"ივანიშვილმა არია საგარეო პოლიტიკა, ეს დალაგდება, როცა მოვა ახალი მთავრობა" - ინტერვიუ საქართველოს პრეზიდენტთან
ინტერვიუ საქართველოს პრეზიდენტთან
საქართველოს პრეზიდენტი სალომე ზურაბიშვილი ამბობს, რომ ბიძინა ივანიშვილისა და ქართული ოცნების პირობებში საქართველოს საგარეო პოლიტიკა ვერ დალაგდება. ამის შესახებ მან ტელეკომპანია “ფორმულასთან” ინტერვიუში ისაუბრა.
პრეზიდენტის თქმით, ტექნიკურ მთავრობაზე – რომელიც შეიძლება იყოს მთლიანად ტექნიკური ან შერეული – შეჯერებას არჩევნების შემდეგ დაიწყებენ. ის ასევე ამბობს, რომ ჰყავს პრემიერობის კანდიდატი, თუმცა დისონანსის თავიდან არიდების მიზნით და პარტიების გათვალისწინებით, მას არჩევნების შემდეგ დაასახელებს.
მან ასევე ისაუბრა ბიძინა ივანიშვილის გუშინდელ ინტერვიუზეც და აღნიშნა, რომ ივანიშვილი ცდილობს, ირგვლივ შეკრებილი ადამიანები, რომლებსაც სანქციების ეშინიათ, დააწყნაროს, თუმცა სალომე ზურაბიშვილი აღნიშნავს, რომ “ბიძინა ივანიშვილზე არაფერი არ არის დამოკიდებულ”.
სალომე ზურაბიშვილმა კოალიციურ მმართველობაზე განაცხადა, რომ კოალიციურ მმართველობაზე გადასვლა ქვეყნისთვის იქნება “უდიდესი წინსვლა, რადგან დავემშვიდობებით ერთპარტიულ მმართველობას, რომელშიც პრაქტიკულად, 30 წელზე მეტია ქვეყანა ჩაძირული”.
რა თქვა საქართველოს პრეზიდენტმა
● მან [ბიძინა ივანიშვილმა] და ოცნებამ და ოცნების პოლიტიკამ აურია ამ ქვეყანას თავისი დალაგებული საგარეო პოლიტიკა, რომელსაც მიყვებოდა სხვათა შორის ოცნება მთელი პირველი პერიოდი და მერე აურია ამ ქვეყანას და დაგვტოვა იზოლაციაში და ამიტომ, დალაგება სიტყვა არ იარსებებს, იმიტომ რომ ასე არ ლაგდება. დალაგდება, როცა მოვა ახალი მთავრობა, ევროკავშირის წარმომადგენლები ბრიუსელიდან თუ აქ ძალიან ნათლად ამბობენ, რომ ამ მთავრობის პირობებში და ამ მთავრობის რიტორიკის, გადაწყვეტილებების ფონზე, არანაირი დალაგება არ იქნება.
როგორ წარმოუდგენია, რომ დალაგდება და რუსული კანონი, ოფშორული კანონი იქნება და დისკრიმინაციული პოლიტიკა იქნება და ამ ყველაფრის ფონზე, დალაგდება? – არა.
● თუ ეს არის პერსონალური გარანტია, ფიზიკური, იმიტომ რომ ადამიანი შეშინებულია და ამის გამო არავის უნდა ქვეყანა აირიოს, ეს სხვა საკითხია. დალაგება იქნება საქმე იმ მთავრობის, რომელიც მოვა დიდი უმრავლესობით და რომელიც ნამდვილად დაალაგებს, ამისი პირობა მაქვს მიღებული ევროპელი, ამერიკელი პარტნიორებისგან.
ყველა მზადაა, მზადყოფნაშია და ელოდება, რომ საქართველოს მოსახლეობამ გამოხატოს თავისი ნება, რომ დაუბრუნდეს პრო-დასავლურ, პრო-ევროპულ პოლიტიკას. პრო-რუსული პოლიტიკის ფონზე არაფერი არ დალაგდება ამ კუთხით. ეს ერთი რამ არის, რაც ძალიან ნათელია.
● მე მგონი, ცდილობს, რომ თავის ირგვლივ ადამიანები, რომლებსაც ეშინია სანქციების, ისინი დააწყნაროს. მე მგონი, ეს დაწყნარებაც ფუჭია, იმიტომ რომ მასზე არაფერი არ არის დამოკიდებული და არის ისეთი პროცესი დაწყებული, რომელიც ასე მარტივად და ერთი სიტყვის გადაგდებით არ მოგვარდება.
● ჩვენი მოქალაქეებისთვის, ვინც აქ ცხოვრობენ, მე ვიტყოდი, რომ ნუ გეშინიათ. ხმები იქნება დაცული, არის დაცული, იქნება ფარული კენჭისყრა, ის ხმები და ჭორები, რაც ვრცელდება, რომ ეს აპარატები რაღაცას მოიცავს და შეიძლება, რომ იცოდნენ ვინ, ვის აძლევს ხმას, ეს ჭორები არის გავრცელებული, იმისთვის რომ ხალხში გაჩნდეს ეჭვი და შიში, ეს არ არსებობს, ეს არის ისეთი ელექტრონული პროცედურები, რომლებიც არსებობს სხვადასხვა ქვეყანაში და საერთაშორისო კომპანია, რომელიც უზრუნველყოფს ამას, არ წავა იმაზე, რომ თავისი რეპუტაცია საქართველოს არჩევნების გულისთვის კითხვის ნიშნის ქვეშ დააყენოს.
ამიტომ, ყველა უნდა წავიდეს არჩევნებზე, ყველამ უნდა იცოდეს, რომ მისი ხმა იქნება ფარული, თუ მივა. აუცილებელია, რომ არავინ დარჩეს სახლში, არავის შეეშინდეს არჩევნებზე მისვლის.
● რაც შეეხება ივანიშვილის გუშინდელ მცდელობას, დააშინოს ხალხი პარტიებით, დაჭერებით, ნუ უსმენთ. ეს არის ჩვენ ხელში, მთავარია მობილიზაცია. ჩვენს ქვეყანაში ყოველთვის იცვლება ხელისუფლება, თუ კი ამომრჩევლები, მთელი მოსახლეობა, მზად არის იმისთვის, რომ გამოვიდეს და თავისი ხმა და ნება გამოხატოს.
● ამომრჩეველს მინდა ვუთხრა, ჩათვალეთ, გაქვთ არჩევანი, 4 პარტია, შეიძლება, არც ერთი არ იყოს თქვენთვის იდეალური, მაგრამ ჯამში, ესენი არიან ჩვენი მომავალი, ჩვენ მერე ვნახავთ ამის გარდაქმნას, მერე ვნახავთ ახალ პარტიებს, რომლებიც როცა შიში და ერთპარტიულობა მოიხსნება, მაგალითად, ერთპარტიული კონტროლი ცესკო-ზე, ბევრად უფრო ღია და გაშლილი იქნება საარჩევნო სივრცე.
● ამიტომ, ნუ გეშინიათ, ხმა მიეცით იმას, რომელიც თქვენი გემოვნებით უფრო ახლოვდება თქვენს მსოფლმხედველობას, მაგრამ იცოდეთ, რომ ეს პარტიები ჩემს წინაშე არიან ვალდებული და პასუხისმგებლები, რომ შეასრულონ ქართული ქარტია, რომელიც არის სამოქმედო გეგმა, რომ ძალიან სწრაფად შევიდეთ ევროკავშირში და მე მათ, ყველას, ამაზე პასუხს მოვთხოვ.
● თუ ვინმე არსებობს ამის იქით, რომელიც მე მენდობა და ენდობა იმას, რომ მე მაქვს ის გარანტიები მიღებული ჩვენი პარტნიორებისგან, აირჩიეთ რომელიმე, იმიტომ რომ ესენი არიან მედიატორები იმისთვის, რომ ჯამში მივიღოთ ის პროცენტები, რომელიც შექმნის შესაძლებლობას, რომ მარტივად იქნას მიღებული გადაწყვეტილებები, რაც გვიწერია.
მარტივად გავაუქმოთ რუსული კანონები, არაერთია გასაუქმებელი და ეს იქნება ძალიან სწრაფად გასაუქმებელი. ასე რომ, გადანაწილდით, როგორც გირჩევნიათ, ნუ გეშინიათ და ქარტიის ხმები მეც მომეცით, ამ ფორმით.
● რუსეთი ვერაფერს აღწევს დღევანდელ დღეს. უკრაინაში ვერ აღწევს თავის მიზანს, კი გრძელდება [ომი], საშინელი, ტრაგიკული მომენტია უკრაინაში 2 წელია და მეტი, მაგრამ ფაქტია, რომ რუსეთმა ვერ მიაღწია მიზანს იმის მიუხედავად, რომ ითვლებოდა, რომ რუსეთის ჯარი ყველაზე ძლიერი ჯარი იყო.
● მოლდოვაში რუსეთმა ვერ მიაღწია მიზანს, იმის მიუხედავად, რომ დაიხარჯა ძალიან დიდი ფული და მე ველაპარაკე რამდენიმე კვირის წინ მაია სანდუს, კიდევ ერთი კვირის წინ მეორედ ვესაუბრე – უზარმაზარი თანხები დაიხარჯა, იქ პრორუსული ძალები ძალიან აქტიური იყვნენ და გამოყენებული იყო ყველანაირი ჰიბრიდული საშუალება, რაც არსებობს და ამის მიუხედავად, ეს ქალი დგას და რეფერენდუმი მოიგო რთულ პირობებში და ეს უდიდესი გამარჯვებაა. მე დარწმუნებული ვარ, რომ სამივე ერთად შევალთ ევროკავშირში ძალიან მალე და ძალიან სწრაფად.
