კორონავირუსი სამხრეთ ოსეთში: ექიმის ბუნტი, ნიღბებისა და ტესტების დეფიციტი - და ეჭვები თბილისის მიმართ
ოფიციალური მონაცემებით, სამხრეთ ოსეთში, კორონავირუსით ინფიცირებულები არ არიან. მაგრამ დაფიქსირდა ექიმის ბუნტი, რადგან სამედიცინო პერსონალს არ აქვს არც დამცავი კოსტიუმები, არც ნიღბები და ხელთათმანები. და ასევემ დიდი პრობლემაა ინფიცირებულთა გამოვლენა და მათი მკურნალობა.
სამედიცინო სფეროს მზაობა
ინფექციურ საავადმყოფოში მზად არიან, ინტენსიური თერაპიის განყოფილებაში პოტენციური ინფიცირებულები მიიღონ.
ოფიციალური ინფორმაციით, სამხრეთ ოსეთში უკვე 26 ხელოვნური სუნთქვის აპარატი აქვთ.
მაგრამ პრობლემაა სპეციალისტებთან დაკავშირებით, რომლებსაც მისი გამოყენება შეუძლიათ. პაციენტის აპარატთან მიერთება რთული და მტკივნეული პროცედურაა.
„სპეციალისტების რაოდენობა სამჯერ ნაკლებია, ვიდრე ხელმისაწვდომი აპარატების“, – განუცხადა ჟურნალისტებს სამხრეთ ოსეთის მთავარმა რეანიმატოლოგმა, ალექსანდრ პლიევმა.
საავადმყოფოებში უკვე ახლა, როდესაც კორონავირუსით ინფიცირებულები არ ჰყავთ, სახარჯი მასალის დეფიციტი აქვთ. ხელისუფლების აზრით, ასე იმიტომ მოხდა, რომ ნიღბები, ხელთათმანები, მარლები და მსგავსი რაღაცები მასობრივად გაჰქონდათ ბოლო კვირების განმავლობაში.
დეფიციტი წარმოიქმნა თავად ექიმების ინდივიდუალური თავდაცვის საშუალებების მხრივაც. და ეს გამოვლინდა სკანდალში ადგილობრივ რესპუბლიკურ საავადმყოფოში.
- კორონავირუსი: არავითარი ხელის ჩამორთმევა. ერთმანეთს იდაყვებით, მუშტებით და ფეხებით ვესალმებით
- სამხრეთ ოსეთში ყიდულობენ პროდუქტებსა და პირველადი მოხმარების ნივთებს
- კორონავირუსი კავკასიაში. განახლებადი
- ბელარუსული ფლეშმობი: „რას იტყოდა შენს სიკვდილზე ლუკაშენკო“
ექიმის ბუნტი
ცხინვალის საავადმყოფოს ქირურგმა, ვლადისლავ ვალიევმა დირექტორის სახელზე განცხადება დაწერა, რომელშიც აღნიშნა, რომ სამორიგეოდ არ გავა, სანამ არ მიიღებს ინდივიდუალური თავდაცვის საშუალებებს – ნიღბებს, ხელთათმანებს, სათვალეებს, დამცავ კომბინიზონებს, რომლებიც საჭიროა COVID-19-თან დაკავშირებული კარანტინის პირობებში.
ინდივიდუალური თავდაცვის საშუალებების არასაკმარისი რაოდენობის შესახებ ინფორმაციის უარყოფას შეეცადა სამხრეთ ოსეთის ჯანმრთელობის დაცვისა და სოციალური განვითარების სამინისტრო.
იქ განაცხადეს, რომ მედპერსონალს დამატებით გამოუყვეს 5 ათასი ნიღაბი და 100 რესპირატორი.
ექიმის განცხადება კონფიდენციალური იყო და მის შესახებ მხოლოდ საავადმყოფოს თანამშრომლებმა იცოდნენ. მას მხარი დაუჭირა რამდენიმე კოლეგამ. მაგრამ შემდეგ, მისი ნებართვის გარეშე ვიღაცამ წერილი ფეისბუკში გამოაქვეყნა. და აი, აქ დაიწყო დევნა.
ვალიევს ჰიპოკრატეს ფიცისა და სამედიცინო ეთიკის დარღვევაში ადანაშაულებენ. საავადმყოფოს ხელმძღვანელობა ქირურგს გაგდებით დაემუქრა.
ამავდროულად, ბევრი გამოვიდა ექიმის მხარდასაჭერად. ისინი, ვინც მას პირადად იცნობენ, წერენ, რომ ვლადისლავ ვალიევი პაციენტებს არასამუშაო დღეებშიც კი მკურნალობს.
„ვინ მისცათ უფლება, აიძულონ ის, გადაარჩინოს ადამიანები საკუთარი სიცოცხლის რისკის ფასად. არ შეიძლება, ერთის გადარჩენით სხვები დააზარალო“.
„ყველა ასე რომ მოიქცეს ერთხელ მაინც – ჩინოვნიკებს ერთი ადგილი აეწვებოდათ. შესაძლოა, მაშინ მაინც გაეგოთ, რომ მედიცინის გარეშე დასრულებული ვართ“.
თავად ექიმმა უარი თქვა საკუთარი სურვილით გათავისუფლებაზე. მაგრამ მისი გაგდების საკითხი მას შემდეგ მოიხსნა, რაც გაირკვა, რომ მას საერთოდ არ გამოუქვეყნებია წერილი და არ აპირებდა საჯარო სკანდალის მოწყობას.
საავადმყოფოში კონფლიქტის გადაჭრა მოხერხდა, მაგრამ სამედიცინო საშუალებების დეფიციტის – ვერ.
სიტუაცია აღიარა სამხრეთ ოსეთის მთავარმა რეანიმატოლოგმა, ალექსანდრ პლიევმა.
„ობიექტური მიზეზების გამო, რესპუბლიკაში დროულად ვერ ჩამოვიდა ინდივიდუალური დაცვის საშუალების აუცილებელი რაოდენობა. ჩემს ხელთ არსებული ინფორმაციით, ამ მხრივ უზრუნველყოფის სამუშაოებში ჩაერთო ადგილობრივი წარმოებაც, რომელიც მალე წარმოადგენს დამცავი საშუალებების გარკვეულ რაოდენობას“, – განაცხადა ალექსანდრ პლიევმა.
კარანტინის გამკაცრება
5 აპრილს, სამხრეთ ოსეთში, მკვეთრად გაამკაცრეს კარანტინი – შესვლა შეუძლიათ მხოლოდ მოქალაქეებს, რომლებიც ვალდებული არიან გაიარონ ორი კვირა თვითიზოლაციაში.
გამონაკლისი დაშვებულია მხოლოდ სატვირთო ავტომობილებზე, ჩინოვნიკებსა და რუს სამხედროებზე.
ყველა ჩამოსულ ავტოტრანსპორტს გამშვებ პუნქტზე უტარებენ სანიტარულ დამუშავებას.
ახლა, ხელისუფლების მონაცემებით, საავადმყოფოში კარანტინში იმყოფება რვა ადამიანი.
„თვითიზოლაციაში არის 408 ადამიანი, 114 მათგანი სტუდენტია, რომლებიც საზღვარგარეთ ცხოვრობენ და ახლა დაბრუნდნენ სახლში“, – განაცხადა ექიმმა ეპიდემიოლოგმა ანა გაგლოევამ.
კა-გე-ბეს ეჭვი საქართველოზე აქვს
სამხრეთ ოსეთში შესვლა შეიძლება საქართველოდან და რუსეთიდან.
7 აპრილის მონაცემებით, საქართველოში, კორონავირუსით 195 ადამიანი დაინფიცირდა, მათგან სამი გარდაიცვალა. ქვეყანაში გამოცხადებულია საგანგებო მდგომარეობა, სრულად ჩაკეტილია საზღვრები, დაკეტილია ყველაფერი, სასურსათო მაღაზიებისა და აფთიაქების გარდა, არ მუშაობს საზოგადოებრივი ტრანსპორტი, მოქალაქეები კი ვალდებული არიან, შინ დარჩნენ.
რუსეთში, 7 აპრილის მონაცემებით, 7 497 ადამიანი დაინფიცირდა კორონავირუსით, გარდაიცვალა – 58. მოსკოვსა და რამდენიმე რეგიონში დაწესებულია შეზღუდვები გადაადგილებაზე, მაგრამ საგანგებო მდგომარეობა არ გამოცხადებულა, ბევრი ბიზნესი მუშაობას აგრძელებს.
სამხრეთ ოსეთის კა-გე-ბეს მიაჩნია, რომ მათ ქვეყანაში კორონავირუსის შეჭრის მთავარი საფრთხე საქართველოა.
„კორონვირუსის პანდემიის ფონზე „შემთხვევით“ გააქტიურდა სამხრეთ ოსეთის საზღვრის დარღვევის ფაქტები საქართველოს მხრიდან. 26 თებერვალს, საქართველოში COVID-19-ით ინფიცირების პირველი შემთხვევა დაფიქსირდა და ამ დღიდან 30 მარტამდე, სამხრეთ ოსეთის საზღვრის დაცვის სამსახურმა, დაახლოებით, 20 დარღვევა დააფიქსირა“, – ნათქვამია სამხრეთ ოსეთის კა-გე-ბეს განცხადებაში.
„ამ დრომდე ასეთი მასობრივი ინციდენტები არ ყოფილა და ეს, რა თქმა უნდა, შემთხვევითობა არ არის. განსაკუთრებით საყურადღებოა, რომ 23-დან 30 მარტამდე, საზღვრის ზოგიერთ დამრღვევს აღენიშნებოდა რესპირატორული დაავადების მწვავე ნიშნები. ძალიან სამწუხაროა, რომ მათ შორის აღმოჩნდა სამხრეთ ოსეთის მოქალაქე. ისინი ჰოსპიტალიზებული არიან და კარანტინში იმყოფებიან. მათ კორონავირუსზე ტესტები ჩაუტარდათ. საქართველოს მოქალაქეები სამხრეთ ოსეთის უსაფრთხოების უზრუნველყოფის მიზნით, გაძევებულები არიან რესპუბლიკის ტერიტორიიდან“.
მანამდე, საზღვრის გადაკვეთის ადგილები, „რაზდახანი“, „ქარზმანი“ და „ხელჩუა“, გამარტივებული წესით უკვე ჩაკეტილი იყო სამხრეთ ოსეთიდან საქართველოში შემომსვლელთათვის და გამსვლელთათვის. საქართველოდან დაბრუნებულ, სამხრეთ ოსეთის ლენინგორის რაიონის (საქართველოს ტერმინოლოგიით – ახალგორის რაიონი) მცხოვრებთ ორკვირიან კარანტინში ათავსებენ.
