“მთავარი არხის” დამფუძნებელი ნიკა გვარამია სოციალურ ქსელში განცხადებას ავრცელებს, რომელშიც ამბობს, რომ პოლიტიკაში მოდის და მომხრეა ფართო პოლიტიკური გაერთიანების, რომელიც იბრძოლებს გამარჯვებისთვის. მისი თქმით, პოლიტიკური მიზნების მისაღწევად მზადაა, “ყველას” დაელაპარაკოს.
ოპოზიციონერმა დეპუტატმა და პარლამენტის ფრაქცია “ნაციონალური მოძრაობის” ყოფილმა თავმჯდომარემ, ხატია დეკანოიძემ ჟურნალისტებთან საუბარში დაადასტურა, რომ კონსულტაციები აქვს როგორც ნიკა გვარამიასთან, ასევე “ნაციონალური მოძრაობის” ყოფილ თავმჯდომარესთან ნიკა მელიასთან, რომელიც თებერვალში ასევე ახალი პარტიის დაფუძნებას აპირებს.
ამ საკითხზე ნიკა გვარამიამ 30 დეკემბერს “კვირის ფორმულას” ეთერშიც ისაუბრა და თქვა, რომ “ნაციონალური მოძრაობის” ყოფილ თავმჯდომარესთან პოლიტიკური პარტნიორობის საკითხი განიხილება. თუმცა მელიას გუნდის წევრები არ ადასტურებენ იმას, რომ მათ საუბარი აქვთ სხვა პოლიტიკურ პარტიებთან. ისინი აცხადებენ, რომ ამ ეტაპზე კონსულტაციები მხოლოდ კონკრეტულ პირებთან მიმდინარეობს.
ნიკა გვარამიას განცხადება
“ბევრმა მედიამ დამირეკა სამომავლო პოლიტიკურ კონფიგურაციებთან დაკავშირებით. ინტერვიუსთვის ხელმისაწვდომი არ ვარ და ამიტომ აქ დავწერ:
მე ვარ მომხრე ფართო გაერთიანების, რომელიც იბრძოლებს გამარჯვებისთვის. 5%იანი ბარიერის დაძლევა, ათკაციანი, გინდაც ოცკაციანი საპარლამენტო ფრაქცია, სრულიად უინტერესოა ჩემთვის. პირადად მე, მზად ვარ ყველანაირი დათმობისთვის ერთობის მიღწევის მიზნით, მათ შორის, ცალმხრივი დათმობისთვისაც, სხვას თუ კომპრომისებისთვის გამბედაობა, კეთილგონიერება და პირადზე მაღლა საერთო ინტერესის დაყენების პრობლემა ექნება.
მე მაინტერესებს ცვლილებები და სიახლეები. თანამდებობებიც მქონია და გავლენაც. ამისთვის პოლიტიკაში მობრუნება ნამდვილად არ მჭირდება.
პოლიტიკაში მოვდივარ იმიტომ, რომ ერთად შევცვალოთ.
პოლიტიკაში მოვდივარ იმიტომ, რომ დემოკრატია და თავისუფლება ერთხელ და სამუდამოდ და შეუქცევადად მოვიპოვოთ.
პოლიტიკაში მოვდივარ იმიტომ, რომ ქვეყნის მართვაში გზა გავუხსნათ ახალ ხალხს და პოლიტიკურ ელიტაში თაობათა ცვლა მაქსიმალურად დაჩქარდეს.
პოლიტიკაში მოვდივარ იმიტომ, რომ არ იყოს შურისძიება.
პოლიტიკაში მოვდივარ იმიტომ, რომ ეს საჭირო მგონია აქ და ახლა.
პოლიტიკაში მოვდივარ იმიტომ, რომ საერთო ბრძოლა გავაძლიერო.
შეკითხვაზე, “ამ მიზნების მისაღწევად ვის ველაპარაკები ან დაველაპარაკები”, გპასუხობთ:
ნიკა გვარამია 2022 წლის 16 მაისს, სასამართლო დარბაზში დააპატიმრეს. კრიტიკული მედიის ხელმძღვანელს სამი წლით და ექვსი თვით თავისუფლების აღკვეთა მიესაჯა ეპიზოდზე, რომელშიც მას სამსახურებრივი მანქანის ოჯახის საჭიროებებისთვის გამოყენებას ედავებიან.
საქართველოს პრეზიდენტმა, სალომე ზურაბიშვილმა ნიკა გვარამიას შეწყალების აქტს ხელი 2023 წლის 22 ივნისს მოაწერა. პრეზიდენტის თქმით, ის არ აპირებს, გადაწყვეტილების თაობაზე ახსნა-განმარტების გაკეთებას, რადგან შეწყალება მისი დისკრეციული უფლებაა.
“მთავარი არხის” დამფუძნებლის საქმე მოხვდა ამერიკის სახელმწიფო დეპარტამენტის ბოლო ანგარიშშიც. დოკუმენტის ქვეთავებში, რომლებიც პოლიტიკურ პატიმრებსა და გამოხატვის თავისუფლება ეხება, საუბარია მთავარი არხის გენერალური დირექტორი, ნიკა გვარამიას დაკავების შესახებ.
თეთრი სახლი Amnesty International-ზე დაყრდნობით წერს, რომ გვარამიას საქმემ გამოავლინა “მთავრობის მზარდი გავლენა სასამართლოებზე რიგ საქმეებში”, რომლებიც მიზნად ისახავს მათი კრიტიკოსებისა და ოპონენტების დათრგუნვას.
2023 წლის 29 ივნისს ჟურნალისტთა დაცვის კომიტეტმა (CPJ) ნიკა გვარამიას პრესის თავისუფლების საერთაშორისო ჯილდო მიანიჭა. გვარამია საერთაშორისო ორგანიზაციის ყოველწლიური ჯილდოს 4 გამარჯვებულს შორის მოხვდა.
