"ჟურნალისტმა ინტერვიუ უნდა შეწყვიტოს" - პარლამენტი მედიას ქცევის წესებს უდგენს
პარლამენტი მედიას ქცევის წესებს უდგენს
პარლამენტი ჟურნალისტებს ქცევის ახალ წესებს უდგენს, რომლის თანახმადაც თუკი დეპუტატი ინტერვიუზე უარს იტყვის, ჟურნალისტმა ინტერვიუ დაუყოვნებლივ უნდა შეწყვიტოს.
შესაბამისი ბრძანება პარლამენტის თავმჯდომარემ, შალვა პაპუაშვილმა უკვე გამოსცა. ბრძანების მიხედვით, შეიცვალა ჟურნალისტების აკრედიტაციის წესიც. როგორც პაპუაშვილმა ბიუროს სხდომაზე განაცხადა, იარსებებს ორი სახის აკრედიტაცია – ჟურნალისტებისთვის, რომლებიც პარლამენტის მუშაობას რეგულარულად აშუქებენ და ასევე იმ პირებისთვის, რომლებსაც პარლამენტში საქმიანობა დროებით დასჭირდებათ. ასევე, განისაზღვრება, რამდენი მედია ჯგუფი შეძლებს აკრედიტაციის მიღებას.
პარლამენტის თავმჯდომარის თქმით, ქცევის წესები ასე განისაზღვრა:
● ხელი არ შეუშალოს პარლამენტში მიმდინარე ღონისძიებების მსვლელობას;
● წინასწარი ნებართვის გარეშე არ გადაიღოს პარლამენტის წევრის ან აპარატის თანამშრომლის სამუშაო ოთახი;
● პარლამენტის წევრის, აპარატის თანამშრომლის ან სტუმრად მყოფი პირის მიერ ინტერვიუს ჩაწერაზე უარის თქმის შემთხვევაში შეწყვიტოს ინტერვიუ;
● პარლამენტის წევრის, აპარატის თანამშრომლის ან სტუმრად მყოფი პირის თანხმობის გარეშე არ გადაიღოს მისი დოკუმენტების, მისი ტელეფონის ან სხვა ელექტრონული მოწყობილობის ეკრანი ისე, რომ მასზე არსებული ინფორმაციის ან გამოსახულების აღქმა შესაძლებელი იყოს;
● არ დაუშვას მისი მხრიდან საქართველოს პარლამენტში მყოფი პირისადმი უხამსი, სექსისტური, დისკრიმინაციული მიმართვა ან მოქმედება;
● დაემორჩილოს სახელმწიფო დაცვის და მანდატურის მითითებებს, აკრედიტაცია ატაროს გამოსაჩენად და არ გადასცეს სხვა პირს.
● 2024 წლის საპარლამენტო არჩევნებში ამომრჩეველთა თითქმის 90 პროცენტი ხმას ელექტრონულად მისცემს
● 10 წელი “ქართულ ოცნებასთან”. სხვადასხვა სფეროს ექსპერტები ოცნების მმართველობას აფასებენ
● The Economist: დემოკრატიის ინდექსში საქართველო ჰიბრიდულ რეჟიმად რჩება
ჟურნალისტური ეთიკის ქარტიის განცხადება
საქართველოს ჟურნალისტური ეთიკის ქარტია პარლამენტის თავმჯდომარეს, შალვა პაპუაშვილს მოუწოდებს, 6 თებერვალს გამოცემული ბრძანება გააუქმოს, რომელიც დღეიდან, 7 თებერვლიდან შედის ძალაში.
“საქართველოს ჟურნალისტური ეთიკის ქარტიისთვის მიუღებელია დაინტერესებულ პირებთან კონსულტაციების გარეშე აკრედიტაციის წესის დამტკიცება და მისი საჯაროდ გამოცხადებისთანავე ძალაში შესვლა. მით უფრო, რომ აღნიშნული დოკუმენტი განსაზღვრავს არა მხოლოდ აკრედიტაციასთან დაკავშირებულ საკითხებს, არამედ, აკრედიტებული ჟურნალისტის ვალდებულებებს”, – აღნიშნულია ქარტიის განცხადებაში.
ქარტიაში მიიჩნევენ, რომ იმ ფონზე, როდესაც მედიისთვის, “ფაქტობრივად, შეუძლებელია საჯარო ინფორმაციის მიღება და მმართველი პარტიის წარმომადგენლები შერჩევითად აძლევენ ინტერვიუს” მედიასაშუალებებს, მსგავსი რეგულაციების დაწესებით შეუძლებელი გახდება ინფორმაციის მოპოვება და საზოგადოებისთვის მიწოდება.
“ქარტია მოუწოდებს საქართველოს პარლამენტის თავმჯდომარეს, არ დაუშვას, რომ საფრთხე შეექმნას დემოკრატიის ისეთ პრინციპებს, როგორიცაა ანგარიშვალდებულება, საჯაროობა და ღიაობა და გააუქმოს მიღებული ბრძანება, რომელიც გამოიწვევს ფორმალურ დაბრკოლებებს და საქმიანობის შეზღუდვას მედიისთვის”, – აცხადებენ ქარტიაში.
