ოფიციალურმა ბაქომ საპარლამენტო ასამბლეის 76 წევრი პერსონა ნონ გრატად გამოაცხადა
დაძაბულობა აზერბაიჯანსა და ევროპას შორის
აზერბაიჯანსა და ევროპას შორის მზარდი დაძაბულობის ფონზე, ოფიციალურმა ბაქომ განაცხადა, რომ ქვეყანაში არ შეუშვებს ევროპელ პარლამენტარებს, რომლებმაც ხმა მისცეს აზერბაიჯანის წინააღმდეგ PACE-ში. ასევე, აზერბაიჯანის საგარეო საქმეთა სამინისტროს წარმომადგენელი გამოეხმაურა ევროკავშირის მოწოდებებს პოლიტპატიმრების გათავისუფლების შესახებ. კერძოდ, ევროკავშირმა მოუწოდა ბაქოს, გაათავისუფლოს სამშობლოს ღალატის ბრალდებით დაკავებული ახალგაზრდა პოლიტოლოგი, ბაჰრუზ სამედოვი.
“აზერბაიჯანისთვის ბრალდებულების გათავისუფლების მოწოდებები პირდაპირ ეწინააღმდეგება სამართლებრივ პროცედურებს, არის სასამართლო სისტემაში ჩარევის მცდელობა და ეწინააღმდეგება ევროკავშირის მიერ დაწესებულ ღირებულებებს.” – აცხადებს საგარეო უწყება.
აზერბაიჯანელი ექსპერტი ჰაჯი ნამაზოვი მიიჩნევს, რომ ევროპის საბჭოს საპარლამენტო ასამბლეაში აზერბაიჯანის მისიისთვის მანდატის ჩამორთმევა არ არის დაკავშირებული ქვეყანაში ადამიანის უფლებების დარღვევასთან.
“ევროპულმა სტრუქტურებმა თავიანთ განცხადებებში დაიწყეს ყარაბაღის რეგიონში დაკავებული სეპარატისტებისა და ომის დამნაშავეების უფლებების გათანაბრება ჟურნალისტებისა და აქტივისტების უფლებებთან, რომლებიც არ მოსწონთ მთავრობას“, – ამბობს ნამაზოვი.
- POLITICO: ოპოზიციური პარტიების აკრძალვის გეგმით, საქართველო ჩრდილოეთ კორეის გზას ადგას
- “Abzas Media“-ს საქმეში მონაწილე პირებს 12 წლამდე თავისუფლების აღკვეთა ემუქრებათ
76 ხმა აზერბაიჯანის წინააღმდეგ და 76 პირი პერსონა ნონ გრატად
დეპუტატები, რომლებმაც ევროპის საბჭოს საპარლამენტო ასამბლეაში აზერბაიჯანის დელეგაციის წინააღმდეგ ხმა მისცეს, აზერბაიჯანში პერსონა ნონ გრატად გამოცხადდნენ. მანამ, სანამ აზერბაიჯანის დელეგაციას ევროსაბჭოში მანდატი არ აღუდგება, მათ აზერბაიჯანის ტერიტორიაზე არ შეუშვებენ.
ამის შესახებ აზერბაიჯანის საგარეო საქმეთა სამინისტროს პრესსამსახურის ხელმძღვანელმა, აიხან ჰაჯიზადემ “რადიო თავისუფლებისთვის” მიცემულ ინტერვიუში საპარლამენტო ასამბლეის და გერმანიის პარლამენტის წევრის, ფრანკ შვაბეს განცხადებების კომენტირებისას განაცხადა.
შვაბემ განაცხადა, რომ აზერბაიჯანი არ არის დაინტერესებული ევროსაბჭოში გაწევრიანებით, რადგან ქვეყანა “პატივს არ სცემს ამ ორგანიზაციის ღირებულებებს“. მან ასევე აღნიშნა, რომ აზერბაიჯანმა კვლავ არ მიიწვია ევროპის საბჭოს საპარლამენტო ასამბლეის დამკვირვებლები არჩევნებზე.
ევროპის საბჭოს საპარლამენტო ასამბლეის დამკვირვებლები არ იყვნენ მიწვეული ვადამდელ საპრეზიდენტო არჩევნებზე, რომელიც 2024 წლის 7 თებერვალს გაიმართა.
ამავდროულად, შვაბემ გამოთქვა სურვილი, ჩავიდეს აზერბაიჯანში COP29-ზე [კლიმატის ცვლილების კონფერენციაზე].
ჰაჯიზადემ შვაბეს განცხადებებს “მიკერძოებული” და “მცდარი” უწოდა.
“ფრანკ შვაბემ კარგად იცის, რომ ერთადერთი მიზეზი, რის გამოც ევროსაბჭოს საპარლამენტო ასამბლეის წარმომადგენლები არ მიიწვიეს მილი მეჯლისის არჩევნებზე დასაკვირვებლად, არის ის, რომ აზერბაიჯანის დელეგაციის მანდატი ჯერ არ არის აღდგენილი, მიუხედავად ჩვენი ქვეყნისთვის პოლიტიკურ დონეზე მიცემული დაპირებისა – მათ შორის გერმანელი ოფიციალური პირებისგან“, – ხაზგასმით აღნიშნა ჰაჯიზადემ.
რაც შეეხება შვაბეს სურვილს ეწვიოს აზერბაიჯანს COP29-ის ფარგლებში, ჰაჯიზადემ თქვა:
“სანამ ევროპის საბჭოს საპარლამენტო ასამბლეაში ჩვენი დელეგაციის მანდატი არ აღდგება, ამ პირებს აზერბაიჯანის ტერიტორიაზე არ შეუშვებენ“
2024 წლის 24 იანვარს, ევროპის საბჭოს საპარლამენტო ასამბლეამ არ გააგრძელა აზერბაიჯანის დელეგაციის უფლებამოსილება 1 წლის ვადით, იმის გამო, რომ ქვეყანამ “არ შეასრულა თავისი ძირითადი ვალდებულებები“ ევროპის საბჭოს წინაშე, ასევე ასამბლეის არჩევნებზე დამკვირვებლების არმიწვევის გამო.
გადაწყვეტილებას მხარი 76-მა დეპუტატმა დაუჭირა, 10 წინააღმდეგი იყო, ხოლო 4-მა თავი შეიკავა.
ევროკავშირმა აზერბაიჯანს ბაჰრუზ სამედოვის გათავისუფლებისკენ მოუწოდა
ერთი დღით ადრე ევროკავშირისა და აზერბაიჯანის საგარეო საქმეთა სამინისტროს შორის დაპირისპირება მოხდა.
ევროკავშირმა აზერბაიჯანს მოუწოდა, პატივი სცეს ახალგაზრდა პოლიტოლოგის, ბაჰრუზ სამედოვის უფლებებს, რომელიც 23 აგვისტოს სამშობლოს ღალატის ბრალდებით დააკავეს.
ევროკავშირის საგარეო და უსაფრთხოების პოლიტიკის სპიკერმა პიტერ სტანომ Politico-სთვის მიცემულ ინტერვიუში განაცხადა, რომ “დამოუკიდებელი ჟურნალისტები, უფლებადამცველები და სამოქალაქო საზოგადოების წარმომადგენლები აზერბაიჯანში გასული წლიდან იდევნებიან“ და ბაქოს მათი გათავისუფლებისკენ მოუწოდა.
“ბრიუსელი შეშფოთებით აკვირდება ახალგაზრდა მეცნიერის, სამხრეთ კავკასიაში მშვიდობის მომხრე, პრაღის ჩარლზის უნივერსიტეტის დოქტორანტის, ბაჰრუზ სამედოვის საქმეს“, – აღნიშნა სტანომ.
“განცხადებები იმის შესახებ, რომ აზერბაიჯანში ნებისმიერ მოქალაქეს დევნიან პოლიტიკური რწმენის ან იდეების გამო, და რომ სისხლის სამართლის საქმეები მიმდინარეობს იმ პირების წინააღმდეგ, რომლებიც თავს ჟურნალისტად ან უფლებადამცველად წარმოადგენენ, არის პოლიტიკურად მოტივირებული, ფუნდამენტურად მცდარი და მიუღებელი“, – განაცხადა აიხან ჰაჯიზადემ სტანოს განცხადების საპასუხოდ.
აზერბაიჯანის საგარეო საქმეთა სამინისტროს წარმომადგენელმა აღნიშნა, რომ “დაკავებულ პირთა საქმეების განხილვა რიგ სისხლის სამართლის გამოძიებასთან დაკავშირებით, როგორიცაა სახელმწიფო ღალატი, გარკვეული სახის საქმიანობის უკანონო დაფინანსება, უკანონო ფინანსური ოპერაციები და ა.შ. მიმდინარეობს შესაბამისი სისხლის სამართლის საპროცესო კანონის მოთხოვნების ფარგლებში და პროცესი სრულიად გამჭვირვალეა“.
ექსპერტი: “დასავლეთი არასწორ დასასრულამდე მივიდა“
JAMnews-ის აზერბაიჯანულმა გამოცემამ პოლიტიკურ დამკვირვებელს, ჰაჯი ნამაზოვს სთხოვა კომენტარი გაეკეთებინა ევროსტრუქტურებსა და აზერბაიჯანს შორის ბოლო დაპირისპირებაზე.
“ეს არ არის პირველი შემთხვევა, როცა ევროსტრუქტურებსა და ოფიციალურ ბაქოს შორის არასასიამოვნო განცხადებები კეთდება და, დიდი ალბათობით, არც უკანასკნელი.
თუ უფრო ჩავუღრმავდებით ურთიერთობების ამ გამწვავების მიზეზებს, აშკარაა, რომ ევროპა, რბილად რომ ვთქვათ, არცთუ უცოდველია ამ “იდილიაში.”
აზერბაიჯანში ჟურნალისტების, უფლებადამცველების და სამოქალაქო აქტივისტების დაპატიმრებები 2023 წლის შემოდგომაზე არ დაწყებულა, მაგრამ რატომღაც, ევროპულმა სტრუქტურებმა დაიწყეს მსგავს ფაქტებთან დაპირისპირება მას შემდეგ, რაც ბაქომ აღადგინა სუვერენიტეტი ქვეყნის მთელ საერთაშორისოდ აღიარებულ ტერიტორიაზე – სწორედ ამის შემდეგ დაიწყო დასავლეთმა ორმაგი თამაშის თამაში.
ბოლოს და ბოლოს, პოლიტიკისგან შორს მყოფი ადამიანისთვისაც კი გასაგებია: აზერბაიჯანის მისიისთვის მანდატის ჩამორთმევა ევროპის საბჭოს საპარლამენტო ასამბლეაში არ არის დაკავშირებული ქვეყანაში ადამიანის უფლებების დარღვევასთან. იმიტომ, რომ აქამდე ევროპის საბჭოს დეპუტატებისგან ამაზე მინიშნებაც კი არ გვინახავს.
ევროპულმა სტრუქტურებმა თავიანთ განცხადებებში დაიწყეს ყარაბაღში დაკავებული სეპარატისტების და ომის დამნაშავეების უფლებების გათანაბრება იმ ჟურნალისტებისა და აქტივისტების უფლებებთან, რომლებიც არ აწყობს მთავრობას.
მოკლედ რომ ვთქვათ, დასავლეთი არასწორ დასასრულამდე მივიდა. აუცილებელია დაპატიმრებული ჟურნალისტების, უფლებადამცველებისა და აქტივისტების დარღვეული უფლებების დაცვა, მაგრამ რა შუაშია ეს იმ ადამიანებთან, რომლებიც 30 წლის განმავლობაში აწარმოებდნენ შეიარაღებულ ბრძოლას ქვეყნის ცენტრალური ხელისუფლების წინააღმდეგ, რამაც გამოიწვია ათასობით ადამიანის მკვლელობა?
ევროპელმა პოლიტიკოსებმა თავიანთი არასრულფასოვანი განცხადებებით აშკარა კოზირი მისცეს ოფიციალური ბაქოს, რომელსაც აზერბაიჯანის მთავრობა იყენებს ყველა შესაძლო შემთხვევაში.“
