ჰარცელი: სააკაშვილის მხარდამჭერ წერილზე ხელმომწერები მნიშვნელოვან როლს ასრულებენ

საქართველოში ევროკავშირის ელჩი კარლ ჰარცელი ამბობს, რომ ის ევროპარლამენტარები, რომლებმაც ხელი მოაწერეს სააკაშვილის მხარდამჭერ წერილს, ევროკავშირის საგარეო პოლიტიკაში მნიშვნელოვან როლს ასრულებენ, ისევე როგორც აღმოსავლეთ პარტნიორობის რეგიონთან და საქართველოსთან დაკავშირებით. ჰარცელმა აღნიშნა ისიც, რომ არჩევნების მეორე ტურზე დასაკვირვებლად საქართველოში ევროპარლამენტარების კიდევ ერთი მისია ჩამოვა

ელჩის განმარტებით, უშუალოდ წერილზე და ასევე წერილთან დაკავშირებულ საქართველოს მთავრობის წევრების გამოხმაურებაზე კომენტარს არ გააკეთებს, თუმცა ევროკავშირის დელეგაცია ყურადღებით ადევნებს თვალს სააკაშვილის საქმეს.

● რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი
● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?

“ჩვენთვის ფოკუსია ფუნდამენტური უფლებები და კანონის უზენაესობა. რაც ფუნდამენტური საწყისი წერტილებია ევროკავშირისთვის. ველით, რომ ვნახავთ გამჭვირვალე, სამართლიან და შესაფერის სამართლებრივ პროცესს მის წინააღმდეგ დაკავშირებულ საქმეებთან”, – თქვა ჰარცელმა.

მისივე თქმით, ევროკავშირი მიყვება ისეთი ინსტიტუციების რჩევას, როგორიცაა სახალხო დამცველი, რადგან ეს არის ასეთ საკითხებთან დაკავშირებული ძირითადი ინსტიტუცია.

ციხეში მყოფი საქართველოს ყოფილი პრეზიდენტის, მიხეილ სააკაშვილის პატიმრობასთან დაკავშირებით ექვსმა ევროპარლამენტარმა საერთო განცხადება გაავრცელა, სადაც აღნიშნავენ, რომ სააკაშვილი უნდა გათავისუფლდეს, სანამ მის საქმეს ადამიანის უფლებათა ევროპული სასამართლო განიხილავს. განცხადებას ხელს ანდრიუს კუბილიუსი, რასა იუკნევიჩიენე, რიჰო ტერასი, მირიამ ლექსმანი და სანდრა კალნიეტე აწერენ.

ორი დღით ადრე, 19 ოქტომბერს გავრცელდა მიხეილ სააკაშვილის მხარდამჭერი კიდევ ერთი  წერილი, რომელიც, ევროპარლამენტარ ანა ფოტიგას ინიციატივით შედგა და რომელსაც 72 ხელმომწერი ჰყავს. ევროპარლამენტარებთან ერთად, ხელმომწერებს შორის არიან ლიეტუვის სეიმის წევრები, ყოფილი პრეზიდენტები, ცნობილი პოლიტიკური და საზოგადო მოღვაწეები.

ევროპარლამენტარების წერილებს საქართველოს პრემიერი ირაკლი ღარიბაშვილი კრიტიკულად გამოეხმაურა და განაცხადა: “ვინ არის საერთოდ ფოტიგა? რატომ ბედავენ ამდენს?”

პრემიერმა თქვა ისიც, რომ არც ფოტიგა, არც კუბილიუსი და არავინ “ჩემთვის არაფერს არ წარმოადგენენ.”

“ევროპარლამენტში 700 დეპუტატია, ჩვენ ვერც ფოტიგას ჭკუით ვივლით და ვერც კუბილიუსის. ყველამ მიხედოს თავის ქვეყანას. ამ ქვეყანაში კანონის აღსრულებას წინ ვერავინ აღუდგება”, – დასძინა ღარიბაშვილმა.

ევროკავშირის ელჩმა ისაუბრა მოახლოებული მეორე ტურების შესახებაც და განაცხადა, რომ ამ არჩევნებზე დასაკვირვებლად  საქართველოში ევროპარლამენტარების კიდევ ერთი მისია ჩამოვა. უფრო კონკრეტულად, ოთხი ევროპარლამენტარი არჩევნებს ODHIR-ის მისიასთან ერთად დააკვირდება.

“ვფიქრობ, ეს ძალიან მნიშვნელოვანი იყო პირველი ტურში და მნიშვნელოვანი იქნება მეორე ტურშიც და შუალედურ პერიოდში”, – თქვა ჰარცელმა.

ელჩმა დადებით ტენდენციებთან ერთად, ხაზი გაუსვა იმ ხარვეზებსაც, რომლებიც ნათლად ჩანდა პირველი ტურის საარჩევნო პერიოდში: დაშინება, მოსყიდვა, უთანასწორო გარემო, წნეხი ამომრჩევლებსა და პოლიტიკოსებზე.

“ჩვენ აღვნიშნეთ დადებითი, რაც მოხდა წინა არჩევნების შემდეგ. ვფიქრობთ, რომ არჩევნების სამართლებრივი ჩარჩო გაძლიერდა, მათ შორის საარჩევნო რეფორმით, რომელიც 19 აპრილის შეთანხმებას მოჰყვა, ჩვენ ვნახეთ მოწესრიგებული, მშვიდი გარემო არჩევნების დღეს. იმედი გვაქვს, რომ ეს გაგრძელდება მეორე ტურშიც. ამასთანავე, არჩევნების პირველ ტურში ჩვენ ნათლად ვიხილეთ ხარვეზები. ვსაუბრობ, დაშინებაზე, მოსყიდვაზე, უთანასწორო გარემოზე, წნეხზე​ ამომრჩევლებსა და პოლიტიკოსებზე. ჩვენი ძლიერი გზავნილი არჩევნების შემდეგ იყო, რომ იმედი გვაქვს, ბევრი ეს ხარვეზი გამოსწორდება მეორე ტურისთვის, რადგან როგორც განცხადებაში აღვნიშნეთ, იმედი გვაქვს, რომ ეს პრაქტიკა არ გახდება ნორმა საქართველოს არჩევნებზე”, – თქვა ჰარცელმა.

● თავისუფლება მიშას: რას ფიქრობენ ექსპერტები ბოლო ცხრა წლის ყველაზე ხალხმრავალ აქციაზე
● უკრაინული მიშა
● ხუთი ნიშანი, რომელიც მიუთითებს, რომ საქართველოში თვითმმართველობა არ არის

2 ოქტომბერს, საქართველოში ადგილობრივი თვითმმართველობის არჩევნები გაიმართა. მოსახლეობას უნდა აერჩია 64 მერი და საკრებულოს 2044 დეპუტატი. ძირითად თვითმმართველ ქალაქებში მეორე ტურები ჩაინიშნა (მათ შორის თბილისში, ქუთაისში, რუსთავში, ზუგდიდში და თელავში), სწორედ მეორე ტურებისთვის ემზადება ოპოზიცია 30 ოქტომბერს. მათ უკვე დაასახელეს ე.წ. ჩრდილოვანი კაბინეტი.

მერის არჩევნებში ის კანდიდატი გაიმარჯვებს, რომელიც არჩევნებში ამომრჩეველთა ხმების 50%-ზე მეტს მიიღებს. ამასთან, საარჩევნო რეფორმის შედეგად, 40%-იანი ბარიერი მოქმედებს საკრებულოების მაჟორიტარი წევრების ასარჩევად.

ეს არჩევნები, თავისი მნიშვნელობით, ოპოზიციამ და არამხოლოდ ოპოზიციამ, მისი დანიშვნის დღიდანვე შეაფასა რეფერენდუმის ტოლფასად.