პრემიერმინისტრი ირაკლი ღარიბაშვილი აცხადებს, რომ საქართველოს მთავრობამ დაამტკიცა დეოლიგარქიზაციის სამოქმედო გეგმა, რომელიც გათვალისწინებულია 12 რეკომენდაციით. ასევე, მისი განმარტებით, პარტიასთან და პარლამენტთან ერთად შეთანხმდნენ, რომ მომავალ კვირაში ყველა იმ პუნქტზე, რომელზეც საუბარი იყო ჯოზეფ ბორელთან და მის გუნდთან, ექნება მმართველ პარტიას რეაგირება. შესაბამისად, ღარიბაშვილის თქმით, სტატუსის არმოცემა “ძალიან დიდი უსამართლობა იქნება, რომელსაც არ შევეგუებით.”
მთავრობის სხდომაზე ღარიბაშვილმა ასევე აღნიშნა, რომ მათი მხრიდან ყველაფერი გაკეთდება და საქართველო იმსახურებს ევროკავშირის კანდიდატის სტატუსს, მითუმეტეს, იმ ქვეყნებთან შედარებით, როგორიცაა უკრაინა და მოლდოვა.
“ჩვენ ძალიან კარგად ვიცით, რა ხდება ამ ქვეყნებში, ამიტომ ჩვენ არავის არ ვედრებით, მაგრამ ვითხოვთ დამსახურებულ სტატუსს, მითუმეტეს, იმ გეოპოლიტიკური რეალობის გათვალისწინებით, რომელიც შექმნილია ჩვენს რეგიონში და ევროპის კონტინენტზე და იმ შედეგების, მიღწევების გათვალისწინებით, რომელსაც ჩვენმა გუნდმა მივაღწიეთ.” – ამბობს პრემიერი.
14 სექტემბერს საქართველოს მთავრობამ გაავრცელა ინფორმაცია, რომ ევროკავშირში ინტეგრაციის სხდომაზე დეოლიგარქიზაციის სამოქმედო გეგმა მიიღეს.
როგორც მთავრობის ადმინისტრაცია განმარტავს, სხდომაზე კომისიის წევრებმა საქართველოში პოლიტიკურ, ეკონომიკურ და საზოგადოებრივ ცხოვრებაში ინტერესების გადაჭარბებული გავლენის თავიდან არიდების, ე.წ. დეოლიგარქიზაციის სამოქმედო გეგმა მიიღეს, რომელიც შემუშავებულია ვენეციის კომისიისა და ევროკავშირის რეკომენდაციების საფუძველზე. მათივე თქმით, დოკუმენტი მოიცავს საქართველოს კანონმდებლობაში ე.წ. სისტემური მიდგომით განსახორციელებელი ცვლილებების პაკეტს, სადაც შესაბამისი საკანონმდებლო ცვლილებების მისაღებად კონკრეტული ვადებია გაწერილი.
მთავრობის პრესსამსახურის ცნობით, აღნიშნული დოკუმენტი 7 სხვადასხვა მიმართულებას მოიცავს. მათ შორის: ანტიკორუფციულ და ანტიმონოპოლიურ მიმართულებებს, ფულის გათეთრებისა და მედია პლურალიზმის საკითხებს, ასევე, მართლმსაჯულებაში განსახორციელებელ ღონისძიებებს. დოკუმენტის მიღების შემდეგ, საქართველოს საგარეო საქმეთა სამინისტროს რეკომენდაცია გაეწია, ევროპელ პარტნიორებთან დამატებითი კონსულტაციები გააგრძელოს.
საქართველოს მთავრობის მიერ დოკუმენტის მიღების შემდეგ, სამუშაო პროცესი საქართველოს პარლამენტში გადაინაცვლებს.
14 სექტემბერს ევროკავშირის კომისარმა სამეზობლო პოლიტიკისა და გაფართოების საკითხებში, ოლივერ ვარჰეიმ განაცხადა, რომ საქართველოს მთავრობას ევროპული საბჭოს მიერ მიცემული 12 პუნქტიდან მხოლოდ 3 აქვს შესრულებული და ხაზი გაუსვა, რომ ახლა ყოველი წუთი მნიშვნელოვანია, რადგან ოქტომბერში ანგარიში მზად იქნება.
ევროკავშირის კომისარმა 22 ივნისსაც აღნიშნა, რომ საქართველოს 12 პუნქტიდან სრულად შესრულებული ჰქონდა სამი, შვიდი კი – ნაწილობრივ. ვარჰეიმ მაშინ განმარტა, რომ სრულად შესრულებულია შემდეგი რეკომენდაციები: გენდერული თანასწორობა და ძალადობა ქალთა წინააღმდეგ; ადამიანის უფლებათა ევროპული სასამართლოს გადაწყვეტილებების გათვალისწინების შესახებ; სახალხო დამცველის (ომბუდსმენის) წარდგენის პროცესის გამჭვირვალობის შესახებ.
“ქართული ოცნების”თავმჯდომარე, ირაკლი კობახიძე ამტკიცებდა, რომ შეფასება 12-დან მხოლოდ 3 შესრულებული რეკომენდაციის შესახებ მანიპულაციაა. კობახიძის თქმით, თუ “მანიპულაციურ განმარტებას” გავყვებით, გამოდის, რომ უკრაინამ 7-დან მხოლოდ 2 პუნქტი შეასრულა და “საერთოდ გულგრილობა გამოუვლენია”.
საქართველოს, უკრაინისა და მოლდოვის ევროკავშირის წევრობის კანდიდატის სტატუსის მინიჭების საკითხზე ევროკომისიამ დასკვნა 2022 წლის 17 ივნისს მოამზადა. შედეგად, უკრაინამ და მოლდოვამ მიიღეს ევროკავშირის კანდიდატობის სტატუსი და დაეკისრათ გარკვეული ვალდებულებების შესრულება, ხოლო საქართველოს ჯერ 12 პუნქტიანი გეგმის და პირობების შესრულება დაევალა, შემდეგ კი კანდიდატობის სტატუსის მიღების შანსი ექნება.
