თბილისში 100 ათასზე მეტი ადამიანი შეიკრიბა არჩევნების გაყალბების წინააღმდეგ აქციაზე. დასავლეთი არ ჩქარობს არჩევნების აღიარებას
ოპოზიციის აქცია არჩევნების გაყალბების წინააღმდეგ
100 ათასამდე ადამიანი შეიკრიბა თბილისში ორშაბათს საღამოს პარლამენტის წინ, 26 ოქტომბრის საპარლამენტო არჩევნების შედეგების გასაპროტესტებლად.
ცენტრალურმა საარჩევნო კომისიამ მმართველი პარტია, “ქართული ოცნება” ხმების თითქმის 54% -ით გამარჯვებულად გამოაცხადა.
განსხვავებული სურათი აჩვენა ეგზიტპოლებმა, სადაც “ქართულ ოცნებას” 42%-ზე მეტი არ ჰქონდა.
დამკვირვებელთა უმეტესობა თანხმდება, რომ მმართველი პარტიის ლიდერის, ოლიგარქ ბიძინა ივანიშვილის გამარჯვება რეალურად ცვლის საქართველოს კურსს პროდასავლურიდან პრორუსის მიმართულებით.
გუშინდელი აქციის ინიციატორი და ლიდერი პრეზიდენტი სალომე ზურაბიშვილი იყო – მან, 27 ოქტომბერს გაკეთებულ განცხადებაში “ტოტალურად გაყალბებული” და “რუსული სპეცოპერაცია” უწოდა არჩევნებს და ისინი არალეგიტიმურად ცნო. არალეგიტიმური უწოდა მან ოცნების ხელისუფლებაც.
მან ასევე მიმართა დასავლეთს, მხარი დაუჭირონ ქართველ ხალხს და არ აღიარონ არჩევნები ლეგიტიმურად.
მრავალათასიან აქციაზე პარლამენტში შესული ოთხივე ოპოზიციური პარტიის წარმომადგენლები მივიდნენ.
ყველა ლიდერი თანხმდება, რომ “არჩევნები არა გაყალბებული არამედ მოპარულია”, როგორც ისინი ამბობენ. პარლამენტში გასული არც ერთი პარტია არ აპირებს მანდატების გამოყენებას და პარლამენტში შესვლას.
მთავარი მოთხოვნაა ხელახალი არჩევნები საერთაშორისო დამკვირვებლების მონაწილეობით.
მმართველი ძალა ამ მოთხოვნის დაკმაყოფილებას არ აპირებს. პარლამენტის თავმჯდომარემ შალვა პაპუაშვილმა განაცხადა, რომ მმართველ პარტიას ოპოზიციის მონაწილეობის გარეშეც აქვს საკმარისი ხმები ახალი პარლამენტის მუშაობის დასაწყებად. მისი თქმით, არჩევნების შედეგად „ქართულმა ოცნებამ“ 150-მანდატიან პარლამენტში 89 ადგილი მიიღო.
საქართველოში მოულოდნელი ვიზიტით ჩამოვიდა უნგრეთის პრემიერ-მინისტრი ვიქტორ ორბანი, რომელსაც თან ახლავს მთავრობის რამდენიმე წევრი. კიდევ ერთი სიურპრიზი იყო ის, რომ ის თბილისის ცენტრში, სასტუმრო მარიოტში სწორედ მაშინ მივიდა, როცა იქ ქართველი ოპოზიციის ლიდერები დასავლელ დიპლომატებს ხვდებოდნენ. მარიოტთან მისული ორბანი ქუჩაში შეკრებილმა ხალხმა სტვენით გააცილა.
დამკვირვებლები ამბობენ, რომ ევროკავშირის წევრი ქვეყნის ლიდერის ჩამოყვანით “ოცნება” ცდილობს ლეგიტიმაცია მიანიჭოს არჩევნებს.
დასავლეთის რეაქცია
თუმცა, ორბანი ერთადერთი ევროპელი ლიდერია, რომელმაც ამ ეტაპზე არჩევნებში გამარჯვება მიულოცა “ქართულ ოცნებას”. სხვა ლიდერები ამას არ ჩქარობენ.
ევროკავშირმა გააკრიტიკა ორბანის ვიზიტი საქართველოში და მას “ნაადრევი” უწოდა.
„ორბანი არ ლაპარაკობს ევროკავშირის სახელით“, – ნათქვამია განცხადებაში, რომელიც ევროკავშირმა საქართველოში ჩატარებული არჩევნების შემდგომ გაავრცელა. “საარჩევნო მთლიანობის დარღვევა შეუთავსებელია იმ სტანდარტებთან, რომლებიც მოსალოდნელია ევროკავშირის კანდიდატისგან” – ასეა დასათაურებული განცხადება, რომელსაც ხელს აწერს ევროკავშირის ქვეყნის 13 მინისტრი: ჩეხეთი, დანია, გერმანია, ესტონეთი, ფინეთი, საფრანგეთი, ირლანდია, ლიტვა, ნიდერლანდები, ლუქსემბურგი, პოლონეთი, პორტუგალია და შვედეთი.
“ჩვენ ღრმად ვართ შეშფოთებული საქართველოში არსებული ვითარებით. საერთაშორისო დამკვირვებლებმა დააფიქსირეს დარღვევები როგორც საარჩევნო კამპანიის დროს, ასევე არჩევნების დღეს. ჩვენ ვგმობთ საერთაშორისო ნორმების ყოველგვარ დარღვევას თავისუფალი და სამართლიანი არჩევნებისთვის. ჩვენ ვიზიარებთ მათ შეშფოთებას და ვითხოვთ საჩივრების მიუკერძოებელ გამოძიებას და დაფიქსირებული დარღვევების გამოსწორებას.
ჩვენ ამ რთულ დროს ქართველების გვერდით ვდგავართ. მნიშვნელოვანია, რომ საპროტესტო აქციები და განსაკუთრებით ხელისუფლების რეაქცია მშვიდობიანი დარჩეს. საარჩევნო მთლიანობის დარღვევა შეუთავსებელია იმ სტანდარტებთან, რომლებიც მოსალოდნელია ევროკავშირის კანდიდატისგან.
დარღვევები ქართველი ხალხის კანონიერი ევროპული სწრაფვის ღალატია. კანონის უზენაესობისა და თავისუფალი და სამართლიანი არჩევნების დაცვა საქართველოს ევროკავშირის გზაზე ნებისმიერი პროგრესის განუყოფელი ნაწილია. ჩვენ ვაკრიტიკებთ პრემიერმინისტრ ორბანის ნაადრევ ვიზიტს საქართველოში. ის ევროკავშირის სახელით არ საუბრობს”, – ნათქვამია განცხადებაში.
შვედეთმა გამოაცხადა საქართველოს ხელმძღვანელობასთან ყოველგვარი პირდაპირი თანამშრომლობის შეწყვეტა, რაც გულისხმობს სახელმწიფო ინფრასტრუქტურისა და პროგრამების დახმარების შეჩერებას, რომელიც ყოველწლიურად დაახლოებით 17,37 მლნ ევროს შეადგენს.
ამასთან, ცნობილი გახდა, რომ გამოიყოფა დახმარების ახალი ხაზი – დაახლოებით 2,17 მილიონი ევრო, რომელიც მიმართულია საქართველოში სამოქალაქო საზოგადოების მხარდაჭერაზე.
ამის შესახებ შვედეთის საერთაშორისო განვითარებისა და საგარეო ვაჭრობის მინისტრმა ბენიამინ დოსამ განაცხადა. ამ გადაწყვეტილების მიზეზად მან 26 ოქტომბრის საპარლამენტო არჩევნებში საერთაშორისო დამკვირვებლების მიერ დაფიქსირებული დარღვევები დაასახელა. მან ხაზგასმით აღნიშნა, რომ სამოქალაქო საზოგადოების წინააღმდეგ შემაკავებელი ზომები ეწინააღმდეგება ევროკავშირის ნორმებსა და ღირებულებებს. დოსამ განაცხადა, რომ თანამშრომლობა შეიძლება განახლდეს, თუ საქართველო ევროინტეგრაციის გზას დაუბრუნდება.
კანადის საგარეო საქმეთა და საერთაშორისო ვაჭრობის სამინისტრომ განაცხადა, რომ გადახედავს ურთიერთობას საქართველოს ხელმძღვანელობასთან. „კანადა შეშფოთებულია ამომრჩეველთა ფართოდ გავრცელებული დაშინებით, ხმების მოსყიდვით
დამკვირვებელთა დასკვნები
საერთაშორისო სადამკვირვებლო მისიების წინასწარი შეფასებბი საქართველოში, მათ შორის OSCE/ODIHR მისიის შეფასება შეგიძლიათ წაიკითხოთ აქ.
ქართული ორგანიზაცია „ჩემი ხმა“, რომელიც არჩევნების დღეს მონიტორინგს ახორციელებდა, ითხოვს თითქმის 200 საარჩევნო უბნის შედეგების გაუქმებას, სადაც 300 ათასზე მეტმა ადამიანმა მიიღო ხმა – ამომრჩეველთა დაახლოებით 10%-მა.
მიზეზად ორგანიზაციის მიერ ყალბი საიდენტიფიკაციო დოკუმენტების გამოყენებით გამოვლენილი გაყალბების სქემა დაასახელეს.
„თავდაპირველად, ცესკომ შეცვალა წესები, რამაც შესაძლებელი გახადა სარეგისტრაციო მაგიდებზე იმ ადამიანების განთავსება, რომლებიც დათანხმდნენ მონაწილეობას თაღლითობაში. შემდეგ, ბევრ რაიონში, რეგისტრატორების მერხები კედლებთან ისე ახლოს იყო განთავსებული, რომ დამკვირვებლები ვერ ხედავდნენ რა ეწერა დოკუმენტების გადამოწმების აპარატების ეკრანებზე. ასევე სხვადასხვა საბაბით გააძევეს უბნებიდან დამკვირვებლები. – ან, ყურადღების გადასატანად, გარეთ ჩხუბი დაიწყეს. ყალბი საბუთების მქონე „მოქალაქეები“ უბნიდან უბანზე ავტობუსებით გადაჰყავდათ“, – აცხადებენ ორგანიზაცია „ჩემი ხმის“ წარმომადგენლები.
საქართველოს დამოუკიდებელმა სადამკვირვებლო მისიამ, ISFED-მა დააფიქსირა დარღვევების უზარმაზარი სია და განაცხადა, რომ 26 ოქტომბრის საპარლამენტო არჩევნების შედეგები არ შეიძლება ჩაითვალოს ქართველი ამომრჩევლის უპირატესობის ნამდვილ ასახვად.
n-project
