ბიძინა ივანიშვილი შვეიცარიულ ბანკს პოლიტიკურ ზეწოლაში ადანაშაულებს. რას ამბობს ხელისუფლება და ოპოზიცია
მმართველი პარტიის, “ქართული ოცნების” დამფუძნებელი და ყოფილი პრემიერ-მინისტრი ბიძინა ივანიშვილი შვეიცარიულ ბანკ Credit Suisse-ს უჩივის და პოლიტიკურ ზეწოლაში ადანაშაულებს.
ეს უკვე მეორე დავა იქნება ივანიშვილის ამ ბანკის წინააღმდეგ. ამჯერად ბიზნესმენი ბანკს გადარიცხვების შეფერხებაში ადანაშაულებს.
ამ ფაქტის გამო, ივანიშვილის მხარდამჭერი განცხადებებით გამოვიდნენ მმართველი პარტიის გულშემატკივრები. შვეიცარული ბანკის უკან ისინი ამერიკის შეერთებული შტატების ინტერესებს ხედავენ.
მსგავსი განცხადებები ისმის მმართველი პარტიის ხელმძღვანელობის მხრიდანაც. პარტიის თავმჯდომარე ირაკლი კობახიძე ამბობს, რომ “ვხედავთ რაღაც კოორდინაციას და ეს კოორდინაცია კითხვებს აჩენს.”
ოპოზიციაში კი აცხადებენ, რომ შვეიცარული ბანკის გარშემო ატეხილმა სკანდალმა და “ქართული ოცნების” ხელმძღვანელობის მიერ გაკეთებულმა განცხადებებმა “ქართული ოცნების” ანტიამერიკული განწყობები კიდევ ერთხელ დაადასტურა.
რა მოხდა
ივანიშვილის მიერ დაქირავებული პიარ კომპანია Cision შვეიცარული ბანკისგან ითხოვს დიდი ფინანსური ზარალის ანაზღაურებას, რომელიც ივანიშვილს მას შემდეგ მიადგა, რაც ბანკმა შეაჩერა ოპერაციები Green Vals-ის სატრასტო ფონდში, რომელიც შეიქმნა ბენეფიციარების ინტერესების დასაცავად. (ბენეფიციარები არიან ბიზნესმენები, რომლებმაც მანამდე სასამართლო პროცესი მოიგეს Credit Suisse-სთან დავაში და ბანკს მათთვის თანხის გადახდა დაევალა. მათ შორის იყო ბიძინა ივანიშვილიც, რომელმაც ასევე მოიგო დავა ბანკთან. როგორც Financial Times-ი წერს Credit Suisse-ს ივანიშვილისთვის 800 მილიონი დოლარი უნდა გადაეხადა).
„სავარაუდოდ, ბიძინა ივანიშვილი არა მხოლოდ დისკრიმინაციის, არამედ Credit Suisse-ის მხრიდან პოლიტიკური ზეწოლის მსხვერპლია“, – ნათქვამია განცხადებაში.
აღნიშნულია, რომ ბენეფიციარებმა გადახდა 2022 წლის 4 მარტს მოითხოვეს, თუმცა მათი მოთხოვნა მხოლოდ 4 აპრილს, ერთი თვის დაგვიანებით დაკმაყოფილდა, რამაც ბენეფიციარებს ფინანსური ზიანი მიაყენა.
შეფერხების მთავარ მიზეზად ბანკმა “აღმოსავლეთ ევროპაში გეოპოლიტიკური გარემო” დაასახელა, რაც მას ძირითადი ფუნქციების შესრულებაში ხელს უშლიდა.
თუმცა, PR კომპანია აცხადებს, რომ ბენეფიციარებს, მათ შორის, ივანიშვილს არანაირი კავშირი არ აქვს რუსეთის მიერ უკრაინაში შეჭრასთან და მათ წინააღმდეგ სანქციები არ დაწესებულა.
“ბატონი ივანიშვილი უკიდურესად უკმაყოფილოა იმით, თუ როგორ გრძელდება მისი აქტივების მართვა... ბიძინა ივანიშვილს, საქართველოს ყოფილ პრემიერ-მინისტრს, აქვს ორმაგი მოქალაქეობა მხოლოდ საფრანგეთთან და საქართველოსთან, არ არის და არ შეიძლება იყოს დაკავშირებული სანქცირებული ორგანიზაციებისა და პირების სიასთან. ეს ინფორმაცია ხელმისაწვდომია საჯაროდ, თუმცა რწმუნებულმა ვერ შეძლო ამ საჯაროდ ცნობილი ინფორმაციის დროული გადამოწმება და, სავარაუდოდ, ბატონი ივანიშვილი ბანკისგან არა მხოლოდ დისკრიმინაციის, არამედ პოლიტიკური ზეწოლის კამპანიის მსხვერპლიცაა“, – აღნიშნულია კომპანიის განცხადებაში.
PR კომპანიის ცნობით, უახლოს კვირებში ბიძინა ივანიშვილი საერთაშორისო მედიასთან რამდენიმე პრესკონფერენციის მოწყობას აპირებს:
“რათა დეტალურად აჩვენოს როგორ მუშაობს Credit Suisse, ზოგადად შვეიცარიის საბანკო სისტემა და რამდენად დაუცველი შეიძლება იყოს ნებისმიერი კლიენტი შვეიცარიის ფინანსურ სექტორში ინვესტირებისას.”
ხელისუფლების გამოხმაურება
“თუ ვინმეს აქვს მცდელობა, რომ ბიძინა ივანიშვილი მისი ნების წინააღმდეგ შემოაბრუნოს ქართულ პოლიტიკაში, იმისათვის, რომ ქვეყანა ომში ჩაერთოს, მე მგონია, რომ ეს მინიმუმ მიუღებელი და პრინციპულად არასწორია. თუ ვინმეს ასეთი მცდელობა აქვს, ის ბიძინა ივანიშვილს კარგად არ იცნობს” – ასე აფასებს ქართული ოცნების თავმჯდომარე ირაკლი კობახიძე ბიძინა ივანიშვილსა და Credit Suisse-ს შორის დავას.
მმართველი პარტიის თავმჯდომარეს ჟურნალისტებმა დაუსვეს კითხვა “ქართული ოცნების” სპიკერის და მხარდამჭერის, ხათუნა ხოფერიას ფეისბუქპოსტთან დაკავშირებითაც.
ხათუნა ხოფერია ამბობს: “ომში საქართველოს ჩართვა ნაციონალებისა და მათი უკრაინელი კოლეგების კი არა, არამედ დიდი მოთამაშის ინტერესი და მიზანია. სინამდვილეში, ნაციონალები და უკრაინელები ამ დიდ თამაშში მხოლოდ მეორეხარისხოვანი როლის შემსრულებლები არიან, რადგან შვეიცარიული ბანკის მიერ ტრანზაქციების შეჩერების და ამ მასშტაბის კოორდინაციის ორგანიზების რესურსი მხოლოდ ერთ დიდ მოთამაშეს – ამერიკას აქვს და ივანიშვილთან ევტუშენკოვსაც მათ დაარეკინეს”.
კობახიძე ხათუნა ხოფერიას პოსტზე ამბობს, რომ “ვხედავთ რაღაც კოორდინაციას და ეს კოორდინაცია რომ კითხვებს აჩენს, ეს არის ალბათ ლოგიკური”.
“რა თქმა უნდა, ჩვენთვის გასაკვირი იყო ის განცხადებები, რომელიც კეთდებოდა უკრაინის ხელისუფლების მხრიდან, იყო გაუგებარი კოორდინაცია მაღალი ხარისხით. ჩვენ გვახსოვს უკრაინის პრეზიდენტის აბსოლუტურად აუხსნელი, ალოგიკური გადაწყვეტილება ელჩის გაწვევის და აქაც ჩანდა კოორდინაცია, იყო სხვა შემთხვევებიც, სადაც იყო ალოგიკური მოვლენები. ევტუშენკოვის ზარიც გაუგებარია – ანუ კაცი სანქციებს არ ექვემდებარება, ამას თავის მიზეზი უნდა ჰქონდეს, ახორციელებს ზარს და მერე ეს ზარი ხდება ენმ-სთან დაკავშირებული ტელევიზიებისთვის ერთთვიანი თემა. გამოგონილი თემა გაუგებარი ზარით, ესეც კოორდინაციაზე მიუთითებს.
ამას როცა ემატება შვეიცარიული ბანკიდან… იცით, რომ შვეიცარიული საბანკო სისტემა სანდოობის მაღალი ხარისხით სარგებლობდა ათწლეულების განმავლობაში და მთელი სახელმწიფო სისტემა იდგა პრაქტიკულად ამაზე და როცა ასეთი საბანკო სისტემის ერთ-ერთი ნაწილი, კონკრეტული შვეიცარიული ბანკი აფერხებს ერთი თვის განმავლობაში გადარიცხვას, ეს დამატებით კითხვებს აჩენს.” – განმარტავს კობახიძე.
ოპოზიცია: “კობახიძემ ივანიშვილის ანტიამერიკული განწყობა დაადასტურა”
“ნაციონალური მოძრაობის” ფრაქციის თავმჯდომარის, ხატია დეკანოიძის თქმით, ირაკლი კობახიძის განცხადება ადასტურებს, რომ ბიძინა ივანიშვილის განწყობა ანტიამერიკული და ანტიდასავლურია.
“როდესაც “ქართული ოცნების” თავმჯდომარე ერთ-ერთი ანტიდასავლელი ექსპერტის {საუბარია ხათუნა ხოფერიას პოსტზე – JAMnews], სახელისუფლებო მედიაში მუდმივად პოპულარული ადამიანის კომენტარზე აკეთებს განცხადებას, ეს ნიშნავს, რომ ეს არ არის მხოლოდ ამ კონკრეტული ადამიანის [ხათუნა ხოფერიას] ან კობახიძის აზრი, ეს არის ბიძინა ივანიშვილის პოზიცია და ბიძინა ივანიშვილის პოზიციას იზიარებს ყველა და მათ შორის ირაკლი კობახიძეც. ფაქტია, რომ ხოფერია განცხადებას ისე არ გააკეთებს, თუ არ იქნება ბიძინას პოზიცია”, – განაცხადა ხატია დეკანოიძემ.
ეს არ არის პირველი შემთხვევა, როდესაც ბიძინა ივანიშვილი Credit Suisse-თან სასამართლო დავაში ჩაება. 24 მარტს Financial Times-მა გამოაქვეყნა ინფორმაცია იმის შესახებ, რომ შვეიცარიულმა ბანკმა ბიძინა ივანიშვილის წინააღმდეგ ბერმუდის სასამართლოში დავა წააგო.
ექსპრემიერი Credit Suisse-ს უჩიოდა ბრალდებით, რომ ბანკმა ვერ შეძლო აღეკვეთა მისი პირადი ბანკირის, პატრიკ ლესკოდრონის თაღლითობა, რის შედეგადაც ივანიშვილმა ქონებიდან დაახლოებით $400 მილიონი დაკარგა, როცა ამის ცხადი ნიშნები ჩანდა.
