მკვლელობა, დარბევები და კრიმინალური გარჩევები - რა ხდება სამხრეთ საქართველოში
ხელისუფლებამ სამცხე-ჯავახეთის რეგიონსა და ადგილობრივ კრიმინალურ ჯგუფებზე კონტროლი დაკარგა – ასე აფასებს ოპოზიცია საქართველოს სამხრეთში, ძირითადად ეთნიკურად სომხებით დასახლებულ ახალქალაქში განვითარებულ საგანგებო მოვლენებს.
ბევრი ადგილობრივი მცხოვრების თქმით, სიტუაცია იმდენად კრიმინალიზებულია, რომ თავს უსაფრთხოდ ვეღარ გრძნობენ.
8 აგვისტოს, აქ, რამდენიმე შენობა გაანადგურეს და დაწვეს – ეს მას შემდეგ მოხდა, რაც ქალაქის ცენტრში, ადგილობრივი, 27 წლის მამაკაცი მოკლეს ცეცხლსასროლი იარაღიდან გასროლით.
![](https://jam-news.net/app/uploads/2020/08/50205032993_ebcfbd1352_c.jpg)
ახლა ქალაქსა და რაიონში სიმშვიდეა. შესასვლელ-გასასვლელებს პოლიცია აკონტროლებს.
თუმცა, ადგილობრივები საუბრობენ იმის შესახებ, რომ კრიმინალური გარჩევები აქ ყოველდღიურობად იქცა და ბევრს აქვს ცეცხლსასროლი იარაღი.
დანაშაულის ზრდა გამოიწვია დაუსჯელობის სინდრომმა და შერჩევითმა სამართალმა – მიაჩნია ოპოზიციას და ამ მოსაზრებას ბევრი ადგილობრივიც ეთანხმება.
რა მოხდა?
8 აგვისტოს, დაახლოებით, საღამოს 19:00 საათზე, ახალქალაქის ცენტრში, სოფელ კულიკამის მკვიდრი, 27 წლის ვარდან მირანიანი მოკლეს. მას პირდაპირ ქუჩაში გაუხსნეს ცეცხლი.
მანამდე, ქალაქის ცენტრში, პოპულარულ პარკში, იმ დროს, როდესაც იქ ბევრი ადამიანი ბავშვებთან ერთად იმყოფებოდა, ახალგაზრდების ორ ჯგუფს შორის მოხდა დაპირისპირება, რომლის დროსაც გამოიყენეს ხელკეტები და ცეცხლსასროლი იარაღები.
კონფლიქტში, დაახლოებით, 10-12 ადამიანი მონაწილეობდა. შემდეგ, იქაურობას მიუახლოვდა Mercedes-ის მარკის ავტომობილი, პირდაპირ ხალხის შუაგულში გაჩერდა, რის შემდეგაც სროლის ხმა გაისმა.
რამდენიმე ადამიანი მივარდა მსროლელს. ის 37 წლის არტურ გაბრიელიანი აღმოჩნდა, რომელიც უკვე დაკავებულია განზრახ მკვლელობის ბრალდებით.
მაგრამ მთელი ამ ჩხუბისა და სროლის განმავლობაში, შემთხვევის ადგილას არ გამოჩენილან პოლიციელები.
ადგილობრივმა ჟურნალისტებმა გაცილებით ოპერატიულად მოახდინეს რეაგირება – ახალგაზრდა მამაკაცის მკვლელობა კამერით დააფიქსირა ახალი ამბების ინტერნეტგამოცემის, „ჯავახეთის საინფორმაციო ცენტრის“ ჟურნალისტმა, რომელიც იქ მას შემდეგ მივიდა, რაც ადგილზე დაპირისპირება დაიწყო.
დაიგვიანა „სასწრაფომაც“. მკერდში დაჭრილი მირანიანი საავადმყოფოში საბოლოოდ კერძო ავტომობილით მიიყვანეს.
სროლა საავადმყოფოს ეზოშიც კი გაგრძელდა. გაბრიელიანი და მისი მეგობრები ესროდნენ ავტომობილს, რომლითაც დაჭრილი გადაჰყავდათ და პირდაპირ საავადმყოფოს შესასვლელთან ავტომობილი ამოტრიალდა.
პოლიცია პირველად მხოლოდ საავადმყოფოს ეზოში გამოჩნდა და მოვლენებში ჩარევას შეეცადა, რომელიც დილით დაიწყო.
კრიმინალური გარჩევა
კონფლიქტი, რომელიც მკვლელობით დასრულდა, დილით დაიწყო. ახალქალაქში, სულ მცირე, ორი ხმაურიანი შეტაკება მოხდა, რომელში ჩარევაც პოლიციამ საჭიროდ არ მიიჩნია.
ერთი მხრიდან ჩხუბში მონაწილეობდნენ სოფელ კულიკამის მცხოვრებლები, მათ შორის, მოკლული ვარდან მირანიანიც. მეორე მხრიდან – ქალაქ ახალქალაქის მცხოვრებლები. სასტუმრო „არტსეგის“ მფლობელი არტურ გაბრიელიანი და მისი მეგობრები.
კონფლიქტის მიზეზი ბოლომდე ნათელი არ არის. ერთი ვერსიით, ამის მიზეზი სოფელ კულიკამის მცხოვრებსა და სასტუმრო „არტსეგის“ ადმინისტრაციას შორის, სამი წლის წინ მომხდარი ინციდენტი გახდა.
მაშინ ინციდენტი მოგვარდა, თუმცა, სასტუმროს მფლობელი არტურ გაბრიელიანი შურისძიებით იმუქრებოდა.
27 წლის მამაკაცის მკვლელობამ ახალქალაქში დიდი არეულობები გამოიწვია.
მოკლულის მეგობრებმა ნამდვილი რბევა მოაწყვეს – დაწვეს არტურ გაბრიელიანისა და მისი მამის სახლები, ასევე, მათი ოჯახის კუთვნილი სასტუმრო „არტსეგი“.
ამასთან, დაწვეს კონფლიქტში მონაწილე სხვა პირების, არტურ გაბრიელიანის მეგობრების – გენა ზარმარიანისა და კლიმენტი კოსიანის სახლები.
დამწვარ სახლებში არავინ არ იმყოფებოდა და არავინ დაშავებულა.
მკვლელობიდან მალევე, ახალქალაქში ჩავიდა სპეცრაზმისა და პოლიციის დიდი რაზმები. ადგილზე მივიდა სამცხე-ჯავახეთის გუბერნატორი, ბესიკ ამირანაშვილიც.
საქართველოს შინაგან საქმეთა სამინისტრომ გაავრცელა განცხადება არტურ გაბრიელიანის განზრახ მკვლელობისა და ცეცხლსასროლი იარაღის უკანონოდ შეძენა-შენახვის ბრალდებით დაკავების შესახებ.
ამ დანაშაულისთვის სასჯელის სახით გათვალისწინებულია თავისუფლების აღკვეთა 7-დან 15 წლამდე ვადით.
ოპოზიცია: ხელისუფლებამ კრიმინალზე კონტროლი დაკარგა
„ახალქალაქის ცენტრში, ათობით ადამიანი ესროდა და ურტყამდა ერთმანეთს. შემდეგ ეს დაპირისპირება გაგრძელდა საავადმყოფოს ეზოში – ძალოვანი უწყების მთავარი სამმართველოდან 15 მეტრში. იწვოდა სახლები, სასტუმროები და სახელმწიფომ ვერ შეძლო არეულობის შეჩერება, რომელიც მთელი დღე და ღამე გაგრძელდა.
ეს ნიშნავს, რომ კრიმინალური ძალები თავს მასპინძლებად თვლიან, რომლებიც მართავენ ამ ქვეყანას და ეს სიტუაცია შექმნა ბიძინა ივანიშვილმა (ოლიგარქმა, საქართველოს ჩრდილოვანმა მმართველმა, მმართველი პარტიის, „ქართული ოცნების“ ხელმძღვანელმა)“, – განაცხადა JAMnews-სთან ინტერვიუში ოპოზიციური პარტიის, „ევროპული საქართველოს“ წარმომადგენელმა, ირმა ნადირაშვილმა.
მოსაზრებას, რომ ხელისუფლებამ დაკარგა კონტროლი კრიმინალზე, ეთანხმება სამველ მანუკიანი, პარლამენტის დეპუტატი და მმართველი პარტიის მაჟორიტარობის კანდიდატი.
„კრიმინალური მენტალიტეტი ახალგაზრდებში – სერიოზული პრობლემაა, რომელიც რეგიონში რუსეთიდან მოვიდა“, – განაცხადა მან JAMnews-თან ინტერვიუში.
„ახალქალაქში არ არის ასეთი ჯგუფები, ქურდული ან მსგავსი ტიპის. მაგრამ არის დიდი კავშირები რუსეთთან, იქ კი ეს მიღებული ამბავია. ჩვენი ახალგაზრდები იქ ამას ხედავენ და ეს ახალისებს მათ“, – ამბობს მანუკიანი.
„მინდა, რომ რეგიონს კანონი მართავდეს“ – ადგილობრივი დეპუტატი
დეპუტატი სამველ მანუკიანი მიიჩნევს, რომ რეგიონში არალეგალური იარაღის პრობლემა არ დგას, მაგრამ არის კანონის უზენაესობის პრობლემა:
„იარაღი, სავარაუდოდ, ლეგალურია – მაგრამ საქმე ისაა, სად და როგორ იყენებენ ამ იარაღს. ლეგალური იარაღის მფლობელმა ის ჯიბით არ უნდა ატაროს. მაგალითად, ახლა ყველა ახალგაზრდას აქვს თან დანა. მე ვკითხულობ – რატომ? მპასუხობენ – უბრალოდ, ისე“.
მანუკიანი ამბობს, რომ რეგიონში პოლიციისა და საპოლიციო კონტროლისადმი დამოკიდებულება უნდა შეიცვალოს:
„ჩვენ გვინდა, რომ იყოს კანონი, მაგრამ არ იყოს პოლიცია, ასეთი რამ კი შეუძლებელია. მაგალითად, მე დამირეკეს სოფელი დილისკადან და მკითხეს, რატომ მოძრაობს სპეცრაზმი ჩვენ სოფელშიო. ეს არავის არ მოსწონს. არავის არ მოსწონს, როდესაც მათ ავტომობილს აჩერებენ, ამოწმებენ. ისინი აღშფოთებულები არიან იმით, რომ თითქოს დემოკრატიულ სახელმწიფოში პოლიცია ყოველ გამვლელს ამოწმებს და ა.შ. მაგრამ, სინამდვილეში, პოლიცია ძლიერი უნდა იყოს, ჩვენ კი ძლიერი პოლიციელები არ მოგვწონს, ჩივილს ვიწყებთ“, – ამბობს მანუკიანი.