"მშვიდობის ქალაქი" - თბილისის საახალწლო სლოგანის გამო საპროტესტო აქცია დაანონსდა

მშვიდობის ქალაქი

საქართველოს დედაქალაქ თბილისში საახალწლო სლოგანმა “მშვიდობის ქალაქი” საზოგადოების ნაწილის პროტესტი გამოიწვია და 30 ნოემბერს, საღამოს 9 საათზე, თავისუფლების მოედანზე აქცია დაანონსდა. მოქალაქეების თქმით, იმ დროს, როცა “მეგობარ უკრაინაში ომია” და ადამიანები იხოცებიან, ხელისუფლება “თითქოს ახარბებს” მოძმე ერს მშვიდობას და ეუბნება მოსახლეობას, “ჩვენ რომ არ ვიყოთ, აქაც ომი დაიწყებოდაო.”

მცირერიცხოვანი აქცია გაიმართა თავისუფლების მოედანზე გუშინაც, მას მერე რაც საახალწლო სლოგანი დაანონსდა.

თავად თბილისის მერის, კახა კალაძის თქმით, თბილისის საახალწლო სლოგანში “მშვიდობის ქალაქი” არ იყო ჩადებული არავითარი პოლიტიკური გზავნილი. კალაძემ განაცხადა, რომ გუშინ “გარკვეულმა მედიასაშუალებებმა” სცადეს, სლოგანი “მშვიდობის ქალაქი” წარმოეჩინათ “როგორც ნიშნის მოგება უკრაინელების მიმართ”. კალაძის თქმით, ეს უმძიმესი სპეკულაცია და პროვოკაციაა, რომელსაც “ჩვენი ქვეყნის და ქალაქის მიმართ სიყვარულით განმსჭვალული ადამიანი არასდროს იკადრებს და არასდროს გააკეთებს“.

თბილისის მერის განმარტებით, იმ სიტუაციის ფონზე, რომელიც რეგიონსა და თანამედროვე სამყაროშია შექმნილი, მშვიდობა ის სიკეთეა, რომელიც თბილისელებს, საქართველოს თითოეულ მოქალაქეს 2022-მა წელმა აჩუქა და “რომელსაც დამდეგი 2023 წლისგან ყველა თბილისელი და ყველა ქართველი ისურვებდა”.

თუმცა კალაძეს გვერდი აუვლია პოლიტიკისთვის და ხაზი გაუსვა, რომ “კონკრეტულ ჯგუფს რომ ძალაუფლება დაებრუნებინა [იგულისხმება ნაციონალური მოძრაობა- Jamnews] თბილისი ომის ქალაქი იქნებოდა.”

“ამ ადამიანებმა ვერ შეიკავეს თავი და კიდევ ერთხელ გამოავლინეს საკუთარი რეალური სურვილი. სინამდვილეში მათ მშვიდობის შესახებ არა სრულიად უწყინარი სლოგანი და წარწერა, არამედ, უპირველესყოვლისა, თავად მშვიდობა აღიზიანებთ, სლოგანზე თავდასხმა ამ ყველაფრის გამოვლინება იყო და მეტი არაფერი.” – განაცხადა კალაძემ.

● დედაქალაქის მერი: თუ მაქვს რაიმე დანაშაული, მზად ვარ კანონის წინაშე პასუხი ვაგო
● “ვერანაირ პრობლემას ვერ ვხედავ”- თბილისის მერი რუსეთიდან ვიზიტორების ზრდაზე
● CNBC: საქართველოს ეკონომიკური ბუმი პუტინის ომის შედეგია

გამოხმაურება

დავით დვალი, ტელეკომპანია “რუსთავი 2”-ის დამფუძნებელი:

“ყველაფრის ზღვარი არსებობს! როდესაც გმირი ერი შენს დაუძინებელ მტერს ებრძვის თავგანწირვით, სიცივეს და შიმშილს იტანს ჩვენივე ნათელი მომავლისთვის, “მშვიდობის” ქონით ნიშნის მოგება არის უკიდურესი სიმდაბლე და გარეწრობა!

უკვე ამონტაჟებენ თავისუფლების მოედანზე. ეს წარწერა დაუყოვნებლივ უნდა მოვაშოროთ! ჩვენ, მოქალაქეებმა, რომლებსაც ისედაც ბევრი ქაქი დაგვადო თავგასულმა ხელისუფლებამ!!”

ნინო ჯანგირაშვილი, ტელეკომპანია “კავკასიის” დირექტორი, ჟურნალისტი:

“მარტო ღრჯო და უტაქტო კიარა, ჩლუნგიც უნდა იყო, რომ საახალწლოდ “მშვიდობის ქალაქობით“ მოიწონო თავი მაშინ, როცა:

1. ყურის ძირში ომია
2. საქართველოს მოქალაქეები ამ ომში იღუპებიან
3. საქართველოს დანარჩენები მოქალაქეები გულგაგლეჯილები ადევნებენ თვალს ყოველდღე ბავშვების მკვლელობას
4.მესამე მსოფლიო ომში როდის გადაიზრდება ყველაფერი არავინ იცის
5. არავინ იცის,როდის მოუნდება რუსეთს ჩექმა მოგცხოს, მიუხედავად შენი უთავმოყვარეო გატრუნულობისა.

საშიშია ამათ ხელში ცხოვრება. საშიში და სამარცხვინო.”

ქეთი დევდარიანი, სცენარისტი:

“ჩვენს ქვეყანას დღეს მართავს უზნეო ხამების კარტელი, რომელიც ახალ წელს უკრაინელებს შუქს, გოზინაყს და მშვიდობას შეახარბებს.

კალოშმა დასტარტა უკვე ეს პათოსი.”

გია ნოდია, პოლიტოლოგი:

“ამ ეტაპზე, „ქართული ოცნების“ პიარი დგას დიქოტომიაზე: “ჩვენ ვართ მშვიდობის პარტია, ყველა ჩვენი მოწინააღმდეგე არის ომის პარტია“. ის ტყუილს ემყარება, თუმცა როგორც პიარი ეფექტურია: ადამიანებს, როგორც წესი, მშვიდობა ურჩევნიათ ომს.

მაგრამ ამ, არსებითად, ტყუილზე აგებულ პიარშიც უნდა იყოს რაღაც ზღვარი, რომელსაც არ შეიძლება გადახვიდე. ამ სლოგანით, „თბილისი მშვიდობის ქალაქია“, კახა კალაძე ზღვარს გადავიდა. ერთია, დასავლეთსა და რუსეთს შორის ითამაშო, მეორეა, უკრაინელებს ნიშნი მოუგო: აი კიევში ომია, თბილისში კი არა. ეგეც თქვენ. არსებულ კონტექსტში ამ სლოგანის ამორჩევა მხოლოდ ასეთი ნიშნის მოგებაა.

ამაზე ადეკვატური პასუხი რა უნდა იყოს? მხოლოდ ლანძღვა და გინება. შეგიძლიათ ამ პოსტში ნებისმიერი სახის გინება ჩასვათ.”

გიორგი თაბაგარი, სამოქალაქო აქტივისტი:

ძალიან უხერხულია “მშვიდობის ქალაქი”, თან ძალიან!

რეალობასთან უფრო ახლოს მყოფ სლოგანებს მოგაშველებთ აქვე:

1) ძვირი ქალაქი
2) საშიში ქალაქი
3) საცობებით სავსე ქალაქი
4) რუსებით სავსე ქალაქი
5) სიკვდილის ქალაქი

ცოტა ხნით არაფრის ქალაქი რომ ვიყოთ არ შეიძლება?!”

საბა ბუაძე, თბილისის საკრებულოს წევრი, პარტია “ლელო”:

“მშვიდობის ქალაქი”- ს საახალწლო ნაძვის ხის ქვემოთ დაწერა არის ახალი წლის საზეიმო განწყობის დამახინჯება და მეგობარი ხალხის უბედურების ხაზგასმით პოლიტიკური დივიდენდების მიღების ყველაზე მდაბიო ფორმა.

ვინ დამშვიდდა ამ წარწერის დანახვის შემდეგ? ვინ იგრძნო თავი უკეთესად? ან ვინმეს მართლა ჰგონია რომ ამ ხელისუფლებამ რამე გააკეთა ჩვენ ქვეყანაში უსაფრთხოების და სიმშვიდის უზრუნველყოფისთვის?!

როგორი მერიც გვყავს ზუსტად ისეთი წარწერაა!