"ხალხის ძალა" აშშ-ის ელჩის წინააღმდეგ. ამჯერად დენიგანს ჩინეთზე გაკეთებული განცხადების გამო დაუპირისპირდნენ
ხალხის ძალის პასუხი დენიგანს
მმართველი გუნდის, “ქართული ოცნების” სატელიტმა პოლიტიკურმა მოძრაობამ, “ხალხის ძალამ”, რომელიც მმართველ კოალიციაში შედის, მორიგი იერიში მიიტანა აშშ-ის ელჩზე საქართველოში. ამჯერად ამერიკელი დიპლომატი ჩინეთ-საქართველოს ურთიერთობების შესახებ გაკეთებული განცხადების და “წითელი ხაზების” გადაკვეთის გამო გააკრიტიკეს.
რა თქვა ელჩმა
რობინ დენიგანმა სააგანტო IPN-ისთვის მიცემულ ვრცელ ინტერვიუში ანაკლიის პორტის ჩინური კომპანიისთვის გადაცემაზე ისაუბრა.
დანიგანის თქმით, კომპანია, რომელსაც საქართველოს მთავრობა კონტრაქტს უდებს, ჩინეთის კომუნისტურ პარტიასთანაა კავშირში, რომელიც თავის მხრივ რუსეთს ეხმარება უკრაინასთან ომში.
“რაც შეეხება ანაკლიას, CCCC (China Communications Construction Company) კომპანიის უმეტესი ნაწილის მფლობელი, რომელთანაც საქართველოს მთავრობამ კონტრაქტი დადო, ჩინეთის კომუნისტური პარტიაა და ის ცნობილია, რომ დაკავშირებულია ჩინეთის არმიასთან. ჩინეთის კომუნისტური პარტია, არის ნომერ პირველი ბანკირი, რუსეთის არმიის ნომერ პირველი ფინანსისტი დღეს. ასე რომ, ერთი კითხვაა, რატომ უნდა გააღრმაო ეკონომიკური კავშირი იმ პარტიასთან, რომელიც აფინანსებს თქვენს ოკუპანტს?” – განაცხადა დენიგანმა ინტერვიუში.
ელჩმა ასევე ყურადღება გაამახვილა იმაზე, რომ აღნიშნული კომპანიას არა აქვს კარგი რეპუტაცია გლობალური მასშტაბით.
“2009 წელს მსოფლიო ბანკმა აუკრძალა ბანკს ამ კომპანიის მიერ განხორციელებული ინფრასტრუქტურული პროექტების დაფინანსება,” – აღნიშნა ელჩმა.
დენიგანს შრი-ლანკის მაგალითი მოჰყავს, სადაც ამ კონკრეტულომა ჩინურმა კომპანიამ 99 წლიანი იჯარით შეძლო პორტის აშენება და ახლა იქ ჩინეთის სამხედრო გემები შედიან:
“ცოტა ხნის წინ კომპანიამ ააშენა პორტი შრი-ლანკაში და ამ პორტის ირგვლივ ბევრი კამათია… საბოლოოდ, ჩინეთის მთავრობამ შეძლო შრი-ლანკის მიწაზე 99 წლიანი იჯარის უზრუნველყოფა და მისი გემები, სამხედრო გემები, შეძლებენ შესვლას და გასვლას. ასე რომ, არსებობს კამათი იმასთან დაკავშირებით, რომ შრი-ლანკამ დათმო თავის სუვერენიტეტი და ძირითადი კრიტიკული ინფრასტრუქტურა…” – აღნიშნა ელჩმა.
ელჩმა ასევე დასძინა, რომ ითანამშრომლებს თუ არა საქართველო აღნიშნულ კომპანიასთან, ეს მისი სუვერენული უფლებაა.
რა განცხადებები გააკეთა ხალხის ძალამ
„ხალხის ძალის“ განცხადებაში ნათქვამია, რომ ელჩი ისეთ საკითხებს შეეხო, რომლებიც „პირდაპირ ურტყამს ჩვენი ქვეყნის სუვერენიტეტს და დამოუკიდებლობას“, რაც “წითელი ხაზების” გადაკვეთას ნიშნავს.
“ხალის ძალა” წერილში ბრჭყალებში სვამს ფრაზას “სტრატეგიული პარტნიორი”, როდესაც მას აშშ-ისთან მიმართებაში იყენებს.
პარტია აშშ-ის ამჟამინდელ პოლიტიკას საქართველოს მიმართ „არაადეკვატურს“, „ჩაგვრასა და შეურაცხყოფაზე დაფუძნებულს“ უწოდებს.
ხალხის ძალა ეჭვქვეშ აყენებს ქვეყნისთვის აშშ-ის დახმარების მოცულობას და აცხადებს, რომ ის ბევრად ნაკლები იყო და ძირითადად ქვეყანაში აშშ-ის „აგენტების“ გაძლიერებაზე დაიხარჯა.
“ხალხის ძალის” განცხადებაში წერია, რომ ჩინეთთან ეკონომიკურ ურთიერთობებს საქართველოსთვის „გადამწყვეტი მნიშვნელობა“ აქვს:
„ერთადერთი ქვეყანა, რომელიც მძიმედ დაზიანდება, თუ საქართველო ჩინეთთან გაწყვეტს ეკონომიკურ ურთიერთობას, სწორედ საქართველოა“.
წერილში წერია, რომ მიუხედავად აშშ-ის მოთხოვნისა, საქართველო არ დაუწესა სანქციები რუსეთს და არ გაწყვიტა მასთან ეკონომიკური კავშირი
„ამ უგუნური ნაბიჯით რუსეთს ვერაფერს დავაკლებდით, ხოლო ჩვენი ქვეყნის ეკონომიკას და ქართველ ხალხს ნამდვილად გამოვუწერდით ჩვენივე ხელით „უმძიმეს სანქციებს”, რომელთა შედეგები ათეული წლების განმავლობაში მძიმე დაღად დააჩნდებოდა ჩვენი ხალხის ცხოვრებას“, – ნათქვამია განცხადებაში.
პარტიის თქმით, „ილუზია და ქართველი ხალხის დაცინვაა“ ელჩის მხრიდან „მუდმივი აპელირება 6 მილიარდიან დახმარებაზე, რომელიც, თურმე, 30 წლის განმავლობაში ქართველ ხალხს მოახმარეთ.
“ჯერ ერთი, საქართველოში შემოსული ამერიკული დახმარება, რაც ჩვენ დავითვალეთ, არის არა 6, არამედ, დაახლოებით 4 მილიარდი დოლარი 30 წლის განმავლობაში. და მეორე – ამ თანხის დიდი ნაწილი, სამწუხაროდ, დაიხარჯა საქართველოში თქვენს მიერ დაფინანსებული ენჯეოების ხელით თქვენივე საყვარელი პარტიის – „ნაცმოძრაობის” – ჯერ ხელისუფლებაში მოყვანისათვის. დღეს უკვე ეს თანხები ძირითადად ისევ იმ ენჯეოებს ხმარდება, რომლებიც ჩვენი სამშობლოსთვის ძირგამომთხრელ საქმიანობას ეწევიან… ნაცმოძრაობის ხელისუფლებაში დაბრუნება განუზრახავთ“.
წერილში ხაზგასმულია საქართველოს მონაწილეობა საერთაშორისო მისიებში. “ხალხის ძალა” აცხადებს, რომ საქართველოს მონაწილეობის გარეშე მხოლოდ ავღანეთის მისია აშშ-ს მინიმუმ ორი მილიარდი დოლარით მეტი დაუჯდებოდა.
პარტია 2008 წლის ომსაც შეეხო და ამ ომშიც აშშ დაადანაშაულა – წერილში წერია, რომ ომი აშშ-ის ინტერესებში შედიოდა: „… აგენტურამ 2008 წელს მოაწყო უმძიმესი პროვოკაციები… რომ არა ეს მიზანმიმართული ბოროტება საკუთარი ქვეყნის მიმართ, რომ არა დავალებების უსიტყვო შესრულება და მონური მორჩილება, საქართველო ომის ქარცეცხლში არ გაეხვეოდა. არ იქნებოდა ასობით ქართველის მსხვერპლი, არ გვეყოლებოდა 35 000 ახალი დევნილი, არ მოხდებოდა საქართველოს ტერიტორიის 20 პროცენტის ოკუპაცია და ეკონომიკის სერიოზული ჩამოშლა. სერიოზული კითხვის ნიშნები გვაქვს ამ პროცესებში თქვენს როლთან და ფუნქციასთან დაკავშირებით, რადგან დღეს უკვე პატარა ბავშვმაც კი იცის საქართველოში, რომ სააკაშვილი და მისი აგენტურული ბანდა სწორედ რომ ოკუპაციის გამოსაწვევად ასრულებდა უმძიმეს დავალებებს საქართველოს წინააღმდეგ“.
განცხადებაში ნათქვამია, რომ „სწორედ აგვისტოს ამ მოვლენების შემდეგ დაერქვა რუსეთს „ოკუპანტი”, ხოლო აშშ-ს – სტრატეგიული პარტნიორი, რაც უკვე შემდგომ წლებში – ვიდრე დღემდე, მეტნაკლები წარმატებით გამოიყენება პროპაგანდის საწარმოებლად და საზოგადოებრივი აზრის ტერორისთვის“.
პარტია მოუწოდებს აშშ-ს გამოაქვეყნოს საქართველოსთვის უზრუნველყოფილი თანხების დეტალური ხარჯთაღრიცხვა და „საზოგადოებისთვის ყველაფერი ნათელი გახდება“.
პარტია აცხადებს, რომ ის ყველაფერს გააკეთებს „ჩვენი ქვეყნის სუვერენიტეტის გასაძლიერებლად და ეკონომიკური მდგომარეობის გასაუმჯობესებლად, თუნდაც ეს იმ – მხოლოდ ფურცელზე დაწერილი და ჰაერზე ნათქვამი – „სტრატეგიული პარტნიორობის” გადახედვად დაგვიჯდეს“.
ჩინეთის საელჩოს განცხადება
საქართველოში ჩინეთის სახალხო რესპუბლიკის საელჩომ დენიგანის ინტერვიუსთან დაკავშირებით სპეციალური განცხადება გაავრცელა და აშშ-ის ელჩის სიტყვებს “ფაქტებთან სერიოზულად შეუსაბამო” უწოდა.
„გვინდა აღვნიშნოთ, რომ საქართველოში აშშ-ს საელჩოს ხელმძღვანელის განცხადებები, როგორიცაა: “China Communications Construction Company“-ის უმეტესობას „ჩინეთის კომუნისტური პარტია“ ფლობს და China Communications Construction Company და ჩინეთის სახალხო რესპუბლიკა არის რუსეთის არმიის ნომერ პირველი დამფინანსებელი არის აზრს მოკლებული და სერიოზულად შეუსაბამო ფაქტებთან. ჩინური მხარე მკაცრად გმობს მსგავს განცხადებას”.
ჩინურმა მხარემ ხაზი უნდა გაუსვას, რომ ზემოაღნიშნული განცხადება ეწინააღმდეგება პრეზიდენტ სი ძინპინისა და პრეზიდენტ ჯო ბაიდენის მიერ დადგენილ სან-ფრანცისკოს ხედვას. ჩინური მხარე ასევე წუხს იმ ფაქტის გამო, რომ ამერიკელმა დიპლომატმა განცხადების გაკეთებისას არ გამოიჩინა პროფესიონალიზმი“, – აღნიშნულია განცხადებაში.
2024 წლის 29 მაისს საქართველოს მთავრობამ გამოაცხადა, რომ ანაკლიის პორტის 49 პროცენტიან წილს ჩინურ-სინგაპურული კონსორციუმი ჩაიბარებს. კონსორციუმში, რომელთანაც საქართველოს მთავრობა ანაკლიის პორტზე კონტრაქტს უახლოეს მომავალში ოფიციალურად გააფორმებს, შედიან „ჩინეთის კომუნიკაციების მშენებლობის კომპანია“ (China Communications Construction Company Limited – CCCC); „ჩინეთის პორტების ინვესტიციები“ (China Harbour Investment CHI). კონსორციუმს, თავის მხრივ, ორი მნიშვნელოვანი კონტრაქტორი ჰყავს: „ჩინეთის გზებისა და ხიდების კორპორაცია“ (China Road and Bridge Corporation – CRBC) და „ცინდაოს საერთაშორისო პორტი“ (Qingdao Port International – QPI).
ყველა ზემოთჩამოთვლილ კომპანია სახელმწიფო კომპანიაა.
