ჩემზე რომ იყოს დამოკიდებული, ჰერჩინსკის ქვეყნიდან გავაძევებდი – ამის შესახებ თბილისის მერის, კახა კალაძემ განაცხადა. კალაძემ აღნიშნული კომენტარი მედიასთან მას შემდეგ გააკეთა, რაც ჟურნალისტებმა ჰერჩინკის მიერ IPN-თან ინტერვიუში გაკეთებულ განცხადებაზე ჰკითხეს.
18 ივლისს, ინტერვიუში ევროკავშირის ელჩმა განაცხადა, რომ საქართველოს ევროკავშირის გზაზე დაბრუნების და მიმდინარე კრიზისის მოგვარების ერთადერთი გზა, “რეპრესიების შეჩერება, უსამართლოდ დაკავებულთა გათავისუფლება, რეპრესიული კანონმდებლობის გაუქმება და ღია დიალოგის უზრუნველყოფა არის”.
პაველ ჰერჩინსკიმ ინტერვიუში ასევე თქვა, რომ ევროკომისიის რეკომენდაციების შეუსრულებლობამ, შესაძლოა, შემდგომი ზომების მიღება გამოიწვიოს, მათ შორის ევროკავშირის გადაწყვეტილება უვიზო რეჟიმის შეჩერების მექანიზმის გააქტიურების შესახებ. მისივე განმარტებით, ასეთი გადაწყვეტილების მისაღებად ყველა წევრი სახელმწიფოს ერთსულოვნება საჭირო არაა, კვალიფიციური უმრავლესობაც საკმარისია.
კალაძის შეფასებით, “ქართული ოცნების” რეჟიმს უსამართლოდ დაკავებულები არ ჰყავს და ევროკავშირის ელჩი სტატუსს იყენებს და მავნებლობს.
“ყველაზე დიდი უბედურება არის ის, რასაც ვისმენთ ევროკავშირის ელჩისგან, რასაც ვისმენდით არჩევნების პროცესში, მე არ ვიცი როდის გააკეთა ეს განცხადება, მაგრამ თუ მართლა გააკეთა ქვეყნიდან გასაგდებია, მე თუ მკითხავთ. თუ ამ ტიპის განცხადებას აკეთებს ევროკავშირის ელჩი, როდესაც შენ გყავს კონკრეტული დამნაშავეები, და რა თქმა უნდა, ესეც იმ პოლიტიკის გაგრძელებაა, რასაც ჩვენ ვხედავთ საქართველოსთან მიმართებით.
მის სტატუსს იყენებს, მავნებლობს, ცხადია, ის ასრულებს დავალებას, რასაც ეუბნებიან იმას აჟღერებს.
ეს ჩემი დამოკიდებულება და ჩემი ხედვა არის კონკრეტულ საკითხთან დაკავშირებით, ჩემზე რომ იყოს დამოკიდებული, რა თქმა უნდა, გავაძევებდი, იმიტომ რომ პატივი უნდა სცენ პირველ რიგში, ქართულ სახელმწიფოებრიობას” – ამბობს კახა კალაძე.
