"ოცნებამ" საარჩევნო სიის პირველი ოცეული წარადგინა
მმართველმა პარტიამ – “ქართულმა ოცნებამ” – 2020 წლის საპარლამენტო არჩევნებისთვის პროპორციული საარჩევნო სიის ოცეული წარადგინა.
სიის პირველი ნომერი არა პარტიის ლიდერი – ბიძინა ივანიშვილი, არამედ მოქმედი პრემიერ-მინისტრი, გიორგი გახარიაა. ის არის მმართველი პარტიის პრემიერ-მინისტრობის კანდიდატიც.
სიაში ასევე არიან: პარლამენტის თავმჯდომარე, არჩილ თალაკვაძე და პარლამენტის ყოფილი თავმჯდომარე, ირაკლი კობახიძე.
საარჩევნო კოდექსი მოითხოვს, რომ პარტიულ სიაში ყოველი მეოთხე ქალი იყოს. ამიტომ ოცეულში 5 ქალია.
სიის პირველი ოცეული ასეთია:
● გიორგი გახარია – საქართველოს პრემიერ-მინისტრი
● არჩილ თალაკვაძე – საქართველოს პარლამენტის თავმჯდომარე
● ირაკლი კობახიძე – მმართველი გუნდის წევრი, დეპუტატი
● თეა წულუკიანი – იუსტიციის მინისტრი
● მამუკა მდინარაძე – “ქართული ოცნების” ერთ-ერთი ლიდერი, დეპუტატი
● კახა კუჭავა – პარლამენტის თავმჯდომარის მოადგილე
● გიორგი კახიანი – პარლამენტის ვიცე-სპიკერი
● მარიამ ქვრივიშვილი – ტურიზმის ეროვნული ადმინისტრაციის ხელმძღვანელი
● მიხეილ სარჯველაძე – იუსტიციის მინისტრის მოადგილე
● მაია ბითაძე – თბილისის მერის მოადგილე
● მიხეილ დაუშვილი – ბიზნესომბუდსმენი
● გიორგი ამილახვარი – თბილისის ღია უნივერსიტეტის რექტორი და ასოცირებული პროფესორი
● ვიქტორ სანიკიძე – საქართველოს საკალათბურთო ნაკრების ყოფილი წევრი
● მაკა ბოჭორიშვილი – ევროკავშირში, ბელგიასა და ლუქსემბურგში საქართველოს ელჩის მოადგილე
● შალვა პაპუაშვილი
● დავით კაჭარავა – საქართველოს მორაგბეთა ეროვნული ნაკრების წევრი
● ნიკოლოზ სამხარაძე – საერთაშორისო ურთიერთობების სპეციალისტი
● გიორგი ხელაშვილი – საქართველოს პარლამენტის კვლევითი ცენტრის დირექტორი
● მარიამ ლაშხი – საქართველოს ინოვაციებისა და ტექნოლოგიების სააგენტოს თავმჯდომარის მოადგილე
● ბექა დავითულიანი – თბილისის მუნიციპალიტეტის საკრებულოს წევრი “ქართული ოცნებიდან”
• რუსი ოლიგარქის, ივანიშვილის მოსვლის შემდეგ საქართველომ რეგრესი განიცადა – კონგრესმენების წერილი მაიკ პომპეოს
ოპოზიცია აცხადებს, რომ ამ სიით ბიძინა ივანიშვილმა ფსონი ისევ იმ ხალხზე დადო, ვინც მისადამი მონური მორჩილებით გამოირჩევა და ეს ნიშნავს იმას, რომ მმართველი პარტიის გამარჯვების შემთხვევაში ქვეყანაში არაფერი შეიცვლება.
“ამ სიის წარდგენა ნიშნავს, რომ ეს ქვეყანა დარჩება კორუფციის ჭაობში. იპარპაშებს ისევ ფარცხალაძე და წილებს წაართმევს ყველა ბიზნესმენს. ხალხი თუ რამეს გააპროტესტებს და გამოვა ქუჩაში, თვალებს დათხრიან ისე, რომ ხელი არ აუკანკალდება გახარიას და არაფერი არ შეიცვლება ამ ქვეყანაში,” – ამბობს პარტია “მოქალაქეების” ლიდერი, ალეკო ელისაშვილი.
„განმეორდება ის, რაც მოხდა 2016 წელს. შემოდიან ახალი სახეები ძალიან ლამაზები და მერე გადიან 4 წლის შემდეგ ტალახიანები. აი, ამ ქვაბში იხარშება ყველა ერთი პრინციპით – მორჩილება, მორჩილება და მორჩილება, ივანიშვილის დავალებების შესრულება. 2016-ში ბატონმა ბიძინამ განაცხადა, რომ ინგლისურის მცოდნეები ეყოლებათ ბევრი ახალი სახე, მართლაც შემოიყვანეს და ახლა ნახეთ, როგორ დაძველდნენ და ამორტიზდნენ ის ახალი სახეები, გაცვდნენ და რეპუტაცია შელახულები გახდნენ… მეცოდებიან ახალი სახეები, რომლებიც რიგითი პაიკები იქნებიან ისევე, როგორც ძველი სახეები“, – ამბობს “ნაციონალური მოძრაობის” ლიდერი, რომან გოცირიძე.
„როგორც არ უნდა დაკომპლექტდეს “ქართული ოცნების” სია, ნათელია, რომ ამ სიაში იქნებიან ის პოლიტიკური ლიდერები, რომელთა პასუხისმგებლობაცაა ქვეყანაში შექმნილი უმძიმესი ეკონომიკური კრიზისი. რა თქმა უნდა, იქნებიან ნულოვანი წონის მქონე ახალი სახეები, რომელთა ერთადერთი ამოცანა იქნება ამ სიის გაფერადება და სიახლის ილუზიის შექმნა, მაგრამ ეს ილუზია ვერ მოაგვარებს კრიზისს, ვერ წაიყვანს ქვეყანას წინ.
გამოსავალი არის მხოლოდ ერთი, მთლიანად ამ გუნდზე უარის თქმა და ამ არჩევნების გამოყენება იმისთვის, რომ ქვეყანაში დადგეს გარდამტეხი ცვლილებები,“ – აცხადებს ევროპული საქართველოს ლიდერი, დავით ბაქრაძე.
„რა მნიშვნელობა აქვს, ვინ იქნება „ქართული ოცნების“ სიაში, ნუთუ რამეს ელოდება ხალხი გუნდისგან, რომელმაც 8 წლის მანძილზე არც ერთი დაპირება არ შეასრულა. საერთოდ რა ფასი აქვს მათ გამოსვლებს? ერთადერთი, რასაც აქვს ფასი, ეს დღევანდელი პრემიერ-მინისტრის ქვეცნობიერი წამოცდენაა: „მორჩა ახლა ფულის კეთება, საქმე დავიწყოთო“. „კუზიანს სამარე გაასწორებს“ – ეს გამოთქმა ყველასთვის ცნობილია. ეს ხალხი ამ ქვეყანაში არაფრის გამკეთებლები არ არიან,” – ამბობს “სტრატეგია აღმაშენებელის” ლიდერი, გიორგი ვაშაძე.
2020 წლის 8 მარტს, ხელისუფლებასა და ოპოზიციას შორის მიღწეული შეთანხმების თანახმად, ოქტომბრის საპარლამენტო არჩევნები 120/30 მოდელით ჩატარდება: ამომრჩეველი 120 დეპუტატს პროპორციული წესით აირჩევს, ხოლო 30-ს – მაჟორიტარულ ოლქებში.
შეთანხმების მიხედვით, საარჩევნო ბარიერი ერთპროცენტიანი იქნება: იმისთვის, რომ პოლიტიკური პარტია პარლამენტში მოხვდეს, მან ამომრჩეველთა ხმების 1% უნდა მიიღოს, პოლიტიკური პარტიების ბლოკმა კი ამომრჩეველთა ხმების იმდენი 1%, რამდენი პარტიაც არის მასში გაერთიანებული: თუ ბლოკი 5 პარტიისგან შედგება, მაშინ მან პარლამენტში მოსახვედრად ამომრჩეველთა ხმების 5% უნდა მიიღოს.
გარდა ამისა, გაჩნდა ე. წ. “ჩამკეტი”. პარტიას ან საარჩევნო ბლოკს, რომელსაც ამომრჩევლის 40 პროცენტზე ნაკლები დაუჭერს მხარს, ერთპარტიული მთავრობის დაკომპლექტების უფლება აღარ ექნება.
