დარგობრივ უწყებასთან შეთანხმებით. საქმიანი ვიზიტით საქართველოში ჩამოსულ სტუმრებს ეკისრებათ ვალდებულება, რომ ჩამოსვლიდან პირველი 2 კვირის განმავლობაში ყოველ 72 საათში ერთხელ საკუთარი სახსრებით ჩაიტარონ კოვიდ19-ზე PCR ტესტი, ან გაიარონ სავალდებულო 14-დღიანი კარანტინი, ასევე, საკუთარი სახსრებით.
ეს წესი არ ეხებათ ევროკავშირის წევრი იმ 5 ქვეყნის მოქალაქეებს/ბინადრობის ნებართვის მქონე პირებს, რომლებთანაც საქართველო უპირობოდ ხსნის საზღვრებს.
ელექტრონულ ანკეტა საქართველოს იმ მოქალაქეებმაც უნდა შეავსონ, რომლებიც საქართველოში ევროკავშირის იმ 5 ქვეყნიდან (გერმანია, საფრანგეთი, ესტონეთი, ლატვია და ლიეტუვა) ჩამოდიან, რომლებსაც საქართველომ საზღვარი უპირობოდ გაუხსნა?
ელექტრონულ ანკეტას ავსებენ მხოლოდ საქართველოს ის მოქალაქეები, რომლებიც გერმანიის, საფრანგეთის, ესტონეთის, ლატვიის და ლიეტუვას ორმაგი მოქალაქეების არიან ან ამ ქვეყნებში მუდმივი ბინადრობის მოწმობა აქვთ.
● ავსებენ თუ არა ელექტრონულ ანკეტას ევროკავშირის იმ სახელმწიფოს მოქალაქეები/ბინადრობის ნებართვის მქონე პირები, რომელთანაც საზღვარი გარკვეული დათქმით იხსნება?
არ ავსებენ, ვინაიდან მათთვის სავალდებულოა 14-დღიანი კარანტინის გავლა.
● სად უნდა შევავსოთ ელექტრონული ანკეტა?
ელექტრონული ანკეტა ხელმისაწვდომია საქართველოს მთავრობის მიერ საგანგებოდ შექმნილ ვებგვერდზე www.stopcov.ge
● საქართველოში გამგზავრებამდე PCR კვლევის ჩატარება აუცილებელია?
არ არის აუცილებელი. საზღვარგარეთ ჩატარებული ლაბორატორიული კვლევის დასკვნის თანახმად ადამიანს კორონავირუსი რომ არ უდასტურდებოდეს, საქართველოში PCR ტესტის გაკეთება ან 14-დღიანი კარანტინის გავლა მაინც აუცილებელია.
● ევროკავშირის რომელი ქვეყნის მოქალაქეებს/ბინადრობის ნებართვის მქონე პირებს მოუწევთ 14-დღიანი კარანტინის გავლა საკუთარი სახსრებით საქართველოში შემოსვლის შემთხვევაში?
ეს ქვეყნებია: იტალია, კვიპროსი, საბერძნეთი, ესპანეთი, შვედეთი, ლუქსემბურგი, ნიდერლანდები, პოლონეთი, პორტუგალია, რუმინეთი და ხორვატია.
● თუ ადამიანი გერმანიის, საფრანგეთის, ესტონეთის, ლიეტუვის ან ლატვიის მოქალაქეა, მაგრამ ევროკავშირის იმ წევრი ქვეყნიდან შემოდის, რომელთანაც საზღვარი შესაბამისი დათქმით არის გახსნილი, მაგალითად, იტალიიდან?
ასეთ შემთხვევაში მათ 14-დღიანი სავალდებულო კარანტინი უნდა გაიარონ, საკუთარი სახსრებით.
● თუ გერმანიის, საფრანგეთის, ესტონეთის, ლიეტუვის ან ლატვიის მოქალაქე ევროკავშირის არაწევრი, ან სხვა რომელიმე კონტინენტის ქვეყნიდან, ან ევროკავშირის იმ წევრი ქვეყნებიდან შემოდის, რომელთანაც საქართველოს არ აქვს საზღვარი გახსნილი, მაშინ რა ხდება?
ასეთ შემთხვევაში მან 14-დღიანი სავალდებულო კარანტინი უნდა გაიაროს, საკუთარი სახსრებით.
● საქართველოს მოქალაქემ, რომელიც ევროკავშირის წევრი ან სხვა ქვეყნიდან შემოდის საქართველოში, რა წესები უნდა დაიცვას?
საქართველოს მოქალაქეებმა უნდა გაიარონ სავალდებულო 14-დღიან კარანტინი. გამონაკლისს წარმოადგენენ საქართველოს ის მოქალაქეები, რომლებსაც აქვთ საფრანგეთის, გერმანიის, ესტონეთის, ლატვიის ან ლიეტუვის მუდმივი ბინადრობის უფლების დამადასტურებელი დოკუმენტი ან ამ ქვეყნების მოქალაქის სტატუსი.
● ვარ საქართველოს მოქალაქე. ამავე დროს მაქვს საფრანგეთში მუდმივი ბინადრობის უფლება. 14-დღიანი სავალდებულო კარანტინი მეც შემეხება?
საქართველოს იმ მოქალაქეებზე, რომელთაც საფრანგეთის, გერმანიის, ესტონეთის, ლატვიის ან ლიეტუვის მუდმივი ბინადრობის უფლების დამადასტურებელ დოკუმენტი აქვთ, სავალდებულო 14-დღიანი კარანტინი არ ვრცელდება.
აღნიშნული ქვეყნების მოქალაქეების მსგავსად, ზემოჩამოთვლილი 5 ქვეყნის მუდმივი ბინადრობის ნებართვის მქონე საქართველოს მოქალაქეებმა საქართველოს საზღვრის გადმოკვეთამდე უნდა შეავსონ საგანგებოდ შემუშავებული სპეციალური ანკეტა, სადაც უნდა მიუთითონ საქართველოში შემოსვლამდე ბოლო 14-დღის განმავლობაში მოგზაურობის ისტორია, საქართველოში ვიზიტის დროს განსაზღვრული ადგილსამყოფელი და საკონტაქტო ინფორმაცია.
მათივე თანხმობის შემთხვევაში, აეროპორტში მათ ჩაუტარდებათ PCR ტესტი (სახელმწიფოს ხარჯით).
საზღვარზე შემოსვლისას, თუ თერმოსკრინინგით 37 გრადუსზე მაღალი ტემპერატურა დაუფიქსირდება, ასეთ შემთხვევაში მას სამედიცინო დაწესებულებაში გადაიყვანენ.
იმ შემთხვევაში, თუ ზემოაღნიშნული 5 ქვეყნის მუდმივი ბინადრობის უფლების მქონე საქართველო მოქალაქე საჰაერო გზით ჩამოდის ევროკავშირის იმ ქვეყნიდან, რომელთანაც საქართველო დათქმით ხსნის საზღვარს (იტალია, კვიპროსი, საბერძნეთი, ესპანეთი, შვედეთი, ლუქსემბურგი, ნიდერლანდები, პოლონეთი, პორტუგალია, რუმინეთი, ხორვატია) ან იმ ქვეყნებიდან, რომელთანაც საქართველოს არ აქვს საზღვარი გახსნილი, აგრეთვე, თუ ბოლო 14 დღის განმავლობაში აქვს მოგზაურობის ისტორია ხსენებული 5 ქვეყნის გარდა სხვა ქვეყნებში, მაშინ საქართველოს მოქალაქე ექვემდებარება 14-დღიან სავალდებულო კარანტინს, საკუთარი ხარჯით.
● ევროკავშირის წევრი იმ ქვეყნის მოქალაქეებს, რომელთათვისაც საქართველოს საზღვარი იხსნება, შეეძლებათ თუ არა ქვეყანაში სახმელეთო საზღვრით შემოსვლა?
სახმელეთო სასაზღვრო გამშვები პუნქტები საქართველოში ამ დროისთვის დაკეტილია.
ტესტირება
● რა სახის/მეთოდის კვლევა ტარდება აეროპორტში?
აეროპორტებში ტარდება PCR ტესტირება.
● რა შემთხვევაში დაექვემდებარება მგზავრი აეროპორტში PCR კვლევას?
აეროპორტში PCR კვლევას ექვემდებარება ევროკავშირის იმ 5 ქვეყნის მოქალაქე/ბინადრობის ნებართვის მქონე პირი, რომელსაც საქართველომ უპირობოდ გაუხსნა საზღვარი და ისიც იმ შემთხვევაში, თუ მან წინასწარ, აპლიკაციის შევსებისას დააფიქსირა ტესტის გაკეთების სურვილი.
● კვლევის შედეგს რამდენ ხანში გავიგებ?
PCR-კვლევის პასუხი ცნობილი იქნება მაქსიმუმ 24 საათში. რეკომენდაციის თანახმად, კვლევის პასუხის მიღებამდე ადამიანი თვითიზოლაციაში უნდა იყოს.
● კვლევის შედეგი რომ გავიგო, სად უნდა მივიდე?
კვლევის პასუხს მაქსიმუმ 24 საათის განმავლობაში მიიღებთ ელექტრონული ფოსტაზე. თუ პასუხი დადებითი იქნება, თქვენ დაავადების კონტროლის ეროვნული ცენტრიდან დაგიკავშირდებიან და საავადმყოფოში გადაგიყვანენ.
● რა დრო სჭირდება PCR-ტესტის გაკეთებას?
ერთი ადამიანის PCR კვლევისთვის მაქსიმუმ 10 წუთია საჭირო.
● ფასიანია თუ არა კვლევის ჩატარება?
აეროპორტში PCR-ტესტის ჩატარება უფასოა იმ 5 ქვეყნის მოქალაქეებისთვის და ამ ქვეყნებში მუდმივი ბინადრობის ნებართვის მქონე პირისთვის, რომელთანაც საქართველო უპირობოდ ხსნის საზღვრებს.
კარანტინი
● რა შემთხვევაშია სავალდებულო 14-დღიანი კარანტინის გავლა?
კარანტინი სავალდებულოა საქართველოს მოქალაქეებისთვის და ევროკავშირის იმ ქვეყნების მოქალაქეებისთვის, რომელთანაც სახელმწიფო საზღვარი გარკვეული დათქმით იხსნება.
კარანტინს ექვემდებარება ასევე ევროკავშირის ზემოაღნიშნული იმ 5 ქვეყნის მოქალაქე/მუდმივი ბინადრობის ნებართვის მქონე პირი, რომელიც საქართველოში შემოდის იმ ქვეყნებიდან, რომელთანაც საზღვარი არ გვაქვს გახსნილი ან ბოლო 14 დღის განმავლობაში ამ 5 ქვეყნის გარდა სხვა ქვეყნებში მოგზაურობის ისტორია აქვთ.
● ვინ ფარავს კარანტინის ხარჯებს?
საქართველოს მოქალაქეების შემთხვევაში – სახელმწიფო, ხოლო ევროკავშირის ქვეყნების მოქალაქეების შემთხვევაში, თავად ისინი.
● არ მინდა კარანტინში ყოფნა. მაქვს თუ არა თვითიზოლაციაში გადასვლის უფლება?
თვითიზოლაციაში გადასვლა შესაძლებელია:
პირის ჯანმრთელობის მდგომარეობის გათვალისწინებით, რაც ცნობით დასტურდება;
დიპლომატებისა და საერთაშორისო მისიების მოთხოვნის შემთხვევაში (წესების დაცვაზე ზედამხედველობას თავად ახორციელებენ);
ამისთვის საჭიროა შემდეგი პროცედურების გავლა:
თვითიზოლაციაში გადასვლისთვის უნდა შეავსოთ შესაბამისი ფორმა, სადაც უთითებთ მისამართს;
თქვენ მიერ მითითებულ მისამართზე არსებული ბინა აკმაყოფილებს თუ არა ჯანდაცვის რეკომენდაციებს, ამას სსიპ საგანგებო სიტუაციების კოორდინაციისა და გადაუდებელი დახმარების ცენტრი დაადგენს და პასუხს ამის შემდეგ მიიღებთ. თუ მითითებული ბინა რეკომენდაციებს ვერ აკმაყოფილებს, მაშინ თვითიზოლაციაში გადასვლის უფლებას ვერ მიიღებთ.
● შემიძლია საკარანტინო სასტუმრო თვითონ ავირჩიო?
არა.
● ვინ წამიყვანს საკარანტინო სასტუმროში ან 14 დღის გასვლის შემდეგ იქიდან ვინ წამომიყვანს?
აეროპორტიდან სასტუმროში ტრანსპორტირებას უზრუნველყოფს სახელმწიფო. სასტუმროს დატოვება ხდება 14-დღიანი ვადის გასვლის შემდეგ, PCR ტესტით დადასტურებული უარყოფითი პასუხის შემთხვევაში.
● რატომ არის სავალდებულო საქართველოს მოქალაქისთვის კარანტინი?
სახელმწიფო ცდილობს მინიმუმამდე დაიყვანოს კორონავირუსის გავრცელების მაჩვენებელი. გამოცდილებამ აჩვენა, რომ საქართველოში დაფიქსირებული შემთხვევების უმრავლესობა საზღვარგარეთიდან იყო შემოტანილი. საქართველოს მოქალაქეებს კი ტურისტებისგან განსხვავებით, ადგილობრივ მოსახლეობასთან უფრო ხშირი კონტაქტი აქვთ.
● რა შემთხვევაში შეუძლია საქართველოს მოქალაქეს ქვეყნიდან გამგზავრება?
საქართველოს მოქალაქეს შეუძლია გამგზავრება იმ ქვეყნებში, რომლებმაც დათქმით გახსნეს საზღვრები. ასეთ შემთხვევაში აუცილებელი იქნება მიმღები ქვეყნის მიერ დადგენილი წესების შესრულება: ტესტის გაკეთება ან/და 14-დღიანი თვითიზოლაციის ან კარანტინის გავლა.
ნებისმიერ ქვეყანაში, მათ შორის გერმანიაში, საფრანგეთში, ესტონეთში, ლიეტუვასა და ლატვიაში მგზავრობის შემდეგ საქართველოში დაბრუნებისას საქართველოს მოქალაქე ვალდებულია, რომ 14-დღიანი კარანტინი გაიაროს.
საქართველოში შემოსვლის და საქართველოდან სხვა ქვეყნებში შესვლის პირობები ყოველ 2 კვირაში გადაიხედება.
