ხმების დიდი ნაწილი დათვლილია - "ქართული ოცნება" მესამედ იგებს საპარლამენტო არჩევნებს
ცესკომ ხმების 70 პროცენტამდე უკვე დაითვალა. საპარლამენტო არჩევნებში, პროპორციული სიებით მმართველი ძალა “ქართული ოცნება” იგებს; რაც შეეხება მაჟორიტარულ ოლქებს – 30 მაჟორიტარული ოლქიდან “ოცნება” პირველივე ტურში იგებს 16 ოლქს, 14 ოლქში კი, სავარაუდოდ, მეორე ტური გაიმართება.
თუ ეს შედეგი შენარჩუნდება, მაშინ “ქართული ოცნება” იქნება საქართველოს ისტორიაში პირველი პოლიტიკური ძალა, რომელმაც მესამე ვადით ხელისუფლებაში დარჩენა მოახერხა; საქართველო კი შეუერთდება რეგიონის იმ ქვეყნებს, სადაც ხელისუფლება წლობით არ იცვლება.
● როგორი იყო საპარლამენტო არჩევნების დღე. ქრონიკა
რაც შეეხება ოპოზიციაა, ის არ ენდობა შედეგებს და თავის მხარდამჭერებს კვირას, 16:00 საათზე, მასშტაბური მიტინგისკენ მოუწოდებს.
______________________________
ცესკოს პირველადი შედეგების მიხედვით იგებს მმართველი გუნდი. ერთპროცენტიანი ბარიერი გადალახა რვა პარტიამ:
1. მმართველი პარტია “ქართული ოცნება” – 48,2%
2.”ნაციონალური მოძრაობა -გაერთიანებული ოპოზიცია” – 26,08%
3. “ევროპული საქართველო – 3,79%
4. “პატრიოტთა ალიანსი” – 3.24%
5. “ლელო” – 3.22%
6. “სტატეგია აღმაშენებელი” – 3.13%
7. “გირჩი” – 2.98%
8. მოქალაქეები – ალეკო ელისაშვილი – 1.38%
რაც შეეხება მაჟორიტარულ ოლქებს – სულ 30 მაჟორიტარული ოლქია. აქედან 22 რეგიონებში და 8 თბილისში. პირველადი მონაცემებით, რეგიონებში, ოლქების უმეტესობაში (16 ოლქში) ოცნება პირველივე ტურში იგებს. ხოლო 6 ოლქში შეიძლება მეორე ტური გაიმართოს.
რაც შეეხება თბილისის 8 ოლქს. სავარაუდოდ, აქ რვავე ოლქში მეორე ტური იქნება.
საყოველთაო სიხარული
გუშინ საღამოს რვა საათზე საარჩევნო უბნები დაიხურა თუ არა, ოთხი ტელეკომპანიის ეთერში გავიდა ოთხი სხვადასხვა ეგზიტპოლის შედეგი.
სამთავრობო არხების – “იმედის” და “რუსთავი2”-ის მიერ ჩატარებული ეგზიტპოლების მიხედვით “ქართული ოცნება” 55 და 52 პროცენტს აგროვებდა.
● ოთხი ეგზიტპოლი და ორი განსხვავებული რეალობა. შედეგები
ოპოზიციური არხების – “მთავარი არხისა” და “ფორმულას” ეგზიტპოლების მიხედვით მმართველი ძალის პროცენტი იყო 41 და 46.
შესაბამისად, ზეიმი დაიწყო როგორც სახელისუფლებო, ისე ოპოზიციურ ბანაკში.
“ოცნების” მხარდამჭერები ქალაქში მანქანებით დაქროდნენ
ოპოზიციამ კი რუსთაველზე დაამონტაჟა დიდი ეკრანი, სადაც თავიანთ მხარდამჭერებთან ერთად უყურეს 20:00 საათზე “მთავარი არხის” ეგზიტპოლებს და “ოცნების” 41 პროცენტი იზეიმეს, რადგან ამ შედეგით მმართველ ძალას მთავრობის დაკომპლექტების უფლება აღარ ექნებოდა.
პირველი ბრიფინგი ცესკოში
ოპოზიციის ბანაკში საზეიმო განწყობა მას შემდეგ შეიცვალა, რაც არჩევნებიდან შვიდი საათის გასვლის შემდეგაც კი, ცესკოს საიტზე არ გაჩნდა არავითარი პირველადი შედეგები და არ დაიწყო ოქმების ატვირთვა.
პირველი შედეგები ღამის სამი საათისთვის გაჩნდა. თავდაპირველად აიტვირთა იმ პატარა ქალაქებისა და სოფლების ოქმები, სადაც დიდი ანგარიშით ლიდერობდა “ქართული ოცნება”.
ცესკოს მიერ გამოცხადებული პირველი მონაცემების მიხედვით, “ქართული ოცნება” 54 პროცენტზე მეტ ხმას აგროვებდა.
როდესაც ცესკოს თავმჯდომარე თამარ ჟვანია ამ შედეგს აცხადებდა, დარბაზში ხმაური ატყდა – მას სიტყვა გააწყვეტინა საარჩევნო კომისიის ოპოზიციონერმა წარმომადგენელმა და არჩევნების გაყალბებაში დასდო ბრალი.
პასუხად ჟვანიამ რამდენჯერმე გაიმეორა, რომ ეს საბოლოო შედეგი არ იყო, რადგან დიდი ქალაქები ჯერ არ იყო დათვლილი და შედეგი აუცილებლად შეიცვლებოდა.
ცესკოს მონაცემებს ოპოზიცია არ ენდობა და აცხადებს, რომ ხელისუფლება ცდილობს არჩევნები გააყალბოს.
სოციალურ ქსელებში აზიარებენ ცესკოს ოფიციალური საიტიდან აღებულ ოქმებს, სადაც ციფრებში დიდი ცდომილებებია.
ოპოზიცია არ ენდონა შედეგებს და თავის მხარდამჭერებს კვირას, 16:00 საათზე მასშტაბური მიტინგისკენ მოუწოდებს.
რა კონკრეტული გეგმა და სტრატეგია აქვს ოპოზიციურ პარტიებს და მოახერხებენ თუ არა ისინი ამჯერად მაინც გაერთიანებას, ჯერჯერობით უცნობია.
რაც შეეხება “ქართულ ოცნებას”, თუ წინასწარ შედეგებს გავითვალისწინებთ, ამ პარტიას, სავარაუდოდ, არ გაუჭირდება ერთპიროვნულად მთავრობის ფორმირება. ამისთვის 150 მანდატიან პარლამენტში უბრალო უმრავლესობა – 76 ხმაა საჭირო. თუმცა, თუკი მოხდა ისე, რომ “ქართულ ოცნებას” რამდენიმე ხმა დააკლდა, მას ყოველთვის შეიძლება ჰქონდეს თავისი სატელიტი ძალის, პრორუსული “პატრიოტთა ალიანსის” იმედი, რომელსაც წინასწარი მონაცემებით ხმების სამ პროცენტზე მეტი აქვს.
31 ოქტომბერს საქართველოში საპარლამენტო არჩევნები პირველად გაიმართა ახალი სისტემით: 120 დეპუტატს პროპორციული სისტემით ირჩევდნენ, ხოლო მაჟორიტარული სისტემით მხოლოდ 30-ს. (მანამდე პროპორციულით 77, მაჟორიტარულით კი, 73 აირჩეოდა).
150 საპარლამენტო მანდატისთვის ბრძოლაში 48 პარტია და ორი საარჩევნო ბლოკი მონაწილეობდა.
ახალი წესით, პარტიას, რომელიც ერთპროცენტიან ბარიერს გადალახავს, ეყოლება დეპუტატი პარლამენტში. აქტივობამ 56.11 პროცენტი შეადგინა, რაც იმას ნიშნავს, რომ არჩევნებში საკუთარი პოზიცია 1 970 540 ამომრჩეველმა გამოხატა. ანუ სახლში დარჩა და არჩევნებზე არ წავიდა 1 555 483 ამომრჩეველი.
