"გისურვებთ, მალე აღდგეს სამართლიანობა რუსეთ-უკრაინას შორის" - ილია II-ის მილოცვა რუსეთის პატრიარქს
ილია II-ის რუსეთის პატრიარქს
საქართველოს კათოლიკოს პატრიარქმა ილია მეორემ რუსეთის პატრიარქ კირილს დაბადების დღე მიულოცა, სადაც საქართველოს პატრიარქი რუსეთის პატრიარქს უსურვებს, “რაც შეიძლება მალე აღდგენილიყოს სამართლიანობა და მშვიდობა რუსეთსა და უკრაინას შორის”, მილოცვის ტექსტი რუსეთის საპატრიარქოს ოფიციალურ ვებგვერდზე გამოქვეყნდა.
პატრიარქის მილოცვის ტექსტი:
“მის უწმინდესობას კირილს, მოსკოვისა და სრულიად რუსეთის პატრიარქს
თქვენო უწმინდესობავ!
ქრისტესმიერი სიყვარულით გილოცავთ თქვენს დაბადების დღეს!
ამ რთულ დროში, გისურვებთ ჯანმრთელობას და ყველა ღვთაებრივ სიკეთეს. გისურვებთ, ასევე, რომ თქვენი და საერთო ძალისხმევით, რაც შეიძლება მალე აღდგენილიყოს სამართლიანობა და მშვიდობა რუსეთსა და უკრაინას შორის, ჩვენს სახელმწიფოებს შორის.
უფალმა დაგიცვათ თქვენ და თქვენი სამწყსო!
ქრისტესმიერი სიყვარულით”, – წერია ილია მეორის მილოცვაში.
● რუსული ეკლესია წყვეტს კავშირს ბერძნულ ეკლესიასთან უკრაინის ეკლესიის ავტოკეფალიის აღიარების გამო
● დასავლეთი თუ რუსეთი? საით მიყავს ქვეყანა ქართულ ეკლესიას
● საპატრიარქოს კაპიტალი. რა ქონებას ფლობს ყველაზე გავლენიანი ინსტიტუტი საქართველოში?
საქართველოს კათოლიკოს პატრიარქის მილოცვამ მწვავე კრიტიკა გამოიწვია ქართულ საზოგადოებაში. “სოციალური სამართლიანობის ცენტრის” ხელმძღვანელი თამთა მიქელაძე სვამს კითხვას: “როგორ აღდგება მშვიდობა კირილ მეორის ძალისხმევით, რომელიც ომის იდეოლოგიური პროპაგანდისტია რუსეთში?!”
“რამდენად გამართლებულია მორალურად დამნაშავე პატრიარქისთვის დაბადების დღის რევერანსებით მილოცვა და მილოცვა საერთოდ?!
როგორ შეიძლება ტერორიზმის მქადაგებლის მიმართ ლოიალობას რაიმე რელიგიური გამართლება ჰქონდეს?!
მაინტერესებს მრევლის წევრებს ეს საკითხი აწუხებს თუ არა და სვამენ თუ არა ამ კითხვებს მათი სამრევლოების, ეპარქიების შიგნით?!
მტრული სახელმწიფოს რელიგიური ლიდერისთვის ჩვენთან რომელიმე სხვა რელიგიური ორგანიზაციის წარმომადგენელს რომ მიელოცა და ამ რევერანსებით ესაუბრა, საერთოდ რა ბრალდებებს წაუყენებდნენ ჩვენს საზოგადოებაში და ქვეყანაში?!” – წერს მიქელაძე.
თეოლოგი ბექა მინდიაშვილი კი ამბობს, რომ მილოცვის ასეთი ფორმულირება გულისხმობს რუსეთის გამარჯვების მხარდაჭერას, “რადგან კირილე გუნდიაევი არის ტერორიზმის მთავარი იდეოლოგი” და უკრაინელებისა და ქართველების ხოცვა-ჟლეტის მთავარი “გამპრავებელი.”
“ამორალური და ანტისახელმწიფოებრივია, მოღალატურია რასაც საქართველოს პატრიარქი სჩადის, – ეს მილოცვა არის ამბროსი ხელაიას, კირიონის, საქართველოსა და უკრიანისთვის დაღუპული გმირების უკიდურესი შეურაცხყოფა, მაგრამ ეს მილოცვა, ამავდროულად, არის ჯვარცმული ქრისტეს გმობა და უარყოფა!” – წერს ბექა მინდიაშვილი.
● ციანიდის საქმე. რეალური თავდასხმა თუ საპატრიარქოს კარის თამაშები?
● “ვაგროვებთ კომპრომატებს” – გავრცელდა საიდუმლო ფაილები, სადაც სუს-ი მღვდელმთავრებს უსმენს
აღსანიშნავია, რომ 22 ნოემბერს, უკრაინის უსაფრთხოების სამსახურმა (СБУ) კიევის უდიდეს მონასტერში, კიევ-პეჩორის ლავრაში “კონტრდაზვერვითი ღონისძიებები” ჩაატარა. როგორც უწყებაში განმარტავენ, მოქმედებებში მონაწილეობდნენ ეროვნული გვარდიისა და ეროვნული პოლიციის თანამშრომლებიც, “უკრაინაში რუსული სპეცსამსახურების დივერსიული საქმიანობის წინააღმდეგ СБУ-ს სისტემატური მუშაობის ფარგლებში”.
უკრაინის უსაფრთხოების სამსახური კონტრდაზვერვის ღონისძიებების 3 მიზანს ასახელებს:
- “ლავრის “რუსული სამყაროს” ცენტრად გამოყენების აღკვეთა.
- გადამოწმდეს მონაცემები, რომ უკრაინის მართლმადიდებელი ეკლესიის შენობებს იყენებენ დივერსიული-სადაზვერვო ჯგუფები, უცხოეთის მოქალაქეები, [იყენებენ] იარაღის შესანახად და ა.შ.
- მოსახლეობის პროვოკაციებისგან და ტერორისტული აქტებისგან უსაფრთხოების უზრუნველყოფა.”
აქამდე, 13 ნოემბერს გავრცელდა ინფორმაცია, რომ კიევ-პეჩორის ლავრაში რუსეთისთვის ლოცულობდნენ. ამის შემდეგ, СБУ-მ ლავრაში რუსული პროპაგანდის გავრცელების საქმეზე 15 ნოემბერს გამოძიება დაიწყო.
უკრაინაში რუსეთის შეჭრის შემდეგ მოსკოვისა და სრულიად რუსეთის პატრიარქმა განაცხადა, რომ „ცოდვებისგან განიწმინდება ის, ვინც სამხედრო მოვალეობის შესრულებისას მოკვდება“. მან ასევე ხაზი გაუსვა, რომ „რუსეთი არასდროს არავის დასხმია თავს.”
რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო.
პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების ე.წ. ხელმძღვანელების, დენის პუშილინისა და ლეონიდ პასეჩნიკის ფორმალური თხოვნა კრემლისადმი, დახმარებოდნენ “უკრაინული აგრესიის” მოგერიებაში.
უკრაინაში შეჭრის პარალელურად, მსოფლიოს წამყვანმა ქვეყნებმა რუსეთს სხვადასხვა სახის სანქციები დაუწესეს.
ომიდან 9 თვის შემდეგ, 23 ნოემბრის მდგომარეობით, უკრინამ უკვე მოახერხა 24 თებერვლის მერე რუსეთის მიერ ოკუპირებული ტერიტორიების 52.5 პროცენტის გათავისუფლება, მათ შორის ხერსონის, რომელიც მანამდე ვლადიმირ პუტინმა ე.წ. რეფერენდუმით რუსეთის ტერიტორიად გამოაცხადა.
