ოპოზიციური პარტიები საარჩევნო კონფიგურაციებზე მსჯელობენ. რა ვიცით ამ დროისთვის
ოპოზიცია და ოქტომბრის არჩევნები
ოქტომბრის საპარლამენტო არჩევნებამდე ოთხ თვეზე ცოტა ნაკლებია დარჩენილი. მარტის აქციებისა და საფეხბურთო ციებ-ცხელების შემდეგ, ქვეყანა ნელ-ნელა არჩევნების თემას უბრუნდება.
26 ოქტომბრის საპარლამენტო არჩევნებში აკრძალულია საარჩევნო ბლოკის შექმნა. ამიტომ, პარტიებმა სხვა გადაწყვეტილებები უნდა მოძებნონ. ისინი უნდა შეთანხმდნენ რა კონფიგურაციით გავლენ ოქტომბრის არჩევნებში, რამდენი პოლიტიკური ცენტრი იქნება, ვინ ვისთან გაერთიანდება, ან, არ გაერთიანდება.
ზოგი ოპოზიციური პარტიის დამოკიდებულება ამ საკითხებზე, უკვე ცნობილია.
მაგალითად, ვიცით, რომ პარტია “ერთიანი ნაციონალური მოძრაობა” ოპოზიციურ პარტიებს სთავაზობს არჩევნებში ერთიანი სიით გასვლას. ამ იდეას მხოლოდ ამ პარტიასთან ალიანსში მყოფი “სტრატეგია აღმაშენებელი” თანხმდება.
დანარჩენი პარტიები ერთიან სიას არ ემხრობიან. მათი ერთი პარტიის (ამ შემთხვევაში, (ერთიანი ნაციონალური მოძრაობის”) ქოლგის ქვეშ გაერთიანება და ისე მონაწილეობა არჩევნებში, არ სურთ.
დღეს, 8 ივლისს, ოპოზიციამ უკვე უნდა თქვას, რას აპირებს არჩევნებისთვის. როგორ დაიცავს ამომრჩევლების ხმებს და რა სტრატეგია აქვს, მმართველი პარტია “ქართული ოცნების” დასამარცხებლად.
ეს პირობა ოპოზიციურმა პარტიებმა, ოფიციალურად და საჯაროდ დადეს 25 ივნისს, ბრიუსელში, სადაც ხელი მოაწერეს “ერთიანობის დეკლარაციას”.
რა ვიცით ახლა
ამ დროისთვის [8 ივლისი] ცნობილია, რომ ოთხი ოპოზიციური პარტია მოლაპარაკებებს მართავს გაერთიანებაზე. ეს პარტიები არიან: „ახალი“, „დროა“, „გირჩი – მეტი თავისუფლება“ და „ლელო“.
„გირჩი – მეტი თავისუფლების“ წევრის, ცოტნე კობერიძის თქმით, პარტიებმა საკითხების დიდი ნაწილი უკვე შეათანხმეს. კობერიძემ ტელეკომპანია „ფორმულას“ ეთერში განაცხადა, რომ მოლაპარაკებები ძალიან სწრაფ რეჟიმში მიმდინარეობს. მისივე თქმით, არ არის გამორიცხული, ამ პარტიების გადაწყვეტილება დღესვე გახდეს ცნობილი:
„შეთანხმებულია საკითხების უდიდესი ნაწილი, მხოლოდ რამდენიმე დეტალია შესათანხმებელი და ამაზე მიდის საუბარი. დიდი იმედი მაქვს, რომ დღეს [8 ივლისს], საღამოს მოესწრება გადაწყვეტილების მიღება, მაგრამ თუკი ბუკვალურად დღეს ვერ მოესწრო, ეს არ ნიშნავს, რომ შეთანხმება არ არის. დიდი პროპორციით, თითქმის მიღებულია გადაწყვეტილება“.
კობერიძეს არ გაუმხელია, რა საკითხებზე არ არის ამ ეტაპზე შეთანხმება. მან თქვა, რომ ასეთი საკითხები არ არის ფუნდამენტური. ასევე, თქვა, რომ ამ პარტიების ერთობა ერთ რომელიმე პარტიაზე არ აეწყობა.
ამ ოთხ პარტიას “ერთიანობის დეკლარაციაზე” ხელი უკვე მოწერილი აქვს. ამავე დეკლარაციის ხელმომწერია კიდევ ორი პარტია: „ერთიანი ნაციონალური მოძრაობა“ და „სტრატეგია აღმაშენებელი“. თუმცა, ისინი სავარაუდოდ, ცალკე პოლიტიკური პლატფორმით გავლენ არჩევნებზე, რადგან მათ იდეას – ერთიან, ოპოზიციურ სიაზე, სხვა პარტიები არ თანხმდებიან.
რა პოლიტიკურ პლატფორმას შესთავაზებენ ისინი ამომრჩეველს, ეს ინფორმაცია სავარაუდოდ, დღეს საღამოს გახდება ცნობილი. „ერთიან ნაციონალურ მოძრაობას“ დღეს საღამოს ყრილობა აქვს.
ამ დრომდე ვიცით ასევე ის, რომ ამ პლატფორმის სიაში ახალი სახეებიც იქნება. პარტია „ერთიანი ნაციონალური მოძრაობის“ დამფუძნებელმა, მიხეილ სააკაშვილმა, ასევე დღეს, 8 ივლისს, სასამართლო პროცესზე ჩართვისას თქვა, რომ „მათი სააარჩევნო სია ახალი სახეებით უნდა იყოს დაკომპლექტებული”.
ამ ეტაპზე ცნობილია, რომ არც ერთიან სიას ემხრობა და არც მოლაპარაკებებში არ მონაწილეობს პარტია „ევროპული საქართველო“. ის არც დეკლარაციის ხელმომწერი არაა.
“ევროპული საქართველო” იშველიებს კვლევას, რომელიც ჩატარდა არასამთავრობო ორგანიზაციების და რამოდენიმე ოპოზიციური პარტიის მიერ. ეს კვლევა ამბობს, რომ არჩევნებში საუკეთესო შედეგის მომტანი იქნება “სამი ოპოზიციური ცენტრის ჯამი”.
ამ პარტიამ დღეს გამოაქვეყნა განცხადება, რომელშიც წერია, რომ „საუკეთესო სინერგია აქვს „ევროპული საქართველოს“, „ახლის“ და „ლელოს“ საარჩევნო ერთეულად ქცევას“. ამავე განცხადებაში ნათქვამია, რომ მათ საჯაროდ და არასაჯაროდაც მიმართეს პოლიტიკური პარტიების ხელმძღვანელებს, თუმცა ისინი ჯერ დუმან.
“იმ ტიპის სიმძიმის ცენტრის შექმნა პროდასავლურ ოპოზიციაში, რომელიც ცალსახად მთავარ ოპოზიციურ სუბიექტად იქნება წარმოჩენილი, რომელიც მკაფიოდ გაემიჯნება კეზერაშვილის და სააკაშვილის ალიანსს, საუკეთესო გზაა ივანიშვილის რეჟიმის დასამარცხებლად”, – წერს პარტია.
ამ დროისთვის ასევე ვიცით, რომ არც მოლაპარაკებებში მონაწილეობს და არც ერთიან სიას არ ემხრობა ყოფილი პრემიერ მინისტრის, გიორგი გახარიას პარტია “საქართველოსთვის”.
საპარლამენტო არჩევნები საქართველოში 2024 წლის 26 ოქტომბერს უნდა გაიმართოს. წინასაარჩევნო კამპანია”, “ქართულმა ოცნებამ”, არაოფიციალურად უკვე დაიწყო.
“ქართული ოცნება”, რომელიც უკვე 12 წელია მართავს ქვეყანას, ცდილობს მეოთხე ვადით დარჩეს ხელისუფლებაში.
ოპოზიცია და ოქტომბრის არჩევნები
