მოსაზრება აფხაზეთიდან: რუსეთი სოხუმის სისტემურ კოლონიზაციას ახორციელებს
რუსეთი აფხაზეთს აკონტროლებს
აფხაზეთისა და რუსეთის თანამშრომლობის ახალ ეტაპს აფხაზური მედიაპლატფორმა “აიაშარა“ რამდენიმე გადაწყვეტილების კონტექსტში განიხილავს, როგორც კონტროლირებად ინტეგრაციას – პროცესს, რომელიც, მედიის შეფასებით, აფხაზეთის თანდათანოვან შეყვანას ისახავს მიზნად რუსეთის იურისდიქციაში.
კერძოდ, საუბარია რუსეთის მოქალაქეობის მიღების გამარტივებულ პროცედურასა და რუსეთის ტერიტორიაზე აფხაზური მართვის მოწმობების აკრძალვაზე, რაც პარალელურად გულისხმობს რუსეთის მართვის მოწმობების გაცემას აფხაზეთის ტერიტორიაზე.
- ოკუპირებული აფხაზეთისა და ცხინვალის მცხოვრებთათვის რუსეთის მოქალაქეობის მიღება გამარტივდა
- “ცუდი მოსავალი“: ვინ ან რა არის დამნაშავე აფხაზეთში სასტუმროების ზარალში
„აიაშარას“ შეფასებით, კრემლის ეს ნაბიჯები რუსეთის სტრატეგიის ნაწილია, რომელიც არაპირდაპირ ინტეგრაციას ემსახურება.
როგორც მედია წერს:
რუსეთი მოქმედებს ისე, რომ არ აცხადებს ოფიციალურ ანექსიას, მაგრამ თანდათან იღებს კონტროლს აფხაზეთის სუვერენიტეტის საკვანძო ელემენტებზე – დოკუმენტებზე, საზღვრებზე, უფლებებზე და მმართველობით მექანიზმებზე.
ამ პროცესის პარალელურად:
- ართულებს გადაადგილების ჩვეულ რეჟიმს;
- თუმცა ამარტივებს იდენტობის შეცვლას – კერძოდ, რუსეთის მოქალაქეობის მიღებას.
მედიაპლატფორმის შეფასებით, მიზანი მოსახლეობის იძულება-წახალისებაა, აირჩიონ რუსეთის იურისდიქცია, როგორც ერთადერთი პრაქტიკული გამოსავალი ყოველდღიური ცხოვრებისათვის.
თუ გინდა იმოძრაო, იმუშაო, იცხოვრო – უნდა შეეგუო დამოკიდებულებას. მოსკოვი ამ პროცესში კომფორტს სთავაზობს – ერთგულების ფასად.
ეს, როგორც “აიაშარა“ აღნიშნავს, ტანკების გარეშე მიმდინარე ინფრასტრუქტურული ოკუპაციაა.
- მოსაზრება: კრემლის ახალ კურატორს აშკარად არ მოსწონს აფხაზეთის ხელისუფლების უმოქმედობა
- რუსეთში დაკავებული აფხაზი ოპოზიციონერი ბადრა გუნბას შუამდგომლობის შემდეგ გაათავისუფლეს
მართვის მოწმობები, როგორც იურიდიული იარაღი — სადავო იდენტობის პოლიტიკა აფხაზეთში
აფხაზური მართვის მოწმობების გაუქმება რუსეთის ტერიტორიაზე, როგორც “აიაშარა“ აღნიშნავს, მხოლოდ ტრანსპორტის საკითხს არ ეხება — ეს ნაბიჯი, მათი შეფასებით, უფრო ფართო მიზანს ემსახურება: აფხაზეთის სახელმწიფოს ლეგიტიმაციის გაუქმებას.
მედიის თქმით, მოსკოვი ამ გზით მიანიშნებს:
“თქვენი დოკუმენტები არალეგალურია — მხოლოდ ჩვენი დოკუმენტებია ნამდვილი და სამართლებრივი ძალის მქონე.“
ამავე დროს, რუსეთის მართვის მოწმობების გაცემით უშუალოდ აფხაზეთის ტერიტორიაზე, კრემლი:
- აფიქსირებს რუსეთის იურისდიქციის უშუალო მოქმედებას აფხაზეთის შიგნით;
- ქმნის პარალელურ ადმინისტრაციულ სისტემას;
- აყალიბებს აფხაზეთს როგორც რეგიონულ პროქსი-ზონას რუსეთის გავლენის ქვეშ.
“აიაშარას“ ინტერპრეტაციით, ეს პროცესი წარმოადგენს რბილ კოლონიზაციას — ფორმალური ანექსიის გარეშე, თუმცა მნიშვნელოვანი გავლენით ადამიანების ყოველდღიურ ცხოვრებაზე სრული კონტროლით.
- აფხაზეთში დააკავეს რუსეთის მოქალაქე, რომელიც სოხუმის აეროპორტში ტერაქტს ამზადებდა
- “რატომ არ გვაქვს ჩვენ ამის უფლება?“ – ვინ და როგორ იღებს ბავშვების შემწეობას აფხაზეთში და რა ემუქრებათ მათ
რუსეთის სტრატეგიული მიზნები აფხაზეთში — არაპირდაპირი, მაგრამ თვალსაჩინო
“აიაშარა“ რუსეთ–აფხაზეთის ურთიერთობების გამწვავებულ კონტექსტში ასახელებს რუსეთის პოლიტიკის სამ ძირითად მიზანს, რომლებიც, მათი შეფასებით, გამოკვეთილად ფორმალურ განცხადებებს სცილდება და ღრმა გეოპოლიტიკურ სტრატეგიაზე მიუთითებს:
1. დემოგრაფიული გავლენის გაფართოება
როდესაც აფხაზეთის ტერიტორიაზე მცხოვრები მოქალაქეების რაოდენობა, რომელთაც რუსეთის პასპორტი აქვთ, იზრდება, რუსეთს უფრო მარტივად შეუძლია გავლენის შენარჩუნება — მათ შორის სამხედრო დახმარების უზრუნველყოფის არგუმენტითაც, “საკუთარი მოქალაქეების დაცვის“ ფარგლებში.
2. აფხაზეთის სუვერენიტეტის დაქვეითება
“აიაშარას“ შეფასებით, მოსკოვი ცდილობს, რომ აფხაზეთის სუვერენიტეტი ფორმალურ ნიშნულამდე დაიყვანოს და სოხუმი ფაქტობრივად რუსეთის ფედერალური პროტექტორატი გახდეს — ოფიციალური ანექსიის გარეშე.
3. ალტერნატიული გავლენის არხების დაბლოკვა
დოკუმენტების, იურიდიული მექანიზმებისა და ლეგიტიმაციის არხების კონტროლით, რუსეთი ცდილობს, რომ გამორიცხოს ნებისმიერი სხვა პოლიტიკური თუ ადმინისტრაციული გავლენა, რომელიც აფხაზეთში შესაძლოა გაჩნდეს.
სოხუმის აეროპორტი 30-წლიანი პაუზის შემდეგ გაიხსნა — აფხაზეთში რუსეთის ავიარეისები შესრულდა. ვიდეო
როგორ გავუმკლავდეთ ამას?
1. ინფორმაციული გამჭვირვალობა და საზოგადოების ცნობიერების ამაღლება
- რუსეთის მოქალაქეობა თანდათანობით უარს ნიშნავს ეროვნულ დამოუკიდებლობაზე;
- რუსეთის დოკუმენტები — მართვის ინსტრუმენტია და არა დახმარების ჟესტი;
- მოქალაქეობის მიღების პროცესის გამარტივება შეიძლება იყოს მახე და არა კეთილი ნების გამოხატვა;
- საჭიროა მითი იმის შესახებ, რომ რუსეთი იყენებს აფხაზ ხალხს, გადაისინჯოს და გადაიხედოს.
2. ლეგიტიმაციის პარალელური ინფრასტრუქტურის შექმნა
თუკი აფხაზეთის დამოუკიდებლობის საერთაშორისო აღიარება მოკლევადიან პერსპექტივაში მიუწვდომელია, “აიაშარა“ თვლის, რომ საჭიროა შიდა ნდობის მექანიზმების გაძლიერება და დამოუკიდებელი ადმინისტრაციული სისტემების შექმნა:
- ელექტრონული დოკუმენტაცია და ციფრული სახელმწიფო სერვისები;
- შეთანხმებები მესამე ქვეყნებთან, რომლებიც არ არიან რუსეთის გავლენის ქვეშ;
- პლატფორმები და ინსტიტუციური არხები, რომლებიც არ ეფუძნება რუსულ სისტემებს.
მედიის შეფასებით, სუვერენიტეტი არ არის მხოლოდ დროშა — ის საჭიროებს რეალურ ინსტიტუციურ მხარდაჭერას.
3. შიდა ეკონომიკისა და საზოგადოებრივი სერვისების განვითარება
როგორც “აიაშარა“ აღნიშნავს, რუსეთის მიმართ დამოკიდებულება გაძლიერებულია იმ ფონზე, როდესაც მოსკოვი მეტ მატერიალურ სარგებელს სთავაზობს მოსახლეობას. თუმცა, თუკი აფხაზეთში ამოქმედდება ფუნქციონალური ეკონომიკა და ადგილობრივი სერვისები — ჯანდაცვა, ტრანსპორტი, განათლება — უცხო იურისდიქციაზე დამოკიდებულების მოტივაციაც შესუსტდება.
- რუსეთის უცხოური აგენტები აფხაზეთში | ინალ ხაშიგისა და ასტამურ ტანიას მიმოხილვა
- “საქართველომ უნდა ისწავლოს “კი“-ს თქმა“ – მოსაზრება აფხაზეთიდან
რეზიუმე
მედიის შეფასებით, ეს სტრატეგია ეფუძნება არა სამხედრო, არამედ ადმინისტრაციულ მექანიზმებს:
- იარაღის ნაცვლად – პასპორტები;
- ანექსიის ნაცვლად – “დახმარება“;
- ბრძანების ნაცვლად – “მოხალისეობრივი კომფორტი“.
რუსეთი მოქმედებს გრძელვადიანი სტრატეგიით, რომლის მიზანია:
- აფხაზეთის შიდა ლეგიტიმაციის დაშლა;
- მოქალაქეობის მეშვეობით გავლენის არხების ჩამოყალიბება;
- საკუთარი იურისდიქციის სამართლებრივი ჩარჩოს გაფართოება რეგიონში.
“აიაშარას“ შეფასებით, წინააღმდეგობა შესაძლებელია მხოლოდ იმ შემთხვევაში, თუ უარს ვიტყვით ილუზიებზე და გადავდივართ სისტემურ თამაშზე — არა მხოლოდ მოწოდებებით, არამედ პრაქტიკული მექანიზმებითა და ინსტიტუციური ნაბიჯებით.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
