კონფლიქტის ზონაში მცხოვრები ბავშვები ორ კვირას ბორჯომში, ახალგაზრდულ ბანაკში დაისვენებენ
„ძალა ერთობაშია“ – ასე ჰქვია ბანაკს, რომელმაც „კოკა-კოლა ბოთლერს ჯორჯიას“ ფინანსური მხარდაჭერით, შემეცნებით-გასართობ აქტივობებში ჩართვის შესაძლებლობა 36 მოსწავლეს მისცა.
______________________________________________________________________________
______________________________________________________________________________
ბანაკის მთავარი თავისებურება იმაშია, რომ მისი სტუმრები საოკუპაციო ზოლთან მდებარე სოფლებში მცხოვრები ბავშვები არიან.
ხურვალეთელი, ატოცელი, ვარიანელი გუგუტიანთკარელი 12-დან 15 წლამდე ასაკის მოსწავლეები ორ კვირას ბორჯომის ხეობაში ატარებენ.
პირველმა ნაკადმა ბორჯომი უკვე დატოვა, თუმცა იქ მიღებულ ემოციებს და დარჩენილ მოგონებებს ბანაკის ორგანიზატორებს მოზარდები სოციალური ქსელებით აქტიურად უზიარებენ:
„ვიცოდით, რომ სწორედ იმას ვაკეთებდით, რაც მათ სჭირდებოდათ, მაგრამ არ გვეგონა, თუ ამ ბანაკს მათზე ამხელა დადებითი გავლენა ექნებოდა“, – ამბობს ბანაკის იდეის ერთ-ერთი ავტორი და ანტისაოკუპაციო მოძრაობის ლიდერი, დავით ქაცარავა.
_____________________________________________________________________________
● დათა პაპა – მავთულხლართების ყველაზე ცნობილი მსხვერპლი გარდაიცვალა
● მავთულხლართებით ორად გაყოფილი სოფელი
● 10 წელი მავთულხლართებს მიღმა
● 12 წელი აგვისტოს ომიდან
_____________________________________________________________________________
მისი ორგანიზებით, ბორჯომის ხეობაში მოსწავლეებთან სკაუტების ჯგუფიც იმყოფებოდა, რომლებიც მოსწავლეებს სპორტულ აქტივობებს უგეგმავდნენ.
„მუდმივად ვცდილობთ, რომ ეს ბანაკი უფრო საინტერესო და სასარგებლო გავხადოთ მონაწილეებისთვის. მოლაპარაკებებს ვაგრძელებთ სხვადასხვა ცნობილ ადამიანებთან, რათა ჩამოვიდნენ და საკუთარი ცოდნა თუ გამოცდილება გაუზიარონ ამ ახალგაზრდებს. ჩვენ არ უნდა დაგვავიწყდეს, რომ ეს ბავშვები ცხოვრობენ საოკუპაციო ხაზთან და მუდმივად სჭირდებათ იმის შეხსენება, რომ არ არიან მარტო და არსებობენ ადამიანები, რომელთა მხარდაჭერის იმედიც უნდა ჰქონდეთ“, – აღნიშნა ქაცარავამ.
სპორტული აქტივობების გარდა, მოსწავლეებისთვის ეწყობოდა ექსკურსიები და საგანმანათლებლო აქტივობებიც.
” ამ ბავშვებს რთული ემოციური მდგომარეობა აქვთ, არიან რთულ ვითარებაში, სულ ნეგატიური ინფორმაცია აქვთ გარშემო. ჩვენ კი გვინდოდა, მათ ეგრძნოთ, რომ ვიღაცები ზრუნავენ მათზე, ვიღაცებს მათი ბედი ანაღვლებთ. გვგონია, რომ ამ რამდენიმე დღეში, მოვახერხეთ და მათ ეს ვაგრძნობინეთ. მათი ბედნიერი და გახარებული სახეები მაფიქრებინებს ამას,” – ამბობს „კოკა-კოლა ბოთლერს ჯორჯიას“ სამეთვალყურეო საბჭოს წევრი სოფო ჭყონია.
როგორს მან გვითხრა, ბანაკი ყოველწლიური იქნება და საოკუპაციო ხაზთან მცხოვრებ მოსწავლეებს ახალი ცოდნის, ემოციის და ნაცნობების შეძენის შესაძლებლობას მომავალშიც მისცემს.
