ჟურნალისტთა დაცვის კომიტეტმა (CPJ) “მთავარი არხის” დამფუძნებელს ნიკა გვარამიას პრესის თავისუფლების საერთაშორისო ჯილდო მიანიჭა. გვარამია საერთაშორისო ორგანიზაციის ყოველწლიური ჯილდოს 4 გამარჯვებულს შორის მოხვდა.
2023 წელს ჯილდო გადაეცემათ ჟურნალისტებს: შაჰინა კ.კ-ს (ინდოეთი), მარია ტერესა მონტანოს (მექსიკა), ფერდინანდ აიიტეს (ტოგო) და ნიკა გვარამიას (საქართველო). ჯილდოს დაწესებიდან, 1992 წლიდან, ნიკა გვარამია პირველი ქართველი ჟურნალისტია ვინც პრესის თავისუფლების საერთაშორისო ჯილდო მოიპოვა.
“პრესაზე თავდასხმები იზრდება, თუმცა ჟურნალისტები განაგრძობენ აქტიურობას და სასიცოცხლო მნიშვნელობის საკითხების გაშუქებას, რომლებიც ყველას ძალას გვმატებ. ჩვენთვის პატივია, რომ ამ წლის გამარჯვებულები ვაღიაროთ: შესანიშნავი რეპორტიორები, ვინც, მათი გაჩუმებისთვის მნიშვნელოვანი ძალისხმევის მიუხედავად, დაუღალავად მუშაობენ, რათა გამოავლინონ კორუფცია, ძალადობა და არასწორი ქმედებები”, – განაცხადა CPJ-ის პრეზიდენტმა ჯოდი გინსბერგმა.
თავად გვარამიას დახასიათებაში კი ვკითხულობთ:
“გვარამია ცნობილი იყო მმართველი პარტიის, ქართული ოცნების მწვავე კრიტიკით. მისი გადაცემა ხშირად მოიცავდა გამოძიებას, რომელიც ამხილებდა ხელისუფლების სავარაუდო კორუფციას, ძალადობას და აშუქებდა საქართველოს ხელისუფლების პრორუსულ მიმართულებას. მან 2023 წლის ივნისში პრეზიდენტის შეწყალებამდე წელიწადზე მეტი გაატარა ციხეში მისჯილი 3.5 წლიდან. გვარამია ბრალდებებს უარყოფდა და ის ფართოდ გამოცხადდა, როგორც პოლიტიკურად მოტივირებული. გვარამია ერთადერთი ჟურნალისტია საქართველოში, რომელსაც საქმიანობის გამო პატიმრობა მიუსაჯეს მას შემდეგ, რაც CPJ-მ 1992 წელს დაიწყო დაკავებული ჟურნალისტების აღრიცხვა.”
ნიკა გვარამია 2022 წლის 16 მაისს, სასამართლო დარბაზში დააპატიმრეს. კრიტიკული მედიის ხელმძღვანელს სამი წლით და ექვსი თვით თავისუფლების აღკვეთა მიესაჯა ეპიზოდზე, რომელშიც მას სამსახურებრივი მანქანის ოჯახის საჭიროებებისთვის გამოყენებას ედავებიან.
საქართველოს პრეზიდენტმა, სალომე ზურაბიშვილმა ნიკა გვარამიას შეწყალების აქტს ხელი 2023 წლის 22 ივნისს მოაწერა. პრეზიდენტის თქმით, ის არ აპირებს, გადაწყვეტილების თაობაზე ახსნა-განმარტების გაკეთებას, რადგან შეწყალება მისი დისკრეციული უფლებაა.
“მთავარი არხის” დამფუძნებლის საქმე მოხვდა ამერიკის სახელმწიფო დეპარტამენტის ბოლო ანგარიშშიც. დოკუმენტის ქვეთავებში, რომლებიც პოლიტიკურ პატიმრებსა და გამოხატვის თავისუფლება ეხება, საუბარია მთავარი არხის გენერალური დირექტორი, ნიკა გვარამიას დაკავების შესახებ.
თეთრი სახლი Amnesty International-ზე დაყრდნობით წერს, რომ გვარამიას საქმემ გამოავლინა “მთავრობის მზარდი გავლენა სასამართლოებზე რიგ საქმეებში”, რომლებიც მიზნად ისახავს მათი კრიტიკოსებისა და ოპონენტების დათრგუნვას.
