მსოფლიო კარანტინიდან გამოდის: რობოტები ადამიანებს სიცხეს უზომავენ და პარკებს აკონტროლებენ
კორონავირუსის პანდემია ადამიანების მკვლელობას აგრძელებს. 10 მაისის მონაცემებით, მსოფლიოში 4 140 996 ინფიცირებული და 280 ათასზე მეტი გარდაცვლილია.
ევროპა ძალიან მძიმე სიტუაციაში აღმოჩნდა. ესპანეთი, იტალია, დიდი ბრიტანეთი და რუსეთი იმ ქვეყნებს შორის არიან, სადაც ყველაზე მეტი ადამიანი დაინფიცირდა, ევროპულ სახელმწიფოთა უმრავლესობაში, სიკვდილიანობის ძალიან მაღალი მაჩვენებელია.
თუმცა, უკანასკნელი ორი კვირის განმავლობაში, სიტუაციის გაუმჯობესება დაიწყო, მსოფლიოში გამოცხადებული კარანტინის თანმდევი ეკონომიკური კრიზისი კი ბევრ ქვეყანას შეზღუდვების თანდათანობით მოხსნას აიძულებს.
- ბილ გეითსი: შეზღუდვების მოხსნა შესაძლებელია მხოლოდ იმ შემთხვევაში, თუკი მოსახლეობის ძირითად ნაწილს მუდმივად ტესტირებას ჩაუტარებენ
- რუსეთი, კორონავირუსი: დაბალი სიკვდილიანობა ინფიცირებულთა ზრდის ფონზე და გარდაცვლილი ექიმების ძალიან მაღალი მაჩვენებელი
- კორონავირუსი უჰანის ლაბორატორიიდან? რაში ადანაშაულებს დასავლეთი ჩინეთს
- მოსაზრება: რა უნდა გააკეთონ უკრაინამ, საქართველომ და მოლდოვამ დასავლური ინტეგრაციის გასაგრძელებლად კრიზისის პირობებში
ესპანეთი: ბიზნესკლასის ადგილები პლაჟზე
ევროპის ერთ-ერთმა ყველაზე დაზარალებულმა ქვეყანამ, ესპანეთმა, კარანტინიდან ეტაპობრივად გამოსვლის გეგმა შეადგინა.
10 მაისისთვის, ესპანეთში, კორონავირუსით დაინფიცირდა თითქმის 265 ათასი ადამიანი, 26 ათასზე მეტი – გარდაიცვალა.
პირველ ეტაპზე – 11 მაისიდან – იხსნება ეკლესიები და მეჩეთები, ასევე, კაფეები და რესტორნები. მაგრამ მათ მხოლოდ ღია ტერასებზე შეეძლებათ სტუმრების მიღება და ისიც, არა უმეტეს სრული დატვირთვის 50 პროცენტისა.
ეს არ ეხება ესპანეთის ორ უმსხვილეს ქალაქს – მადრიდსა და ბარსელონას, სადაც ჯერჯერობით ყველაფერი დახურული რჩება.
26 მაისიდან გაიხსნება მუზეუმები და თეატრები, ასევე კურორტები, მაგრამ სოციალური დისტანცირების მკაცრი წესებით.
„პლაჟზე ახლა ადგილის დაჯავშნა ისევე საჭირო იქნება, როგორც ბიზნესკლასში“, – განაცხადა ვალენსიის შემოგარენში მდებარე ერთ-ერთი საკურორტო ქალაქის მერმა.
ასევე, 26 მაისს, ბავშვები ნაწილობრივ დაუბრუნდებიან სკოლებს – მხოლოდ დაწყებითი კლასები.
გერმანია: ბუნდესლიგა განახლდება
ევროპის საფეხბურთო ლიგებს შორის, ჩემპიონატის განახლებაზე პირველმა განცხადება გერმანიის ბუნდესლიგამ გააკეთა. ეს 16 მაისს უნდა მოხდეს.
პირველი ორი კვირის განმავლობაში, თამაშები მაყურებლის გარეშე გაიმართება. მაგრამ სპეციალისტები ვარაუდობენ, რომ გაუყიდავი ბილეთებისგან მიყენებულ ზარალს დიდწილად დააკომპენსირებს სატელევიზიო და ტოტალიზატორებიდან მიღებული შემოსავალი – მაყურებლებს თამაში მოენატრათ.
10 მაისის მონაცემებით, გერმანიაში, კორონავირუსით დაინფიცირდა 171 ათასზე მეტი ადამიანი, გარდაიცვალა – 7 549.
გერმანიაში უკვე ყველაფერი გაიხსნა, მაგრამ შემოღებულია დისტანცირებისა და დეზინფექციის მკაცრი მოთხოვნები.
იტალია: მყიდველებს რობოტები აკონტროლებენ
იტალიაში – ევროპაში, კორონავირუსით ინფიცირებულთა და გარდაცვლილთა რაოდენობით ერთ-ერთ ლიდერ ქვეყანაში – მაღაზიების მუშაობა დაუშვეს, მაგრამ დახურულია მსხვილი სავაჭრო ცენტრები.
10 მაისისთვის, იტალიაში, კორონავირუსით დაინფიცირდა 218 ათასზე მეტი ადამიანი, მათგან 30 ათასზე მეტი გარდაიცვალა.
მაღაზიების მეპატრონეები აქტიურად იყენებენ სამედიცინო რობოტებს, რომლებიც თითოეულ მომხმარებელს სიცხეს უზომავენ და დისტანციის დაცვას აკონტროლებენ.
დაუშვეს დაკრძალვის ცერემონიაზე ნათესავების გარდა სხვა ადამიანების დასწრებაც, მაგრამ არა უმეტეს 15 ადამიანისა.
რესტორნები და კაფეები მხოლოდ 1 ივნისს გაიხსნება.
მოქალაქეებს მეზობლებთან ურთიერთობის უფლება მისცეს, მაგრამ არა უმეტეს ერთდროულად ოთხი ადამიანისა. უკვე შესაძლებელია საკუთარი ქალაქიდან და სოფლიდან გასვლა – მაგრამ არ შეიძლება საკუთარი რეგიონის დატოვება.
სასწავლო დაწესებულებები სექტემბრამდე არ გაიხსნება.
საფრანგეთი: გადაადგილება შესაძლებელია სპეციალური ნებართვის გარეშე
საფრანგეთში, უკვე დაუშვეს 100 კილომეტრის მანძილამდე ავტომობილით მგზავრობა. უფრო შორ მანძილზე წასვლისთვის სპეციალური ნებართვაა საჭირო.
ასევე, პარიზში, პიკის საათში, შესაძლებელია ტრანსპორტით გადაადგილება, თუკი ასეთი სპეციალური ნებართვა აქვს ადამიანს.
რეგიონებში მოქალაქეებისთვის გაიხსნა პარკები, მაგრამ პარიზში აკრძალულია პარკებსა და ბაღებში შესვლა 11-დან 18 წლამდე მოზარდებთან ერთად.
11 მაისს განახლდება სწავლება უმცროსკლასელებისთვის და გაიხსნება საბავშვო ბაღები. 15-დან 18 წლამდე ასაკის მოზარდებისთვის სკოლები ივნისამდე არ გაიხსნება.
დაწესდა ახალი ლიმიტი – კლასში ერთდროულად 15 ბავშვზე მეტის ყოფნა არ შეიძლება.
მუშაობას იწყებს ყველა მაღაზია, საპარიკმახერო, ასევე, შესაძლებელი იქნება სასაფლაოზე წასვლა. მაგრამ რესტორნები და კაფეები კვლავინდებურად დახურული დარჩება.
მოსახლეობას კვლავ მიეცა ერთმანეთთან კომუნიკაციის უფლება, მაგრამ არა უმეტეს 10 ადამიანისა და დისტანციის დაცვის მკაცრი პირობებით.
შვედეთი: მხოლოდ ორი აკრძალვა – არ შეიძლება ერთად 50-ზე მეტი ადამიანის შეკრება და ხანდაზმულთა სახლების მონახულება
შვედეთში, მთელი პანდემიის პერიოდში, მკაცრი შეზღუდვები არ დაუწესებიათ.
მუშაობას აგრძელებენ რესტორნები, სკოლები და ბიზნესები. ძალაში რჩება მხოლოდ 50-ზე მეტი ადამიანის შეკრების აკრძალვა.
ასევე, მნახველებისთვის დახურულია ხანდაზმულთა სახლები.
მოსახლეობის დიდი ნაწილი თავიდანვე ნებაყოფლობით იყო იზოლირებული. ბევრი ადამიანი მუშაობს საკუთარი სახლიდან და უარი თქვეს საკუთარი ქალაქის ფარგლების დატოვებაზე.
ადამიანები, ასევე, ყველგან მკაცრად იცავენ ერთმანეთისგან ორმეტრიან დისტანციას.
შვედეთში, 3 ათასზე მეტი ადამიანი გარდაიცვალა, ეს ერთ სულ მოსახლეზე ყველაზე მაღალი მაჩვენებელია ჩრდილოეთ ევროპის ქვეყნებში. 10 მაისისთვის, აქ კორონავირუსით 26 322 ადამიანი დაინფიცირდა.
სამხრეთი კორეა: გამოსვლის წარუმატებელი მცდელობა
სამხრეთ კორეაში – პანდემიასთან ბრძოლის თვალსაზრისით მსოფლიოს ერთ-ერთ წარმატებულ ქვეყანაში – ინფექციის ახალი აფეთქება მოხდა.
მას შემდეგ, რაც გაირკვა, რომ ინფიცირების წყარო რესტორნები და ღამის კლუბები გახდა, ხელისუფლებამ ისინი დაუყოვნებლივ დაკეტა.
10 მაისისთვის, სამხრეთ კორეაში, 10 874 ადამიანი დაინფიცირდა, 256 მათგანი გარდაიცვალა.
