კორონავირუსის მორიგი ტალღა: სომხეთში ინფიცირებულთა რიცხვი ისევ იზრდება

სომხეთში, კორონავირუსის მორიგი ტალღა დაიწყო, მედიკოსები განგაშს ტეხენ – საავადმყოფოები ისევ გადაიტვირთა. 10 მარტს, 4 285 ჩატარებული ტესტიდან დადებითი პასუხი 748-მ აჩვენა.

ინფექციონისტები გაფრთხილებით გამოდიან, რომ სომხეთში ეპიდემიოლოგიური ვითარება დაძაბულია და თუკი არ იმოქმედებენ, ერთი კვირის შემდეგ, დღეში 5-ჯერ მეტ შემთხვევას უნდა ელოდონ.

2020 წლის 16 მარტიდან 11 სექტემბრამდე, ქვეყანაში საგანგებო მდგომარეობის რეჟიმი მოქმედებდა. შემდეგ, ის კარანტინით შეიცვალა, რომელიც 11 ივლისამდე გაგრძელდება.

ფორმალურად, „ნიღბის სავალდებულო ტარების“ რეჟიმი რესპუბლიკაში შენარჩუნებულია, მაგრამ რეალურად მას ყველა არ იცავს.

10 მარტის მონაცემებით, სომხეთში, კორონავირუსით ინფიცირების 176 286 შემთხვევაა დადასტურებული. გასული დღე-ღამის განმავლობაში, ორი პაციენტის გადარჩენა ვერ მოხერხდა, სულ გარდაიცვალა 3 239 პაციენტი. გამოჯანმრთელდა – 165 441. პანდემიის დაწყებიდან ქვეყანაში 761 945 ტესტი ჩატარდა.

• Covid-19-ის სტატისტიკა სამხრეთ კავკასიაში. საქართველო – 395 ახალი შემთხვევა, 9 გარდაცვლილი
• სომხეთში UNICEF-ის ბიუროს ხელმძღვანელი ჯაშუშია? ახალი სკანდალი ქვეყანაში

ექიმები წესების დაცვას გვირჩევენ

სომხეთის ჯანდაცვის მინისტრს, ანაიტ ავანესიანს მიაჩნია, რომ ინფიცირების შემთხვევები ყოველდღიურად არ გაიზრდება, თუკი უბრალოდ დაცული იქნება ეპიდემიის საწინააღმდეგო წესები.

მან კვლავ გაიხსენა პროფილაქტიკური ზომების დაცვასთან დაკავშირებით, ჯანდაცვის მსოფლიო ორგანიზაციის წინადადების შესრულების აუცილებლობა. ეს არის ხელების დეზინფიცირება, სოციალური დისტანციის დაცვა და ნიღბის ტარება.

„ყველაფერი უნდა გაკეთდეს, რომ ინფიცირებულთა რიცხვი არ გაიზარდოს და ამის გამო, მძიმე ავადმყოფები იძულებული არ გახდნენ, სახლში დარჩნენ“, – განაცხადა მინისტრმა.

მისი თქმით, კორონავირუსით ინფიცირებულები ახლა ცხრა საავადმყოფოში მკურნალობენ, სადაც სულ, დაახლოებით, 100 თავისუფალი საწოლი დარჩა.

პრემიერ-მინისტრი ნიკოლ ფაშინიანიც ასევე საუბრობდა ვირუსის პირობებში ცხოვრების ახალი წესების დაცვის აუცილებლობაზე, „რათა არ დადგეს ახალი შეზღუდვების შემოღების აუცილებლობა“.

ექიმებს ვითარება „დაძაბულად“ მიაჩნიათ

თუკი უკანასკნელი ორი კვირის განმავლობაში ჩატარებული ტესტების პასუხებს მისი წინა 14 დღის მონაცემებს შევადარებთ, ფიქსირდება 91%-ზე დიდი ზრდა. ამის შესახებ, დაავადებათა კონტროლისა და პროფილაქტიკის ეპიდემიოლოგიის ეროვნული ცენტრის განყოფილების ხელმძღვანელმა, რომელა აბოვიანმა განაცხადა:

„დღეისათვის, ეპიდემიოლოგიური ვითარება შეიძლება შეფასდეს, როგორც ძალიან დაძაბული. (…) სომხეთში, ინფექციის რეპროდუქციული მაჩვენებელი უკვე 1-ზე მეტია, ის 1.3-ზეა. ეს ნიშნავს, რომ თუკი მომდევნო 7 დღის განმავლობაში არ იქნება მიღებული არანაირი ზომები, არ გავზრდით უსაფრთხოების წესების დაცვის მიმართ ყურადღებას, ჩვენთან, შეიძლება დღეში 3700-ზე მეტი ახალი შემთხვევა გვქონდეს“.

ინფექციონისტის თქმით, დაავადებების მკვეთრი ზრდა ფიქსირდება ახლა ბავშვებსა და მოზარდებშიც:

• 1.17-ჯერ 3-5 წლებს შორის,

• 1.42-ჯერ 6-17 წლებს შორის,

• 3.3-ჯერ 6-8 წლებს შორის.

6 772 პაციენტი ახლა აქტიურ მკურნალობას გადის, მათგან 901 – საავადმყოფოებში.

ჯერჯერობით მხოლოდ ექიმებს ცრიან

სომხეთში მასობრივი ვაქცინაცია ჯერ არ დაწყებულა. ჯერჯერობით იცრებიან მხოლოდ მედიკოსები, რომლებიც იმ კლინიკებში მუშაობენ, სადაც კორონავირუსით ინფიცირებულებს მკურნალობენ.

წლის დასაწყისში რუსეთმა სომხეთის ჯანდაცვის სამინისტროს 2000 დოზა „სპუტნიკ V“ გადასცა 1000 ადამიანის ვაქცინაციისთვის .

სომხეთის ინფექციონისტები ირწმუნებიან, რომ აქამდე რაიმე გვერდითი ეფექტი ვაქცინაციის შემდეგ არ გამოვლენილა. ჯანდაცვის მინისტრის ბრძანებით დამტკიცებულია რისკის ჯგუფები, რომლებიც პირველ რიგში აიცრებიან. კერძოდ, ესენი არიან მოხუცებულთა სახლების ბინადრები და მათი პერსონალი, 65 წლისა და ზევით ადამიანები.