"განვიხილეთ უვიზო რეჟიმის შეჩერება" - კაია კალასი განმარტავს წერილს, რომელიც საქართველოსთვის რეკომენდაციებს მოიცავს
კაია კალასი წერილს განმარტავს
ევროკავშირის უმაღლესი წარმომადგენელი საგარეო საქმეთა და უსაფრთხოების საკითხებში, კაია კალასი განმარტავს წერილის შინაარს, რომელიც საქართველოსთვის რეკომენდაციებს მოიცავს და “დედლაინად“ 31 აგვისტო სახელდება.
კაია კალასის თქმით, თუ რეკომენდაციები არ შესრულდება, ამას შედეგები მოყვება, რათა საზოგადოებამაც დაინახოს, რომ მისი მთავრობა ევროპულ გზაზე არ არის და კანდიდატის სტატუსს სერიოზულად არ აღიქვამს.
ევროკომისრის განმარტებით, არის რეკომენდაციები, რომლებიც საქართველოს ვიზალიბერალიზაციის შეჩერების ანგარიშში გადაეცა.
რა თქვა კაია კალასმა
“საქართველოზე დემოკრატიის წინააღმდეგ მიმართული თავდასხმა “ქართულ ოცნებასა“ და ბიძინა ივანიშვილს უკავშირდება და ვითარება სულ უფრო მწვავდება. დღეს მინისტრებმა განიხილეს ევროკავშირის მხარდაჭერა სამოქალაქო საზოგადოებისთვის და სხვადასხვა ვარიანტი – რას შეიძლება კიდევ ვაკეთებდეთ. განხილულ ზომებს შორისაა ვიზალიბერალიზაციის შეჩერება, ასოცირების შეთანხმების გათიშვა და სანქციები. საქართველოს დემოკრატიის უკუსვლას ექნება თავისი ფასი.
საქართველოსადმი გაგზავნილ წერილს რაც შეეხება: როგორც იცით, უვიზო მოგზაურობის რეჟიმი საქართველოსთვის 2017 წლიდან გვაქვს. ეს დიდი სარგებელია, რომელსაც ევროკავშირი აძლევს ქვეყნებს და, შესაბამისად, არის რეკომენდაციები, რომლებიც გადაეცა საქართველოს ვიზის შეჩერების ანგარიშში. ამას მთლიანად არ წავიკითხავ აქ, უბრალოდ აღვნიშნავ რაღაცებს.
მაგალითად ვალდებულებები, რომლებიც საქართველოს მთავრობას აქვს – უზრუნველყოს და დაიცვას საქართველოს ყველა მოქალაქის ფუნდამენტური უფლებები, მათ შორის შეკრებისა და გამოხატვის თავისუფლებები, პრივატულობის უფლება, საჯარო საქმეებში მონაწილეობის უფლება, და ასევე დისკრინიმაციის აკრძალვა – ეს მხოლოდ ერთი პუნქტია. კიდევ 8 მსგავსი პუნქტია. ასე რომ, ვინაიდან, მათ ეს “დედლაინი” მიეცათ აგვისტოს ბოლომდე ამის შესასრულებლად, კითხვაა – როგორ რეაგირებას მოვახდენთ, თუ რეკომენდაციები არ შესრულდება? და როდესაც გვესმის, მაგალითად, რომ 8-დან 7 ოპოზიციონრი ლიდერი ციხეში ჩასვეს, ეს არ შეესაბამება პირველ პუნქტს, რომელიც აღვნიშნე.
ასე რომ, აქამდე პოზიცია გვქონდა, რომ არ გვინდა ქართველი ხალხისთვის ზიანის მიყენება უვიზო მიმოსვლის გაუქმებით, რომელსაც მართლა აქვს მათთვის მნიშვნელობა, თუმცა, ამავდროულად, ეს ასევე, ევროკავშირის სანდოობის საკითხია. თუ ეს რაღაცეები გვაქვს და ეს სარგებლიანი რამეა – ბონუსია, რომელსაც ქვეყანას ვაძლევთ, რომელიც არ ასრულებს პირობებს – ამას შედეგები მოყვება, რათა საზოგადოებამაც დაინახოს, რომ მთავრობა ევროპულ გზაზე არაა და კანდიდატის სტატუსს სერიოზულად არ აღიქვამს.
“ქართული ოცნების” მიერ დემოკრატიაზე თავდასხმა სულ უფრო მძიმე ხდება. დღეს [ევროკავშირის] მინისტრებმა შეაფასეს სამოქალაქო საზოგადოებისადმი ევროკავშირის მხარდაჭერა და სხვადასხვა ვარიანტები განიხილეს – მეტი რისი გაკეთება შეგვიძლია.
ეს მოიცავს უვიზო რეჟიმის შეჩერებას, ასოცირების შეთანხმების შეჩერებასა და სანქციებს. საქართველოს დემოკრატიულ უკუსვლას შედეგები მოყვება.” – განაცხადა კალასმა.
