ივანიშვილმა Credit Suisse-ს დავა ლონდონშიც მოუგო, თუმცა შესაძლოა, სანქციების გამო მან $607 მლნ ვერ მიიღოს
ივანიშვილის და Credit Suisse-ის დავა
საქართველოს არაფორმალურმა მმართველმა, ბიძინა ივანიშვილმა Credit Suisse-ს ლონდონის სააპელაციო სასამართლოში 667 მილიონი დოლარისთვის დავა მოუგო. შვეიცარიული ბანკის საჩივარი არ დაკმაყოფილდა, რაც იმას ნიშნავს, რომ ბანკმა ივანიშვილს ფული უნდა გადაუხადოს, თუმცა, ამერიკული სანქციების გამო, ივანიშვილი სავარაუდოდ, ფულს ვერ მიიღებს.
სასამართლოს გადაწყვეტილებით, სადაზღვევო კომპანიამ დაარღვია ხელშეკრულებით აღებული ვალდებულებები და დაახლოებით $750 მილიონის აქტივების სწორი დისკრეციული მენეჯმენტი, რის გამოც საბოლოოდ ძალაში დარჩა $607 მილიონის კომპენსაცია.
თუმცა, საბჭომ უარყო ივანიშვილის საჩივარი თაღლითური შეცდომაში შეყვანის შესახებ და დაადგინა, რომ აღნიშნული შუამდგომლობა საქართველოს კანონით დადგენილი ვადის გასვლის გამო აღარ განიხილებოდა.
4 დღით ადრე, 20 ნოემბერს გამოქვეყნებულ წერილში ივანიშვილის ადვოკატი თეიმურაზ წიქვაძე აცხადებდა:
“ბიძინა ივანიშვილმა ზუსტად იცის, რომ რა შედეგებითაც უნდა დასრულდეს სასამართლო და, სავარაუდოდ, ორი ინსტანციის კვალდაკვალ მესამე ინსტანციაშიც გავიმარჯვებთ, ამ თანხების დაბრუნება არ მოხდება“.
წიქვაძემ განავითარა თეორიას, რომლის მიხედვითაც, “ქართული ოცნების“ დამფუძნებელი 2008 წლიდან იდევნება”დიპ სტეიტის“ მხრიდან – ამ თეორიაში “კრედიტ სუისში“ მომუშავე ბანკირი პატრის ლესკადრონი, რომელსაც ის ივანიშვილის მძარცველად მიიჩნევს, “დიპ სტეიტის“ მიერ გადაბირებული პირი იყო, რომელიც “წლების შემდეგ ტყეში, ხეზე ჩამოკიდებული იპოვეს“.
“სპეცსამსახურებმა საქმე იქამდე მიიყვანეს, რომ ბიძინა ივანიშვილთან პოლიტიკური დევნის პროცესში მთლიანად ჩამოანგრიეს შვეიცარიის საბანკო სისტემის პრესტიჟი, ხოლო ერთ დროს მსოფლიოში ნომერ პირველი ბანკი „კრედიტ სუისი“ გაკოტრებამდე მიიყვანეს“, – აცხადებდა ადვოკატი.
აშშ-მა ბიძინა ივანიშვილს ფინანსური სანქციები 2004 წლის 27 დეკემბერს დაუწესა. OFAC-ის სიის თანახმად, ივანიშვილის სანქცირება რუსეთის წინააღმდეგ დაწესებული სანქციების პაკეტის ნაწილია.
როგორც ცნობილია, ივანიშვილის მთელი ქონება, რომელიც შეერთებულ შტატებში და აშშ-ის მოქალაქეების მფლობელობაში ან კონტროლშია, დაიბლოკება.
ამასთან, OFAC-ის თანახმად, ტრანზაქციების შეჩერება ეხება მათ შორის სინგაპურის დავაში მოგებული დავის ფარგლებში მისთვის მიკუთვნებული კომპენსაციის ჩარიცხვას. აღნიშნულთან მიმართებით ნათქვამია, რომ ივანიშვილს აღნიშნული თანხის მიღება შეეძლება მხოლოდ მაშინ თუკი OFAC-ი შესაბამის თანხმობას გასცემს.
აღსანიშნავია, რომ გაერთიანებული სამეფოს თემთა პალატის 15-მა წევრმა აღმასრულებელ ხელისუფლებას ბიძინა ივანიშვილისთვის სანქციების დაწესების მიზნით 13 იანვარს მიმართა.
“საერთაშორისო გამჭვირვალობა საქართველოს” (TI) ცნობით, დიდი ბრიტანეთის მიერ ბიძინა ივანიშვილის და მისი ოჯახის წევრების დასანქცირების შემთხვევაში, ფინანსურ სანქციებში მოყვება ივანიშვილების ოჯახის თითქმის მთელი ბიზნეს იმპერია, რადგან ეს კომპანიები, საბოლოო ჯამში, სწორედ გაერთიანებული სამეფოს ოფშორულ ტერიტორიებზეა რეგისტრირებული (ბრიტანეთის ვირჯინიის კუნძულები და კაიმანის კუნძულები).
