ჯანმრთელობის მდგომარეობის გამო, სააკაშვილმა სასამართლო პროცესზე დასწრება ვერ შეძლო

სააკაშვილმა სასამართლო პროცესზე მისვლა ვერ შეძლო

თბილისის საქალაქო სასამართლოში საქართველოს მესამე პრეზიდენტის, მიხეილ სააკაშვილის ე.წ. საზღვრის კვეთის საქმის პროცესი დაიწყო და მასზე დასწრების სურვილი მიხეილ სააკაშვილმა თავად გამოთქვა. თუმცა, ჯანმრთელობის გაუარესებული მდგომარეობის გამო, ექსპრეზიდენტმა სხდომაზე დასწრება ვერ შეძლო. მოსამართლე ნინო ჩახნაშვილმა განაცხადა, რომ სხდომა თარიღის განსაზღვრის გარეშე გადაიდო.

“ნაციონალური მოძრაობის” წევრი ხატია დეკანოიძე ამბობს, რომ ექიმები სააკაშვილს სასამართლო პროცესზე დასწრების რეკომენდაციას არ აძლევენ, რადგან მისი მდგომარეობა ეტაპირების დროს, შესაძლოა, უფრო დამძიმდეს. პასუხისმგებლობას ვერ იღებს ვერც პენიტენციური სამსახური.

როგორც დეკანოიძემ კლინიკა “ვივამედიდან” გამოსვლის შემდეგ ჟურნალისტებს განუცხადა, სააკაშვილის მდგომარეობა კიდევ უფრო დამძიმებულია, მას ნევროლოგიური პრობლემებიც აქვს. დეკანოიძე ამბობს, რომ ხელისუფლებას ასევე არ სურს მესამე პრეზიდენტის ეკრანებზე გამოჩენა, რათა მისი დამძიმებული მდგომარეობა დამალონ.

“მჯერა, რომ არ უნდათ [მისი გამოჩენა] და როგორ გამოიყურება სააკაშვილი არ ნახოს მთელმა მსოფლიომ. პენიტენციური ამბობს, ვინაიდან ექიმები აცხადებენ, რომ ისინი ვერ იღებენ პასუხისმგებლობას, ისინი ამბობენ, რომ ის არ ექვემდებარე მანქანით გადაყვანას, ამ პასუხისმგებლობას ვერ ავიღებთ”, – განაცხადა ხატია დეკანოიძემ.

“ვივამედის” დირექტორის, ნინო ნადირაძის განმარტებით, ამ ეტაპზე საქართველოს მესამე პრეზიდენტის, მიხეილ სააკაშვილის ტრანსპორტირება არ იყო გამართლებული. მისივე თქმით, პარასკევს ჩატარდა ნევროლოგის კონსულტაცია, რომელმაც აღნიშნა უარყოფითი დინამიკა და დაინიშნა შესაბამისი კვლევები. როგორც ნადირაძე ამბობს, დღეს და ხვალ კლინიკა ამ კვლევებს კიდევ ჩაატარებს.

“განისაზღვრება შემდგომი მკურნალობის ტაქტიკა და გადაყვანაზე გითხარით, არც ერთ შემთხვევაში, ჩვენ არც ერთ ეტაპზე მისი აქ ყოფნისას სასამართლოში წაყვანის და ტრანსპორტირების ნებართვა არ გაგვიცია. ჩვენ, ექიმები მივიჩნევთ, რომ ამ ეტაპზე ტრანსპორტირება არ იყო გამართლებული.” – თქვა “ვივამედის” დირექტორმა.

● მედია, პოლიტიკური დევნა, სააკაშვილი და სხვა – ევროპარლამენტმა საქართველოზე კომპრომისული რეზოლუცია მიიღო
● “სააკაშვილის პოლიტპატიმრად მოხსენიების გამო” – მმართველმა პარტიამ მხარი არ დაუჭირა PEACE-ს ისტორიულ რეზოლუციას
● სააკაშვილის საქმეები. რისთვის ზის ციხეში ყოფილი პრეზიდენტი

მიმდინარე წლის 6 ოქტომბერს, სახელმწიფო დაცვის სპეციალური სამსახურის უფროსმა თემურ ჯანაშიამ, რომელმაც ექსპრეზიდენტი კლინიკა “ვივამედში მოინახულა”, განაცხადა, რომ “მიხეილ სააკაშვილი ფაქტობრივად, ადამიანი აღარ არის, აქვს 38-მდე სიცხე, წნევა 170, საკვებს და წამლებს ვერ იღებს, არის ლოგინში.” 

ხოლო ამერიკელმა ექსპერტმა შაჰინ ლახანმა საქართველოს მესამე პრეზიდენტის მონახულების შემდეგ განმარტა, რომ ყველა კვლევა აჩვენებს მწვავე დეფიციტს, ყველა იმ “სასიცოცხლო მაჩვენებლისა, რაც ნორმალურ ადამიანს, ნორმალური ჯანდაცვის პირობებში არ უნდა ჰქონდეს.”

კლინიკაში სააკაშვილი მოინახულა მისმა უცხოელმა ადვოკატმა მასიმო დანჯელომაც. მისი თქმით, სააკაშვილის ჯანმრთელობის მდგომარეობა მნიშვნელოვნად არის დეგრადირებული. როგორც ადვოკატი განმარტავს,  მიხეილ სააკაშვილს აქვს „სასიცოცხლო საფრთხე“, თუკი მისი სასიცოცხლო მაჩვენებლების გაუმჯობესება არ დაიწყება.

საქართველოს პრეზიდენტმა, სალომე ზურაბიშვილმა 24 ნოემბერს განაცხადა, რომ მიხეილ სააკაშვილის ჯანმრთელობის მდგომარეობა ქვეყნის რეპუტაციისთვის მნიშვნელოვანია და თუ ჯანმრთელობის მდგომარეობა “ამ დონეზეა დაზიანებული”, სასამართლომ უნდა მიიღოს ღირსეული გადაწყვეტილება.

საქართველოს სახალხო დამცველთან არსებული კონსილიუმის შეფასებითაც, რომელიც მიმდინარე წლის აპრილში გამოქვეყნდა, საქართველოს პატიმარი ექსპრეზიდენტის, მიხეილ სააკაშვილის ჯანმრთელობის მდგომარეობა მნიშვნელოვნადაა დამძიმებული. ოჯახი, მის საზღვარგარეთ სამკურნალოდ გადაყვანას ითხოვს. 

საქართველოში აშშ-ის ელჩმა კელი დეგნანმა საქართველოს მთავრობას მოუწოდა, საქართველოს მესამე პრეზიდენტის, მიხეილ სააკაშვილის ჯანმრთელობის საკითხზე სახალხო დამცველის რეკომენდაციებს სერიოზულად მიუდგეს.

უკვე 1 წელზე მეტია, მიხეილ სააკაშვილი, დაპატიმრებულია. ექსპრეზიდენტი დააპატიმრეს მას შემდეგ, რაც ის 2021 წლის 1 ოქტომბერს, ფარულად დაბრუნდა საქართველოში.