აშშ-ის ელჩი საქართველოში, კელი დეგნანი “ნეტგაზეთთან” ინტერვიუში ამბობს, რომ რა ტერმინიც არ უნდა გამოვიყენოთ მოსამართლეთა სანქცირებასთან დაკავშირებით, შედეგი იგივეა – ამ პირებსა და მათი ოჯახის წევრებს არ შეუძლიათ აშშ-ს საზღვრის გადაკვეთა.
“აშშ-ის კანონმდებლობით საკმაოდ ნათელია, რას ნიშნავს ეს სანქციები და რატომ არის ისინი საჭირო აშშ-ის კანონმდებლობაში, როცა გვაქვს საკმარისი და სანდო მტკიცებულებები კორუფციულ ქმედებებში მონაწილე პირების შესახებ. არ აქვს მნიშვნელობა, რომელ ტერმინს გამოიყენებ. შედეგები ერთნაირია: ამ პირებს არ აქვთ უფლება, შევიდნენ აშშ-ში.” – ამბობს დეგნანი.
ელჩის განმარტებით, მოსამართლეების საქმიანობის შესახებ ინფორმაციის დიდი ნაწილი საჯარო იყო და თუ საქართველოს ხელისუფლება გადაწყვეტს გამოძიების წარმოებას – “ნებისმიერი სანდო და დამოუკიდებელი” გამოძიება იმავე შედეგამდე მივა.
“რაც შეეხება ინფორმაციის გაზიარებას, გადაწყვეტილების საფუძველი განსხვავებული, მათ შორის საჯაროდ ხელმისაწვდომი, წყაროებისგან მიღებული ინფორმაციაა. თუ საქართველოს ხელისუფლებას სურს საკუთარი გამოძიების წარმოება ამ ბრალდებებთან დაკავშირებით, ინფორმაციის დიდი ნაწილი ცნობილია, ფართოდ ცნობილია წლების განმავლობაში. დარწმუნებული ვარ, რომ ნებისმიერი სანდო და დამოუკიდებელი გამოძიება იმავე შედეგამდე მივა”. – თქვა ელჩმა.
8 აპრილს“ქართული ოცნების” თავმჯდომარემ, ირაკლი კობახიძემ განაცხადა, რომ კლანის მოსამართლეების სანქცირებისთვის აშშ-ს საჭირო მტკიცებულებები არ ჰქონდა, და ოცნების მხრიდან მათი მოთხოვნის შემდეგ “აშშ-ის ელჩს მოუწია უკან დახევა” და იმის თქმა, რომ ეს არის არა სანქცია, არამედ მოსანქციო რამ ანუ სავიზო შეზღუდვაა.
თითქმის იმავეს იმეორებს პარლამენტის თავმჯდომარე შალვა პაპუაშვილი და ამტკიცებს, რომ კელი დეგნანი არასწორ ტერმინს იყენებს და ეს არა თუ მოსამართლეების სანქცირება, არამედ სავიზო შეზღუდვაა.
10 აპრილს პრემიერმინისტრმა ირაკლი ღარიბაშვილმა ასევე მხარდაჭერა გამოუცხადა ქართველ მოსამართლეებს და განაცხადა, რომ “ამაყობს” სასამართლოებით და მოსამართლეებით. როგორც პრემიერმა განმარტა, მათი მმართველობის დროს, სასამართლო ყოველგვარი ჩარევებისგან თავისუფალი და დამოუკიდებელი გახდა.
ამასთან, პრემიერმინისტრი საქართველოს უზენაესი სასამართლოსა და იუსტიციის უმაღლესი საბჭოს თავმჯდომარეს, ნინო ქადაგიძესა და მოსამართლეებს შეხვდა. ნინო ქადაგიძემ შეხვედრის შემდეგ ღარიბაშვილს მხარდაჭერისთვის მადლობა გადაუხადა და თქვა, რომ საჭიროა მთავრობა რიგ საკითხებში ჩაერიოს.
5 აპრილს, ამერიკის სახელმწიფო დეპარტამენტმა “მნიშვნელოვანი კორუფციული საქმიანობის გამო” მოსამართლეებს მიხელ ჩინჩალაძეს, ლევან მურუსიძეს, ირაკლი შენგელიას და ვალერიან ცერცვაძეს, ასევე მათი ოჯახის წევრებს, სანქციები დაუწესა და შეერთებულ შტატებში შესვლა აუკრძალა. ამის შესახებ აშშ-ს სახელმწიფო მდივნის, ენტონი ბლინკენის განცხადებაშია ნათქვამი.
ენტონი ბლინკენი აღნიშნავს, რომ მათ, როგორც სასამართლოს თავმჯდომარეებმა და იუსტიციის უმაღლესმა წევრებმა, ბოროტად გამოიყენეს საკუთარი თანამდებობები.
დამოუკიდებელი ექსპერტები და უფლებადამცველები უკვე წლებია აღნიშნავენ, რომ ლევან მურუსიძე და მიხეილ ჩინჩალაძე საქართველოში ხელმძღვანელობენ ე.წ. მოსამართლეთა მძლავრ „კლანს“, რომელიც ბლოკავს საქართველოსა და ევროკავშირს შორის კავშირების გასაძლიერებლად საჭირო რეფორმებს.
ორივე მოსამართლე დაკავშირებულია ძლიერ ორგანოსთან, რომელსაც ჰქვია იუსტიციის უმაღლესი საბჭო, რომელიც ქვეყნის სასამართლო ხელისუფლების მთავარი ზედამხედველობის ორგანოა. ითვლება, რომ მათ ასევე აქვთ ფარული ურთიერთობა ბიძინა ივანიშვილთან, საქართველოს უმდიდრეს ადამიანთან, “ქართული ოცნების” დამფუძნებელთან და ქვეყნის არაფორმალურ მმართველად.
მურუსიძე წინა ხელისუფლების ლოიალობითაც გამოირჩეოდა – სანდრო გირგვლიანის გახმაურებული საქმის მოსამართლე იყო ნაციონალური მოძრაობის დროს. მურუსიძის სახელს სანდრო გირგვლიანის მკვლელობის საქმეში ბრალდებულებისთვის სასჯელის შემსუბუქება უკავშირდება.
სასამართლო სისტემის გაუმჯობესების შესახებ პუნქტი ჩაიწერა შარლ მიშელის 19 აპრილის შეთანხმებაშიც. მოგვიანებით რამდენჯერმე გააკეთა განცხადება აშშ-ის ელჩმაც. თუმცა, ხელისუფლებამ დანიშვნების პროცესი არ შეაჩერა და უზენაეს სასამართლოში უვადო მოსამართლეების დანიშვნა გააგრძელა.
31 ოქტომბერს, მოსამართლეთა კონფერენციამ იუსტიციის უმაღლესი საბჭოს 2 ახალი მოსამართლე წევრი აირჩია: პაატა სილაგაძე და გიორგი გოგინაშვილი. მიჩნეულია, რომ სილაგაძე და გოგინაშვილი ე.წ მოსამართლეთა კლანის წევრები არიან, ამასთან, ორივე მათგანი განწესებულია თბილისის სააპელაციო სასამართლოს უვადო მოსამართლედ.
