ირაკლი კობახიძე: ზურაბიშვილი უპირისპირდება იმ მიზანს, რასაც კანდიდატის სტატუსის მიღება ჰქვია

ირაკლი კობახიძე სალომე ზურაბიშვილზე

მმართველი პარტიის თავმჯდომარის, ირაკლი კობახიძის თქმით, საქართველოს პრეზიდენტი სალომე ზურაბიშვილი უპირისპირდება იმ მიზანს, რასაც კანდიდატის სტატუსის მიღება ჰქვია.

“კიდევ ერთხელ ვიტყვი, რომ სალომე ზურაბიშვილი პირდაპირ უპირისპირდება იმ მიზანს, რასაც კანდიდატის სტატუსის მიღება ჰქვია. ის რადიკალური ოპოზიციის დღის წესრიგით მოქმედებს. ასევე, კონსტიტუციის უხეში დარღვევა არის ის, რაც ქვეყანაში პოლარიზაციას ხელს უწყობს. აქედან გამომდინარე, საზოგადოებამ განსაჯოს, პოლარიზაცია ვის ინტერესებშია.” – აცხადებს კობახიძე.

“ქართული ოცნების” თავმჯდომარეს ეთანხმება დეპუტატი რატი იონათამიშვილი და ამბობს, რომ სალომე ზურაბიშვილი საქართველოს ევროპული პროგრესის მოკავშირე არაა:

“საქართველოს პრეზიდენტი ამბობდა, რომ ჩვენი ქვეყანა კანდიდატის სტატუსს არ იმსახურებსო და მას შემდეგ, ზურაბიშვილს განსხვავებული განცხადება არ გაუკეთებია […] ესე იგი, სინამდვილეში, ის საქართველოს ევროპული პროგრესის მოკავშირე და გულწრფელი არ არის […] ამავდროულად, ის საქართველოს კონსტიტუციას არღვევს და ღიად ამბობს, რომ მისთვის კონსტიტუციის პატივისცემა მეათეხარისხოვანი საკითხია. ამ პირობებში, პასუხისმგებლიანი დამოკიდებულებაა, როდესაც ჩვენი მხრიდან საკონსტიტუციო სასამართლოში შესაბამისი წარდგენა და იმპიჩმენტის პროცედურის დაწყება ხდება.”

● შეძლებს თუ არა “ოცნება” პრეზიდენტის იმპიჩმენტს და რატომ წავიდა ამაზე მმართველი პარტია?
● ოპოზიციური პარტიები და NGO-ები ღარიბაშვილის წინააღმდეგ იმპიჩმენტის პროცედურების და გამოძიების დაწყებას აპირებენ
● ოპოზიცია პრემიერის იმპიჩმენტის პროცედურას იწყებს. რას ნიშნავს ეს? ვახუშტი მენაბდის განმარტება

საპარლამენტო უმრავლესობის 80 დეპუტატი პრეზიდენტის წინააღმდეგ საიმპიჩმენტო განაცხადს ხელს აწერს, რომელიც საკონსტიტუციო სასამართლოში გასაგზავნ მასალას თან დაერთვება.

პრეზიდენტის საპარლამენტო მდივანი გიორგი მსხილაძე აცხადებს, რომ სალომე ზურაბიშვილის იმპიჩმენტთან დაკავშირებით ქართული ოცნების მხრიდან საკონსტიტუციო სასამართლოსთვის მიმართვა “ეწინააღმდეგება საქართველოს ისტორიულ არჩევანს, გახდეს ევროკავშირის წევრი”. მისივე თქმით, “ვინც იმპიჩმენტის მომხრეა, ევროინტეგრაციის წინააღმდეგია.”

“ქართულმა ოცნებამ” საქართველოს პრეზიდენტის წინააღმდეგ იმპიჩმენტის პროცედურის დაწყების შესახებ პირველ სექტემბერს განაცხადა. ამის შესახებ ბრიფინგზე მმართველი პარტიის თავმჯდომარემ, ირაკლი კობახიძემ ისაუბრა. კობახიძის განმარტებით, იმპიჩმენტის პროცედურა დაიწყება მიუხედავად იმისა, რომ მის აღსრულებას პარლამენტში ოპოზიციის მხარდაჭერაც სჭირდება.

გარდა ამისა, კობახიძის თქმით, პრეზიდენტის მიერ კონსტიტუციის დარღვევის ფაქტზე „ქართული ოცნება“ მიმართავს საკონსტიტუციო სასამართლოსაც.

საქართველოს პრეზიდენტის ადმინისტრაციამ 30 აგვისტოს გამოაქვეყნა განცხადება, რომლის მიხედვით, საქართველოსთვის ევროკავშირის წევრობის კანდიდატი ქვეყნის სტატუსის მინიჭების მხარდასაჭერად პრეზიდენტი სალომე ზურაბიშვილი ევროპელ ლიდერებთან შეხვედრებს იწყებს.

მალევე საქართველოს მთავრობა სალომე ზურაბიშვილის გერმანიაში დაგეგმილ ვიზიტს გამოეხმაურა და განმარტა, რომ პრეზიდენტს უარი გერმანიის გარდა, უკრაინაში ვიზიტზეც უარი ეთქვა. ზურაბიშვილს ასევე უარი ეთქვა შვეიცარიაში, პოლონეთში, ბელგიაში, დანიაში, არაბთა გაერთიანებულ საამიროებში, ბულგარეთში, ჩეხეთსა და ისრაელში დაგეგმილ შეხვედრებზეც.

თუმცა საქართველოს პრეზიდენტმა ევროპული ტურნე მაინც წამოიწყო. ზურაბიშვილი გერმანიაში გაემგზავრა და გერმანიის პრეზიდენტს შეხვდა, მოგვიანებით კი იგი საფრანგეთის პრეზიდენტს, ემანუელ მაკრონსაც შეხვდა.

7 სექტემბერს კი საქართველოს პრეზიდენტმა სალომე ზურაბიშვილმა სპეციალური ვიდეომიმართვა გაავრცელა და განაცხადა, რომ ის არსად წასვლას არ აპირებს და მის გადადგომაზე ოცნება ყველამ უნდა დაივიწყოს.