კობახიძის ამბობს, რომ ოპოზიციამ ელენე ხოშტარიას მოწამვლის სცენარი განიხილა

“ქართული ოცნების” თავმჯდომარე ირაკლი კობახიძე ამბობს, რომ ოპოზიციამ თათბირზე ელენე ხოშტარიას მოწამვლის სცენარი განიხილა. ამის შესახებ კობახიძემ სპეციალურ ბრიფინგზე ისაუბრა. მისივე განმარტებით, ეს ინფორმაცია მას “გაუთქმელობის პირობით” მიაწოდეს.

“შედგა გარკვეული თათბირი, დაახლოებით 10-კაციანი, სადაც სერიოზულად განიხილეს ეს საკითხი. ძალიან მკაცრად ვაფრთხილებ ყველას – ხელი აიღონ ნებისმიერ ასეთ გეგმაზე, ნებისმიერ მცდელობაზე ისინი მიიღებენ უმკაცრეს პასუხს, ეს არის ჩვენი პირობა მათ მიმართ”, – თქვა კობახიძემ.

თავად ელენე ხოშტარია – რომელიც უკვე მეექვსე დღეა შიმშილობს – ამბობს, რომ ირაკლი კობახიძის განცხადება მის მოწამვლაზე მხოლოდ ყურადღების გადატანის მცდელობაა. “დროას” ლიდერი აღნიშნავს, რომ ეს ყველაფერი მმართველი პარტიის “მდგომარეობაზე მეტყველებებს”.

“მათ კარგად უნდა ესმოდეთ, რომ ერთადერთი პასუხისმგებელი მიხეილ სააკაშვილისა და ჩემს ჯანმრთელობაზე, არის ქართული ოცნება, რომელსაც ზუსტად ერთ წამში შეუძლიათ გადაწყვიტონ ადამიანების სიცოცხლისა და ჯანმრთელობის პრობლემა, ეს არის მიხეილ სააკაშვილის არაადამიანური მოპყრობის პირობებიდან გამოყვანა და სამოქალაქო კლინიკაში წაყვანა”, – აცხადებს ელენე ხოშტარია.

ირაკლი კობახიძემ ისაუბრა მიხეილ სააკაშვილის სამოქალაქო კლინიკაში გადაყვანის შესახებაც. მისი თქმით, ექიმები და ადვოკატები მიხეილ სააკაშვილის სამოქალაქო კლინიკაში გადაყვანას “რადიკალური გეგმების აღსრულებისთვის” ითხოვდნენ. 

“გუშინ ნათლად გამოჩნდა, რატომ ითხოვდა ოპოზიცია მიხეილ სააკაშვილის სამოქალაქო კლინიკაში გადაყვანას. მიზეზი ერთადერთი იყო – სამოქალაქო კლინიკასთან უფრო მარტივია იმ რადიკალური გეგმების აღსრულება, რომლის მიხედვითაც ისინი გუშინ მოქმედებდნენ. 

ბუნებრივია, სახელმწიფო ვერ დაუშვებს, რადიკალების ახირების გამო სამართალდამცველების, პაციენტების და სამედიცინო პერსონალის უსაფრთხოებას და სიმშვიდეს არასაჭირო პრობლემები შეექმნას“. – თქვა მმართველი პარტიის თავმჯდომარემ. 

კობახიძე კიდევ ერთხელ დაესხა თავს სახალხო დამცველს, ნინო ლომჯარიას და მას ნაციონალი უწოდა. მისი თქმით, ნინო ლომჯარია აჩვენებს, რატომ არ შეიძლება არცერთი თანამდებობის მიცემა ნაცმოძრაობისთვის, “იმიტომ, რომ იყენებენ სიცრუისთვის, ეს არის ძალიან ნათელი მაგალითი.”

“სახალხო დამცველს და ნაცმოძრაობის დანარჩენ წარმომადგენლებს აქვთ ერთიდაიგივე დღის წესრიგი. ერთადერთი მიზეზით უნდათ მათ სააკაშვილის რამენაირად სამოქალაქო საავადმყოფოში გადაყვანა, ყოველგვარი საფუძვლის გარეშე”, – ამბობს “ქართული ოცნების” თავმჯდომარე.

● რა ვიცით გლდანის ციხეში გადაყვანილ მიხეილ სააკაშვილზე. 8 ნოემბრის ქრონოლოგია
● თითქმის ერთი თვეა სააკაშვილი შიმშილობს. რა ელის და რა ვიცით მის ჯანმრთელობის მდგომარეობაზე
● არჩევნები დასრულდა. რას აპირებს ოპოზიცია

სახალხო დამცველმა გლდანის ციხეში არსებული სამკურნალო დაწესებულება რამდენჯერმე შეისწავლა. ომბუდსმენი ანგარიშებში წერდა, რომ კლინიკაში პაციენტის მკურნალობისთვის შეუსაბამო პირობებია.

ეს ერთ-ერთი არგუმენტი იყო მიხეილ სააკაშვილის მკურნალი ექიმებისა და ადვოკატებისთვის, რის გამოც ისინი კატეგორიულად ეწინააღმდეგებოდნენ მიხეილ სააკაშვილის გლდანის ციხეში გადაყვანას. ამას არც თავად ყოფილი პრეზიდენტი თანხმდებოდა.

ექიმთა კონსილიუმი, სამოქალაქო სექტორი, ოპოზიცია, ქართველი ხელოვანები და სხვა, არაერთი ადამიანი, ხელისუფლებას ყოფილი პრეზიდენტის სამოქალაქო, მრავალპროფილურ კლინიკაში გადაყვანას სთხოვდა.

ამ მოთხოვნით პოლიტიკური პარტია “დროას” ლიდერმა ელენე ხოშტარიამ პარლამენტში შიმშილობაც დაიწყო. ხელისუფლება კი ჯიუტად იმეორებდა, რომ საჭიროების შემთხვევაში პატიმარს მხოლოდ გლდანის ციხის სამკურნალო დაწესებულებაში გადაიყვანდა.

მიხეილ სააკაშვილი გლდანის ციხეში 8 ნოემბერს, საღამოს გადაიყვანეს.

სააკაშვილის გადაყვანის შესახებ უწყებას წინასწარ ინფორმაცია არ გაუვრცელებია. ამის შესახებ წინასწარ ინფორმაცია არც პრეზიდენტის ოჯახს ჰქონდა.

სად და როგორ გადაიყვანეს პატიმარი ექს-პრეზიდენტი, რომელსაც 40-დღიანი შიმშილობის შემდეგ მძიმე ჯანმრთელობის მდგომარეობა აქვს, რამდენიმე საათის განმავლობაში იყო უცნობი.

ამ პროცესების პარალელურად, 8 ნოემბრიდან ოპოზიციამ მიხეილ სააკაშვილის გათავისუფლებისა და რიგგარეშე არჩევნების დანიშვნის მოთხოვნით, ფართომასშტაბიანი, უწყვეტი საპროტესტო აქციები დაიწყო.

“ერთიანი ნაციონალური მოძრაობის” ლიდერმა ნიკა მელიამ განაცხადა, რომ „პროტესტი იქნება მტკიცე, ხალხმრავალი, უწყვეტი და მშვიდობიანი“ და ის გაგრძელდება იქამდე, ვიდრე ოპოზიცია საბოლოო გამარჯვებას არ მიაღწევს.