covid-19-ის იმპორტირებული შემთხვევების 46.6% რუსეთზე მოდის
დაავადებათა კონტროლის ეროვნული ცენტრის (NCDC) ანგარიშის მიხედვით, რომელიც საქართველოში 11 ივლისისთვის არსებულ კოვიდინფექციის ეპიდემიოლოგიურ მდგომარეობას ასახავს, covid-19-ის შემოტანილი შემთხვევების ყველაზე დიდი წილი – 46.6% რუსეთზე მოდის.
ინფიცირებულთა შორის 111 სამედიცინო პერსონალი იყო. კორონავირუსის გავრცელება კი საქართველოს რეგიონებს შორის ყველაზე მაღალი ქვემო ქართლში იყო.
საქართველოში კორონავირუსის პირველი დადასტურებული შემთხვევა 2020 წლის 26 თებერვალს გამოვლინდა.
26 თებერვლიდან 11 ივლისამდე covid-19 980 ადამიანს დაუდასტურდა. აქედან 499 (50.9%) იყო კაცი და 481 (49%) – ქალი.
ყველაზე ხანდაზმული პაციენტი 90 წლის იყო, ყველაზე პატარა კი 9 თვის.
covid-19 დაუდგინდა 18 წლამდე ასაკის 105 ბავშვს და მოზარდს (დაავადებულთა 10, 7%).
კორონავირუსის გავრცელება ყველაზე მაღალი იყო ქვემო ქართლსა და თბილისში, ხოლო ყველაზე დაბალი – სამეგრელოში, ზემო-სვანეთსა და იმერეთში.
საქართველოში იმპორტირებული კორონავირუსის შემთხვევების უდიდესი წილი 272 შემთხვევიდან 127, ანუ 46,6% რუსეთზე მოდის.
რუსეთის შემდეგ მოდის თურქეთი – 23 შემთხვევით (8,4%), აზერბაიჯანი – 22 შემთხვევით (8%) და სომხეთი – 21 შემთხვევით (7,7%).
- საქართველო საზღვრებს ხსნის ევროკავშირის ხუთი ქვეყნისთვის. ოღონდ ფრენები არ არის
- PCR-ტესტი, კარანტინი და თვითიზოლაცია – რა უნდა იცოდეთ, თუ საქართველოში შემოსვლას ან საქართველოდან წასვლას აპირებთ
- საქართველოში ჩამოსულ ბიზნესვიზიტორებს მთავრობა 2 ალტერნატივას სთავაზობს: 2-კვირიანი კარანტინი ან PCR-ტესტირება
საქართველოში კორონავირუსით ინფიცირებულთა საერთო რაოდენობის 11,2%-ს სამედიცინო პერსონალია. სულ საქართველოში სამედიცინო მომსახურების მიმწოდებელი კლინიკების თანამშრომელთა დასნეულების 129 შემთხვევა გამოვლინდა. აქედან ერთი, 70 წლის ქალი ქვემო ქართლიდან, გარდაიცვალა.
დაინფიცირებულებს შორის, 111 სამედიცინო პერსონალია – ექიმი, ექთანი ან სანიტარი, 18 კი ტექნიკური პერსონალი. სამედიცინო პერსონალის დაინფიცირების ერთ შემთხვევაში ვირუსი საზოგადოებაში იყო შეძენილი – ანუ ის ადამიანი კლინიკის გარეთ, არასამუშაო გარემოში დაინფიცირდა.
პროფესიული ჯგუფების მიხედვით, შემთხვევების ნახევარზე მეტი ექთნებზე მოდის. სამედიცინო პერსონალის ინფიცირების ყველაზე ბევრი შემთხვევა აპრილში დაფიქსირდა – 17,1%.
სამედიცინო პერსონალის ინფიცირების ყველაზე ბევრი, 57 შემთხვევა კოვიდ კლინიკებშია დაფიქსირებული, სასწრაფო დახმარების სამსახურებში 26 შემთხვევა დაფიქსირდა, არაკოვიდკლინიკებში – 15, სოფლის ამბულატორიებში კი – 2.
სულ რეგისტრირებულია სამედიცინო მომსახურების მიმწოდებელი სამსახურების თანამშრომელთა ჩOVID-19-ით დასნებოვნების 129 შემთხვევა, აქედან 18 – ტექნიკური პერსონალი. .
საქართველოში კორონავირუსის ოფიციალურად დადასტურებული შემთხვევებიდან 11% უსიმპტომო იყო. რაც შეეხება სიმპტომებს, ინფიცირებულებს ყველაზე ხშირად აღენიშნებოდათ ცხელება (54%), ზოგადი სისუსტე (34%) და ხველა (24%) იყო.
გარდა ამისა, ინფიცირებულების 17%-ს აღენიშნებოდა ყელის სიმშრალე/ტკივილი, 14,5%-ს თავის ტკივილი, ხოლო 10,1%-ს სურდო.
სტაციონარებიდან გაწერილ 800 პაციენტს შორის უმეტესი წილი, 69,1% გადაყვანილი იყო საკარანტინე სივრციდან.
