საქართველოს პარლამენტმა დეოლიგარქიზაციის შესახებ კანონი პირველი მოსმენით მიიღო

პარლამენტმა დეოლიგარქიზაციის შესახებ კანონი პირველი მოსმენით მიიღო

საქართველოს პარლამენტმა დეოლიგარქიზაციის შესახებ კანონი პირველი მოსმენით მიიღო. კანონპროექტს 80-მა დეპუტატმა დაუჭირა მხარი, წინააღმდეგ კი 9 დეპუტატი წავიდა. 

კანონპროექტი სპეციალურმა სამუშაო ჯგუფმა მოამზადა და მასში ოლიგარქი განმარტებულია, როგორც საზოგადოებრივ ცხოვრებაში მნიშვნელოვანი ეკონომიკური და პოლიტიკური წონის მქონე პირი. აღნიშნული კანონპროექტის თანახმად, ამ განმარტებას დააკმაყოფილებს და ოლიგარქად მიიჩნევა ფიზიკური პირი, რომელიც შემდეგი კრიტერიუმებიდან, სულ მცირე, სამ მათგანს ერთდროულად აკმაყოფილებს:

• პოლიტიკურ ცხოვრებაში მონაწილეობს;
• მასობრივი ინფორმაციის საშუალებებზე მნიშვნელოვან გავლენას ახდენს;
• არის იმ მეწარმე იურიდიული პირის საბოლოო ბენეფიციარი, რომელსაც ბაზარზე დომინანტური მდგომარეობა უკავია და რომელიც ამ მდგომარეობას 1 წლის განმავლობაში ინარჩუნებს ან აუმჯობესებს;
• მისი და იმ მეწარმე იურიდიული პირების აქტივების დადასტურებული ოდენობა, სადაც ის ბენეფიციარია, შესაბამისი წლის 1 იანვრის მდგომარეობით 1 000 000-ჯერ აღემატება შრომისუნარიანი პირებისთვის დადგენილ საარსებო მინიმუმს.

მოქალაქის ოლიგარქად ცნობის შესახებ გადაწყვეტილებას თავად პარლამენტი მიიღებს, შემდეგ კი მათ სპეციალურ რეესტრში შეიყვანენ. რეესტრთან დაკავშირებულ წესებს პარლამენტი დაამტკიცებს, ხოლო რეესტრის შექმნასა და წარმოებას პარლამენტის აპარატი უზრუნველყოფს.

პარლამენტის მიერ ოლიგარქების რეესტრში შეყვანილ პირს აეკრძალება:

• პოლიტიკური პარტიების მხარდასაჭერად თავისი სახსრებიდან შემოწირულებების გაღება, სამუშაოს შესრულება, საქონლის, მომსახურების ან ნაღდი ფულის მიწოდება, დაკავშირებული პირების მეშვეობით ან/და ისეთი იურიდიული პირების მეშვეობით, სადაც ის საბოლოო ბენეფიციარია, სამუშაოს შესრულება, საქონლის ან მომსახურების მიწოდება; აგრეთვე საქართველოს საარჩევნო კოდექსის შესაბამისად კანდიდატების საარჩევნო ფონდში (გარდა თავისი საარჩევნო ფონდისა) შემოწირულებების გაღება და საარჩევნო პროცესის მიმდინარეობისას პოლიტიკური პარტიების დაფინანსება;
• ფართომასშტაბიანი ობიექტების პრივატიზაციის პროცესში იყოს მყიდველი (მყიდველის ბენეფიციარი);
• ნებისმიერი პოლიტიკური კამპანიის დაფინანსება, პოლიტიკური მოთხოვნების მქონე შეკრებების ან დემონსტრაციების გამართვა.

დეპუტატი მმართველი პარტიიდან, გია ვოლსკი ამბობს, რომ დეოლიგარქიზაციაზე მმართველი პარტიის მიდგომა იმდენად სამართლიანია, რომ ოპოზიციას უხერხულობა შეუქმნა:

“ქართული ოცნების პოლიტიკური გუნდის მიდგომა დეოლიგარქიზაციის საკითხთან დაკავშირებით იმდენად სამართლიანია, რომ გარკვეული უხერხულობები შეუქმნა რადიკალურ ოპოზიციას ამ თემაზე საერთო პოლემიკაში ჩართვისათვისაც კი. არის საუბარი ზოგადად, არის საუბარი, როგორც სჩვევიათ, ბიძინა ივანიშვილზე, ქართულ ოცნებაზე, ზოგადად, დამოკიდებულებაზე ცალკეული საკითხების მიმართ, მაგრამ კანონპროექტზე არ არის ლაპარაკი.”

● სასამართლო და საარჩევნო რეფორმები, დეოლიგარქიზაცია – რა პირობები წაუყენა EU-მ საქართველოს
● ემუქრება თუ არა ივანიშვილს სანქციები და რას შეცვლის ეს ქვეყანაში?
● საქართველო და სანქციები რუსეთის წინააღმდეგ – რატომ ასოცირდება ქვეყანა “შავ ხვრელთან”?

ევროკომისიამ საქართველოს, უკრაინისა და მოლდოვის ევროკავშირის წევრობის კანდიდატის სტატუსის მინიჭების საკითხზე 17 ივნისს დასკვნა მოამზადა. შედეგად, უკრაინა და მოლდოვა მიიღებენ ევროკავშირის კანდიდატობის სტატუსს და დაეკისრებათ გარკვეული ვალდებულებების შესრულება, ხოლო საქართველოს ჯერ პირობების შესრულება დაევალება, შემდეგ კი კანდიდატობის სტატუსის მიღების შანსი ექნება.

ევროკავშირმა საქართველოს 12 პუნქტიანი პირობა წაუყენა, რომელშიც ერთ-ერთი მთავარი პუნქტი სწორედ დეოლიგარქიზაციაა.

“ეკონომიკურ, პოლიტიკურ და სოციალურ სფეროებში გადაჭარბებული გავლენების აღმოფხვრით განხორციელდეს “დეოლიგარქიზაციის” ვალდებულება” – წერია 12 პუნქტიან გეგმაში.

ოპოზიციის აზრით, ევროკავშირი დეოლიგარქიზაციაში ქვეყნის არაფორმალურ მმართველს, ბიძინა ივანიშვილს გულისხმობს, ხოლო ხელისუფლება ამბობს, რომ ეს კანონი ტელეკომპანია “ფორმულას” მფლობელს, დავით კეზერაშვილს და საქართველოს მესამე პრეზიდენტს, პატიმრობაში მყოფ მიხეილ სააკაშვილს ეხება.