"კრემლის სანქციები აფხაზეთის ოპოზიციის მიმართ მხოლოდ გააძლიერებს წინააღმდეგობას“ – მოსაზრება
რუსეთის სანქციები აფხაზეთში
აფხაზეთში კვლავ განიხილავენ რუსეთის იუსტიციის სამინისტროს გადაწყვეტილებას, რომლის მიხედვითაც აფხაზი ჟურნალისტი და პოლიტოლოგი ინალ ხაშიგი “უცხოელი აგენტის“ სტატუსით აღიარეს.
მანამდე მოსკოვმა აფხაზეთის პარლამენტის დეპუტატს, კან კვარჩიას, და საზოგადოებრივ აქტივისტს, ლევან მიქაას, რუსეთის მოქალაქეობა ჩამოართვა, ხოლო დირიჟორ ბარას კუჯბას ქვეყანაში შესვლა 10 წლით აუკრძალა.
კრემლის ამ პერსონალური სანქციების ყველა “ადრესატი“ აფხაზეთის ყოფილი ე.წ. პრეზიდენტის, ასლან ბჟანიას ოპოზიციას მიეკუთვნება. ბჟანია აქტიურად ლობირებდა რუსეთთან სკანდალური საინვესტიციო შეთანხმების რატიფიკაციას, რასაც აფხაზეთის ოპოზიცია და სამოქალაქო საზოგადოების დიდი ნაწილი კატეგორიულად ეწინააღმდეგებოდა. შედეგად, 2024 წლის ნოემბერში სოხუმში მასობრივი საპროტესტო აქციები დაიწყო, რაც საბოლოოდ ბჟანიას გადადგომით დასრულდა.
2025 წლის თებერვალ-მარტში აფხაზეთში ვადამდელი საპრეზიდენტო არჩევნები ჩატარდა, რომლის შედეგადაც ხელისუფლების სათავეში ბადრა გუნბა მოვიდა. გუნბა ასლან ბჟანიას ფაქტობრივ მემკვიდრედ და მოსკოვის აშკარა ფავორიტად მიიჩნევა. კრემლმა მაქსიმალური ძალისხმევა ჩადო გუნბას მხარდაჭერისთვის და პარალელურად ცდილობდა მისი მთავარი კონკურენტის – ოპოზიციონერი კანდიდატის, ადგურ არძინბას დისკრედიტაციას.
ამრიგად, აფხაზეთში ხელისუფლება, ფაქტობრივად, იგივე დარჩა და მის ოპონენტებზე თავდასხმები გრძელდება. მაგრამ, აფხაზი ჟურნალისტის, მარიანა კოტოვას თქმით, ამას საპირისპირო ეფექტი შეიძლება მოჰყვეს და მხოლოდ წინააღმდეგობა გაზარდოს.
მარიანა კოტოვა
“ოპოზიციის წევრები იბრძოდნენ იმ შეთანხმების წინააღმდეგ, რომელიც აფხაზურ ბიზნესსა და მთლიანად აფხაზურ საზოგადოებას აზიანებდა. მათ გაიმარჯვეს. მათ მოქალაქეობა ჩამოართვეს, დეპორტირება მოუწყეს, “უცხოელ აგენტებად“ აღიარეს, და შემდეგ თავად ეს დოკუმენტიც ოფიციალურად აღიარეს.
გამოიყურება, როგორც შეცდომა, სისულელე, აბსურდი? არა. აქ მკაცრი ლოგიკაა – მალე იქნება ახალი დოკუმენტი.
მაგრამ მასში ღრმად ჩახედვა აღარავის შეეძლება: ყველაზე უკმაყოფილოები უკვე დეპორტირებულნი არიან, ხოლო დანარჩენები – დაშინებულნი.
თუმცა, “რკინის ლოგიკის“ ნაჯახი სიმართლეს ვერ გაჭრის: რაც მეტი “უცხოელი აგენტი“ და დეპორტირებული იქნება, მით მეტი აღმოჩნდება მათ შორის ის, ვისაც დასაკარგი აღარაფერი აქვს.“
უსამართლობის განცდა და მიუღებლობა – ყველაზე ძლიერი საწვავია.
ისინი, ვინც ეს ყველაფერი აფხაზეთში წამოიწყო, ნაღმს დებენ. სწორედ ისინი არიან ნამდვილი ტერორისტები, რომლებიც აფხაზეთის ახალ ცხელ წერტილად გადაქცევას ესწრაფვიან.
რა უნდა გავაკეთოთ? მტრები მეგობრებად უნდა ვაქციოთ და არა პირიქით.“
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
