მზია ამაღლობელის მხარდამჭერი მარში. პროტესტი საქართველოში. ვიდეო

მზია ამაღლობელის მხარდამჭერი მარში

თბილისში, გამოცემების “ბათუმელებისა” და “ნეტგაზეთის” დამფუძნებლის, მზია ამაღლობელის მხარდამჭერი მარში გაიმართა. მსვლელობა მარჯანიშვილის მოედნიდან დაიწყო და პარლამენტის წინ დასრულდა. 12 იანვარს მისი დაპატიმრებიდან ერთი წელი შესრულდა.

მზია ამაღლობელი პირველი სინდისის პატიმარი ჟურნალისტი ქალია საქართველოში. იგი 2025 წლის  11-12 იანვრის ღამეს, ბათუმში დააკავეს. ამაღლობელს ორწლიანი პატიმრობა აქვს მისჯილი ბათუმის პოლიციის უფროსისთვის სილის გაწვნის ფაქტზე. ის რუსთავის ქალთა ციხეშია. მზია ამაღლობელი გახდა პროევროპული ბრძოლის სიმბოლო საქართველოში და არაერთი საერთაშორისო ჯილდო მიიღო, მათ შორის, ევროპარლამენტის სახაროვის პრემია.

ერთ წელზე მეტია საქართველოში უწყვეტი საპროტესტო აქციები მიმდინარეობს. აქციის მონაწილეები ყოველ საღამოს იკრიბებიან ქვეყნის დედაქალაქში, თბილისსა და საქართველოს რამდენიმე პატარა ქალაქში.

აქციების მიმდინარეობისას ათობით ადამიანი დააკავეს. ბევრ მათგანს სისხლის სამართლის ბრალდება წაუყენეს და პატიმრობა მიუსაჯეს. პირველად, დამოუკიდებელი საქართველოს ისტორიაში, გვყავს 150-მდე სინდისის პატიმარი, მათ შორის ქალები. დაპატიმრებულია გამოცემების “ბათუმელებისა” და “ნეტგაზეთის” დამფუძნებელი, მზია ამაღლობელი. მას ორწლიანი პატიმრობა აქვს მისჯილი პოლიციელისთვის სილის გაწვნის ფაქტზე.

აქციის მონაწილეები ითხოვენ გათავისუფლდეს ყველა პოლიტიკური პატიმარი, დაინიშნოს ახალი საპარლამენტო არჩევნები, რადგან, 2024 წლის შემოდგომის არჩევნებს ამ დრომდე არ აქვს აღიარება და გაუქმდეს ყველა ის ანტიდემოკრატიული კანონი, რაც ბოლო ორ წელიწადში მიიღო “ქართულმა ოცნებამ”.

პროტესტის ჩასახშობად, “ქართული ოცნება” სულ უფრო ამკაცრებს რეპრესიებს სამოქალაქო საზოგადოებისა და მედიის წინააღმდეგ. თუმცა, უწყვეტი პროტესტი, სხვადასხვა ფორმით, დღემდე გრძელდება.