როგორ აშენებს ივანიშვილი აბასთუმანს. "საერთაშორისო გამჭვირვალობის" ანგარიში
ივანიშვილი აბასთუმანში
საქართველოს ყოფილი პრემიერ-მინისტრის, ბიძინა ივანიშვილის ერთ-ერთი მორიგი გატაცება კურორტ აბასთუმანს უკავშირდება. უკვე ხუთ წელზე მეტია დაბაში სარეაბილიტაციო სამუშაოები მიმდინარეობს.
მილიარდერმა მთლიანად შეცვალა ამ დაბის ცხოვრება – შეისყიდა აქ არსებული სანატორიუმები, მიწები, ჩაკეტა დაბა ავტომანქანებისთვის.
შედეგად, აბასთუმანი საერთაშორისო დონის კურორტად უნდა იქცეს, რომლის შუაგულში ივანიშვილის ოჯახის რეზიდენცია იქნება.
არასამთავრობო ორგანიზაციამ “საერთაშორისო გამჭვირვალობა – საქართველომ” შეისწავლა პროექტის მიმდინარეობა და ამ საკითხზე სპეციალური ანგარიში გამოაქვეყნა. ორგანიზაცია მიუთითებს, რომ პროექტში ივანიშვილთან დაკავშირებულ კომპანიებთან ერთად ჩართულია მთელი სახელმწიფო მანქანა და იკვეთება კორეუფციის ნიშნები.
როგორც კვლევაში ვკითხულობთ, აბასთუმნის მაგალითმა წარმოაჩინა, თუ როგორ იყენებს ბიძინა ივანიშვილი სახელმწიფო ინსტიტუციებს იმ გარემოს გასაუმჯობესებლად, სადაც საკუთარ ბიზნესპროექტებს ახორციელებს და როგორ სწრაფად და ყოველგვარი წინააღმდეგობის გარეშე წარმართავს სახელმწიფო მნიშვნელოვან საბიუჯეტო რესურსებს მაშინ, როდესაც საქმე ივანიშვილის იდეის განხორციელებას ეხება.
აბასთუმანი ივანიშვილის პირველი ამბიციური პროექტი არ არის საქართველოში. მანამდე მან შავიზღვისპირეთში, დაბა შეკვეთილში დენდროლოგიური პარკი ააშენა, რომლის მოსაწყობად მრავალწლოვან, გიგანტურ ხეებს ქვეყნის სხვადასხვა ადგილიდან ფესვიანად თხრიდნენ და შეკვეთილში გადაჰქონდათ.
მისი პროექტია ასევე “პანორამა-თბილისი”, რომელმაც თბილისის ძველი უბნების იერ-სახე უნდა შეცვალოს, რის გამოც ივანიშვილს გარემოსდამცველები და ურბანისტები აკრიტიკებენ.
ივანიშვილის ერთ-ერთი ბოლო ახირება კი ასეთია – სახელმწიფომ ივანიშვილის მშობლიურ სოფელ ჭორვილაში 125 ათასი კვ.მ ტყის ფართობი 49 წლით სარგებლობაში გადასცა კომპანიას, რომლის 100 პროცენტიან წილსაც ბიძინა ივანიშვილის მეუღლე, ეკატერინე ხვედელიძე ფლობს. აუქციონის პირობების თანახმად, ეს ტყე უნდა “გადაიხუროს” ბადით.
JAMnews-ი მოკლედ გიყვებათ, რა წერია “საერთაშორისო გამჭვირვალობის” კვლევაში, რომელიც აბასთუმანს ეხება. მთავარი, რაც ამ კვლევიდან ჩანს – ივანიშვილს დაუბრკოლებლად შეუძლია საქართველოს ნებისმიერი ტერიტორიის თუ დასახლების ყიდვა და იქ ნებისმიერი პროექტის განხორციელება.
____________________
დაბა აბასთუმნის ახალი ცხოვრება მას შემდეგ დაიწყო, რაც იქ 2018 წლის აგვისტოს დასაწყისში ბიძინა ივანიშვილი ოჯახთან ერთად დასასველებლად ჩავიდა.
ივანიშვილები სასტუმრო “აბასთუმანი რეზიდენსში” გაჩერდნენ. ამ სასტუმროს დირექტორი უყვებოდა ჟურნალისტებს, რომ მილიარდერმა კურორტი ყურადღებით დაათვალიერა, გაოგნებული დარჩა ინფრასტრუქტურის მძიმე მდგომარეობით და იქიდანვე “დაურეკა ვიღაცას და ტელეფონში უთხრა, სასწრაფოდ გაამზადეთ პროექტიო”.
ივანიშვილის ამ ვიზიტიდან ორ კვირაში აბასთუმნის ცხოვრება რადიკალურად შეიცვალა.
ივანიშვილთან დაკავშირებულმა კომპანიამ „სანაპირო ხედი“, აბასთუმანში ყოფილი ტუბდისპანსერის ტერიტორია და შენობა-ნაგებობები, ასევე მიმდებარე ორი ნაკვეთი, მასზე განთავსებული შენობა-ნაგებობებით, აუქციონზე 3 მილიონ 540 ათას ლარად შეიძინა.
ახალი ტუბსაავადმყოფო ფონდმა „ქართუმ“ აბასთუმნიდან სამი კმ-ს მოშორებით ააშენა, ძველის ადგილას კი, მილიარდერი რეზიდენციას იშენებს.
● ყველა ამბობს, რომ საქართველოში არაფორმალური მმართველობაა. რაში გამოიხატება ის? მაგალითები
● ოლიგარქის სოფელი. როგორ ცხოვრობენ ჭორვილაში დღეს? რეპორტაჟი
● დიდი ხეები – მილიარდერის უკანასკნელი ცდუნება
როგორც “საერთაშორისო გამჭვირვალობა-საქართველოს” ანგარიშში ვკითხულობთ, ივანიშვილის პროექტის განხორციელებაში მალევე ჩაერთო მთელი სახელმწიფო მანქანა.
◤ დაბა აბასთუმანი ქვეყნის ერთ-ერთი ყველაზე ცნობილი სამთო-ბალნეოლოგიური კურორტია. ის სამცხე-ჯავახეთის მხარეში, ადიგენის მუნიციპალიტეტში, მარადმწვანე ხეობაში მდებარეობს და თბილისიდან 260 კმ-ითაა დაშორებული. დაბის ტერიტორია დაფარულია წიწვოვანი ტყით, უმეტესად ფიჭვით, რომელიც ყვავილობის დროს უებარი სამკურნალო საშუალებაა ფილტვებით ავადმყოფი ადამიანებისთვის. ამიტომაც, ჯერ კიდევ გასული საუკუნის 30 წლებიდან აქ ჩამოდიოდნენ ფილტვის დაავადების მქონე პაციენტები. მოგვიანებით აქ რამდენიმე სანატორიუმი, მათ შორის ტუბსანატორიუმი აშენდა. აბასთუმანში არის ასევე სამკურნალო თვისებების მქონე თერმული წყლები. ეს დაბა მნიშვნელოვანია იმითაც, რომ აქ არის განლაგებული ასტროფიზიკური ობსერვატორია, კულტურის, განათლებისა და ჯანდაცვის სხვა ობიექტები. ◢
პირველი, რაც ივანიშვილმა გააკეთა – აბასთუმნის მთავარი სანატორიუმები “ზეკარი” და ცისარტყელა იყიდა.
მან კურორტის ტერიტორიიდან გაიტანა.
ივანიშვილმა იყიდა ასევე აბასთუმნის კიდევ ერთი სანატორიუმი -„ცისარტყელა“, სადაც Autograph Collection-ის ბრენდის სასტუმროს „პარაგრაფ აბასთუმანს“
აშენებს.
ივანიშვილის აბასთუმანში სტუმრობიდან რამდენიმე დღეში – 15 აგვისტოს მუნიციპალური განვითარების ფონდმა აბასთუმნის განაშენიანების გენგეგმის შესადგენად ტენდერი გამოაცხადა.
სულ რაღაც ერთ თვეში, საქართველოს გაერთიანებული წყალმომარაგების კომპანიამ სისტემის რეაბილიტიაციისთვის 4 მლნ-მდე ლარის შესყიდვები გააფორმა. ჩატარდა წყლის ქიმიური და მიკრობიოლოგიური კვლევაც.
ორ თვეში ივანიშვილი გამოვიდა ინიციატივით, კურორტი მთლიანად ჩაეკეტათ ავტომობილებისთვის. მისი გადაწყვეტილებით, აქ მხოლოდ ელექტრომობილები ივლიან (მან პირობა დადო, რომ ადგილობრივებს თავად უყიდდა ელექტრომობილებს). ამ ინიციატივის განხორციელება მუნიციპალური განვითარების ფონდმა მყისიერად დაიწყო – აბასთუმნის შესასვლელთან უზარმაზარი ავტოსადგომის ასაშენებლად ორჯერ გამოცხადდა 9 მლნ ლარზე ტენდერი.
ამ ინიციატივის გამო შეჩერდა აბასთუმანი-ბაღდათის 60 კმ-იანი გზის მშენებლობა, რადგან პროექტის თანახმად, მანქანებს აბასთუმანში გავლა მოუწევდათ, რაც აბასთუმნის ჰაერს დააბინძურებდა. მშენებლობამ აბასთუმნის შემოვლით, საირმისკენ გადაინაცვლა რისთვისაც საგზაო დეპარტამენტმა ჯამში 93 მილიონ ლარზე გააფორმა სატენდერო ხელშეკრულებები. (ამ გზამ დაცულ ტერიტორიაზე, „ზურმუხტის ქსელის“ უბანზე უნდა გაიაროს და 10-15 კმ-ზე ტყე და მცენარეული საფარი გაიკაფება. გარემოსდამცველების თქმით, საფრთხე შეექმნებათ კანონით დაცულ ცხოველებსაც. ამიტომ ამ გადაწყვეტილებას „მწვანე ალტერნატივა“ სასამართლოში ასაჩივრებს).
ივანიშვილის აბასთუმანში სტუმრობიდან რამდენიმე თვეში დღის წესრიგში დადგა აბასთუმნის ტყის სახანძრო უსაფრთხოების საკითხიც – მუნიციპალური განვითარების ფონდმა აბასთუმნის რეკრეაციული ტყე-პარკის სახანძრო უსაფრთხოების მოწყობისთვის ტენდერი 15 მილიონ ლარზე გამოაცხადა.
● ვინ არის ოლიგარქი საქართველოში?
● რა იმალება ვარდისფერი ფლამინგოს უკან? რეპორტაჟი დენდროლოგიური პარკიდან
● დედამიწის დარაჯები აბასთუმნიდან
წელიწადნახევარში აბასთუმნის ტყეში დაიწყო საფეხმავლო ბილიკების მოწყობა, რისთვისაც დაცული ტერიტორიების სააგენტომ პირველ ეტაპზე 800 ათას ლარზე მეტის ხელშეკრულებები
გააფორმა.
მოგვიანებით, საქმეში ჩაერთო კულტურული მემკვიდრეობის დაცვის სააგენტოც, რომელმაც „გლაზენაპის“ კოშკს რეაბილიტაცია ჩაუტარა, აბასთუმანში მდებარე სამონასტრო კომპლექსის შემდგომი რეაბილიტაციის მიზნით კი მისი არქეოლოგიური კვლევა დაიწყო, რისთვისაც ჯამში ხელშეკრულებები 126,697 ლარზე გაფორმდა
“საერთაშორისო გამჭვირვალობა-საქართველომ” გაარკვია ისიც, რომ 18 სუბიექტიდან, რომლებმაც 2018 წლის აგვისტოდან შეიძინეს მიწა აბასთუმანში, 14 „ქართულ
ოცნებასთან“ არის დაკავშირებული, ცხრა სუბიექტი კი უშუალოდ ბიძინა ივანიშვილთან.
ანგარიშში ვკითხულობთ, რომ “ქართული ოცნების” ხელისუფლებაში მოსვლის დღიდან ამ დრომდე აბასთუმანში ჯამში 268 მილიონ ლარამდე სატენდერო ხელშეკრულება გაფორმდა – აქედან 93 პროცენტი 2018 წლის აგვისტოდან ანუ იმ დღიდან, როდესაც ივანიშვილი აბასთუმნით დაინტერესდა.
ანგარიშიდან ასევე ირკვევა, რომ ამ სახელმწიფო შესყიდვების 83 პროცენტზე მეტი მიიღეს იმ კომპანიებმა, რომლებმაც სხვადასხვა დროს პარტია “ქართულ ოცნებას” თანხები შესწირეს.
