კრიტიკული სიტუაცია ირანში - ყოველი მეხუთე სიკვდილი კორონავირუსით არის გამოწვეული
ბოლო ერთი თვის განმავლობაში, კრიტიკულად გაუარესდა კორონავირუსით ინფიცირებისა და გარდაცვალების სტატისტიკა ირანში, განსაკუთრებით სახიფათო მდგომარეობაშია თეირანი – ამის შესახებ, 26 ივლისს გამართულ პრესკონფერენციაზე, ირანის ჯანდაცვის მინისტრის მოადგილემ, ირაჯ ჰარირჩიმ განაცხადა – იტყობინება „რადიო თავისუფლება“.
ჰარირჩიმ აღნიშნა, რომ თეირანში, ყოველდღიურად საავადმყოფოებში ათავსებენ კორონავირუსით ინფიცირებულ სულ მცირე 600 ახალ პაციენტს.
ირანში, უკვე ყოველი მეხუთე გარდაცვალების ფაქტი, კორონავირუსით არის გამოწვეული.
26 ივლისისთვის არსებული ოფიციალური მონაცემებით, ირანში, კორონავირუსით დაინფიცირდა 291 172 ადამიანი, მათგან 15 700 გარდაიცვალა.
თუმცა, ჯერ კიდევ 2020 წლის ივლისის დასაწყისში, ირანის პრეზიდენტმა ჰასან როუჰანმა საშინელი ინფორმაცია გამოაცხადა:
კოროვნავირუსით ინფიცირებულთა რაოდენობა, შესაძლოა, 25 მილიონამდე იყოს და კიდევ 35 მილიონი, შეიძლება, უახლოეს თვეებში დაინფიცირდეს.
პრეზიდენტი მაშინ ირანის ჯანდაცვის სამინისტროს მონაცემებს დაეყრდნო, რომელიც ახალ მოხსენებაშია მოცემული. თავად მოხსენება, გასაიდუმლოებულია.
ირანის ხელისუფლებას „საზოგადოების იმუნიტეტზე“ აქვს გათვლა?
სახიფათო ვითარების მიუხედავად, ირანის ხელისუფლება არ აწესებს მკაცრ კარანტინს და ამან ექსპერტებს ეჭვი გაუჩინა, რომ ირანის ხელისუფლება „საზოგადოების იმუნიტეტის“ გამომუშავებაზე აკეთებს ფსონს.
ამ ჭორებს, რამდენიმე ირანელი ექიმი გამოეხმაურა და განაცხადეს, რომ, თუ ასეთი პოლიტიკა არსებობს, ის სასიკვდილოდ სახიფათოა, რადგან ქვეყნის ჯანდაცვის სისტემა ვერ გაუძლებს, თუკი, კიდევ მილიონობით ადამიანი დაინფიცირდება.
• ძმათა სასაფლაოები ირანში კორონავირუსით გარდაცვლილთათვის – თანამგზავრიდან გადაღებული სურათები
• კორონავირუსი ირანში: ერთ-ერთი ყველაზე დიდი აფეთქება მსოფლიოში და ხელისუფლების ტყუილი
• ირანი, მოვლენები, ფაქტები, ანალიზი
თუმცა, ჯანდაცვის მინისტრის მოადგილემ კატეგორიულად უარყო „საზოგადოების იმუნიტეტის“ გამომუშავების რამენაირი იდეის არსებობაც კი.
„საკმარისია ისიც, რომ დიდი ბრიტანეთი და შვედეთი უკვე დაზარალდნენ ასეთი პოლიტიკით“, – განაცხადა ირაჯ ჰარირჩიმ.
პანდემიის იგნორირება, სანქციები და სუსტი ეკონომიკა – შესაძლო კატასტროფის წინაპირობები
19 თებერვალს, კორონავირუსის შესახებ გაკეთებულ პირველ ოფიციალურ განცხადებაში, ირანის ხელისუფლებამ საზოგადოებას ურჩია არ ენერვიულათ, უზენაესმა სულიერმა ლიდერმა, აიათოლა ალი ჰამენეიმ კი ირანის „მტრები“ იმაში დაადანაშაულა, რომ ისინი საფრთხის მასშტაბებს აზვიადებენ.
ერთი კვირის შემდეგ, როდესაც ინფიცირებულთა და გარდაცვლილთა რიცხვის სწრაფად ზრდა დაიწყო, პრეზიდენტმა ჰასან როუჰანმა „მტრების შეთქმულების“ შესახებ განაცხადა, რომლის მიზანიც ირანელთა შეშინება და ქვეყანაში ცხოვრების შეჩერებაა.
პრეზიდენტმა ირანელებს მოუწოდა, განეგრძოთ თავისი ყოველდღიური ცხოვრება და ევლოთ სამსახურში.
2020 წლის მარტის შუაში, მთავრობის მიერ კონტროლირებადმა არხებმა განაცხადეს, რომ კორონავირუსი, შესაძლოა, აშშ-ის მიერ შექმნილი „ბიოლოგიური იარაღი“ ყოფილიყო, ჰამენეიმ კი Twitter-ზე, „ბიოლოგიური თავდასხმის“ შესახებ დაწერა.
ირანში, ინფიცირებულთა რიცხვის მკვეთრი ზრდა მას შემდეგ მოხდა, რაც ეპიდემიის შუაში, ხელისუფლებამ უარი არ თქვა საპარლამენტო არჩევნების ჩატარებაზე (პირველი ტური თებერვალში, მეორე ტური აპრილში, 2020 წლის).
მუშაობას აგრძელებდნენ სავაჭრო ცენტრები და მეჩეთები. კონკრეტულად ამის გამო, თეირანთან ერთად, ინფექციის ცენტრი გახდა ქალაქი ყუმი – ქვეყნის რელიგიური დედაქალაქი.
პრობლემის დამალვა შეუძლებელი გახდა, როდესაც მასობრივი სამარხების ვიდეო გამოჩნდა, რომელშიც ქიმიური დაცვის კოსტუმებში გამოწყობილი ადამიანები ჩანდნენ. მაშინ დაწესდა შეზღუდვები, მაგრამ უკვე გვიანი იყო.
ინფიცირების რაოდენობის სწრაფი ზრდის მიუხედავად, ირანმა სხვა ქვეყნებზე ადრე – 2020 წლის აპრილში დაიწყო შეზღუდვების მოხსნა.
ეს გადაწყვეტილება ხელისუფლებამ ეკონომიკის კრიტიკული მდგომარეობის გამო მიიღო. ირანში, ეკონომიკური კრიზისი პანდემიამდე დიდი ხნით ადრე დაიწყო – კორუფციის, ცუდი მენეჯმენტისა და აშშ-ის სანქციების გამო.
ამჯერად, აიათოლა ჰამენეიმაც კი მხარი დაუჭირა საკარანტინო ზომებს
უახლოესი თვეები იქნება უარესი, ვიდრე კრიზისის პირველი ექვსი თვე, გააფრთხილა მოსახლეობა ირაჯ ჰარირჩიმ.
გამოცხადდა ახალი კარანტინი – იხურება კაფეები, ზოოპარკები და საცურაო აუზები, რომლებიც შენობებშია განთავსებული. საჯარო ადგილებში ნიღბის ტარება სავალდებულო ხდება.
მიღებული სიფრთხილის ზომების დაცვას პოლიცია გააკონტროლებს.
აღსანიშნავია, რომ ამჯერად პრეზიდენტს მხარი დაუჭირა ირანის რელიგიურმა ლიდერმა, აიათოლა ჰამენეიმ, რომლებიც, სხვა საკითხებთან დაკავშირებით, ძირითადად ოპონენტები არიან.
