NDI-ს ახალი კვლევა: მთავარი მიგნებები და ტენდენციები
ოქტომბრის თვითმმართველობის არჩევნებამდე ორი თვით ადრე, ეროვნულ-დემოკრატიულმა ინსტიტუტმა (NDI) გამოაქვეყნა ახალი სოციოლოგიური კვლევის შედეგები.
საველე სამუშაოები 13-25 ივლისს სატელეფონო გამოკითხვის მეთოდით ჩატარდა. რესპონდენტები მარტივი შემთხვევითი გზით – შემთხვევით ნომერზე დარეკვის მეთოდით შეირჩნენ. კვლევაში გამოყენებულია 2 016 დასრულებული ინტერვიუ. საშუალო ცდომილების ზღვარი +/- 1.3% -ია, თუმცა, NDI აღნიშნავს, რომ ცდომილების ზღვარი იცვლება სხვადასხვა კითხვის მიხედვით.
მთავარი მიგნებები, რაც კვლევამ აჩვენა:
ვაქცინაცია და კორონავირუსი
კვლევის მიხედვით, მოსახლეობის 47% კორონავირუსის ვაქცინას არ გაიკეთებდა, 35% კი აიცრებოდა.
კითხვაზე, გაიკეთებდით თუ არა ვაქცინას/აცრას, პასუხები შემდეგნაირად ნაწილდება:
- 35% – დიახ, ავიცრებოდი
- 47% – არა, არ ავიცრებოდი
- 7% – უკვე ავიცერი
- 11% – არ ვიცი
საგულისხმოა ისიც, რომ გამოკითხულთა 42%-ს თქმით, COVID 19-ის ვაქცინაციის პროცესზე საკმარისი ინფორმაცია არ აქვს. 54% თვლის, რომ ისინი საკმარის ინფორმაციას ფლობენ, 4%-მა კი არ იცის.
NDI-ის კვლევით ვიგებთ, რომ თბილისში მცხოვრები მოქალაქეები უფრო ინფორმირებულები არიან ვაქცინაციის პროცესის შესახებ, ვიდრე რეგიონებში მცხოვრებლები.
ასევე ყურადსაღებია ის ფაქტი, რომ მოსახლეობის 56%-მა საჭიროების შემთხვევაში არ იცის, როგორ დარეგისტრირდეს ვაქცინაციის ონლაინ პლატფორმაზე. 42% კი ამბობს, რომ საჭიროების შემთხვევაში საიტზე დარეგისტრირებას შეძლებს.
რაც შეეხება ვაქცინაციის პროცესს: მოსახლეობის 45% თვლის, რომ ვაქცინაციის პროცესი ცუდად მიდის, 37% მიიჩნევს, რომ პროცესი კარგად მიდის, 18% პასუხობს, რომ არ იცის.
თბილისის მოსახლეობა ვაქცინაციის პროცესს უფრო კრიტიკულად აფასებს – დედაქალაქის მოსახლეობის 54%-ის აზრით, პროცესი ცუდად მიდის.
დასახლების, ასაკის, სქესისა და პარტიული მხარდაჭერის მიხედვით, კვლევის შედეგები შემდეგნაირად ნაწილდება:
მოსახლეობის მთავარი პრობლემები
გამოკითხულთა უდიდესი ნაწილი, 59% თვლის, რომ ქვეყნის ყველაზე დიდი ეკონომიკური პრობლემა უმუშევრობაა. მოსახლეობის 42% კი მთავარ პრობლემად ფასების ზრდას, ანუ ინფლაციას ასახელებს.
გამოკითხულთა 19% მთავარ ეკონომიკურ გამოწვევად სიღარიბეს, 17% – ლარის გაუფასურებას, 16% – დაბალ ხელფასებს, 12% კი – მაღალ გადასახადებს ასახელებს.
გამოკითხულთა 68% თვლის, რომ პანდემიამდელ პერიოდთან შედარებით ნაკლები რაოდენობის პროდუქტებისა და სერვისების შეძენის შესაძლებლობა აქვს.
მხოლოდ 2% მიიჩნევს, რომ COVID-19 პანდემიის შემდეგ მათი ფინანსური შესაძლებლობები გაიზარდა.
________________________________________________
● უმაღლესი განათლების მქონე ადამიანების თითქმის 38 პროცენტი უმუშევარია
_________________________________________________
პოლიტიკური პარტიები და არჩევნები
თვითმართველობის არჩევნებამდე ორი თვით ადრე,70%-მა არ იცის ან არ ასახელებს, რომელი პარტია დგას მის შეხედულებებთან ყველაზე ახლოს.
ხოლო კითხვაზე, ხვალ რომ ადგილობრივი თვითმმართველობის არჩევნები ტარდებოდეს, მასში მოსახლეობის 61% მიიღებდა მონაწილეობას.
რაც შეეხება პოლიტიკურ პარტიებს: მოსახლეობის მხოლოდ 30% ასახელებს კონკრეტულ პარტიას, 51% ამბობს, რომ მის შეხედულებებთან ახლოს არცერთი პარტია არ დგას, ხოლო 19%-მა არ იცის, ან უარს ამბობს პასუხზე.
იმ ადამიანებიდან, ვინც ასახელებს რომელ პარტიას მისცემდა ხმას, 18% ამბობს, რომ ხმას “ქართულ ოცნებას” მისცემდა, ხოლო 6% – “ერთიან ნაციონალურ მოძრაობას” და ამდენივე სხვა პარტიას.
NDI კვლევის ამ ნაწილში აზუსტებს, რომ პარტიების მხარდაჭერის ინდივიდუალური მაჩვენებლები იმდენად დაბალია, რომ არჩევნების შედეგების გამოსაცნობად ვერ გამოდგება.
“ამ გამოკითხვისა და არჩევნების შედეგები მნიშვნელოვნად განსხვავებული იქნება, რადგან არჩევნების ბედი გადაუწყვეტელი ამომრჩევლის ქცევაზე იქნება დამოკიდებული”, – წერია ანგარიშში.
________________________________________________
● “ქართული ოცნება” შარლ მიშელის შეთანხმებიდან გადის. რას ნიშნავს ეს?
● მელია თბილისის მერად, ხოშტარია – საკრებულოს თავმჯდომარედ. ოპოზიციამ კანდიდატები წარადგინა
_________________________________________________
აღსანიშნავია ისიც, რომ საქართველოს პარლამენტის მუშაობას გამოკითხულთა 47 % ცუდად აფასებს, 10% – კარგად, 33 კი – საშუალოდ.
გამოკითხულთა 55% ამბობს, რომ პარლამენტი მათთვის მნიშვნელოვან საკითხებზე კანონებს არ იღებს. მხოლოდ 24 % თვლის, რომ პარლამენტარები მოქალაქეებს რეგულარულად ეკონტაქტებიან. 54%-ს კი არ სჯერა, რომ, თუ პარლამენტარს პრობლემაზე ეტყვის, ის მის გადაჭრას შეეცდება.
დემოკრატია და ქვეყნის განვითარება
კვლევის თანახმად, საქართველოს მოსახლეობის 51% თვლის, რომ ქვეყანაში დემოკრატია არ არის.
კითხვაზე, თქვენი აზრით, საქართველოში ამჟამად არის თუ არა დემოკრატია – პასუხები შემდეგნაირად ნაწილდება:
- 51% – არა
- 35% – კი
- 13% – არ ვიცი
აღსანიშნავია ისიც, რომ მოსახლეობის 49%-ს მიაჩნია, რომ საქართველო არასწორი მიმართულებით ვითარდება, 23% თვლის, რომ ქვეყანა სწორი მიმართულებით ვითარდება, ხოლო 19% მიიჩნევს, რომ საქართველო საერთოდ არ იცვლება.
შედარებისთვის, 2020 წლის აგვისტოში NDI-ის კვლევის თანახმად, მოსახლეობის 32% თვლიდა, რომ ქვეყანა არასწორი მიმართულებით ვითარდება
საგარეო პოლიტიკა
კვლევის მიხედვით, საქართველოს მოსახლეობის 76% ევროკავშირში გაწევრიანებას მხარს უჭერს, ნატოში გაწევრიანებას კი 74% ემხრობა.
ასევე, 11%-ისთვის მიუღებელია ქვეყნის ევროკავშირში გაწევრიანება და 11% არ ემხრობა საქართველოს ნატოს წევრობას.
______________________________________________
● საქართველო ნატოს წვრთნებისთვის ემზადება
______________________________________________
მედია
NDI-ის კვლევის ერთ-ერთი მთავარი მიგნება არის ის, რომ სოციალური მედია, როგორც ინფორმაციის ძირითადი წყარო, 2014 წლის შემდეგ 27%-ით გაიზარდა.
2014 წელს, სოცმედია ინფორმაციის ძირითადი წყარო მოსახლეობის მხოლოდ 8%-ისთვის იყო, ხოლო დღეს გამოქვეყნებული კვლევის მიხედვით, მოსახლეობის 35% მიიჩნევს სოციალურ მედიას ინფორმაციის მიღების მთავარ წყაროდ. სოციალური მედია ინფორმაციის მიღების მეორე წყარო, მოსახლეობის 26 პროცენტისთვისაა.
რაც შეეხება ტელევიზიას, NDI-ის კვლევის მიხედვით, მოსახლეობის 57%-ისთვის ინფორმაციის მიღების პირველი წყარო ისევ ტელევიზიაა. 4%-ისთვის მეგობრები და მეზობლები, 2%-ისთვის ოჯახის წევრები, ხოლო 1%-ისთვის თანამშრომლები.
თბილისში ტელევიზია ინფორმაციის მიღების პირველი წყაროა მოსახლეობის 42%-ისთვის, ინტერნეტი/სოციალური მედია – 51%-ისთვის.
________________________________________________
