ჰომოსექსუალობა თურქეთში: მინისტრი იურისტების წინააღმდეგ
ეს ისტორია სწრაფად განვითარდა. თავდაპირველად, თურქეთის რელიგიის საქმეთა მინისტრმა, ალი ერბაშმა სიტყვით გამოსვლის დროს, სექსუალური უმცირესობა ამოიღო მიზანში.
ის ანკარის ადვოკატთა კოლეგიამ გააკრიტიკა.
ამის შემდეგ, კოლეგიის წინააღმდეგ, სისხლის სამართლის საქმე აღიძრა.
- „და ჩვენ ვიცეკვეთ“ – პრემიერა „ამირანში“. ფოტორეპორტაჟი
- ცხოვრება სიძულვილის გარემოში. რას ჰყვებიან ლგბტ ადამიანების მშობლები
- აივ ინფიცირებული ადამიანების დისკრიმინაცია სომხეთში – სწორედ ექიმებისგან
„ღალატი და ჰომოსექსუალობა – დაავადების მიზეზები“
„ისლამი ღალატს ერთ-ერთ უდიდეს ცოდვად მიიჩნევს და ლანძღავს ჰომოსექსუალობას. რატომ არის ასე? იმიტომ, რომ ამას თან ახლავს დაავადებები და კაცთა მოდგმის გახრწნა. ასობით ათასი ადამიანი ხდება აივ ინფექციის მსხვერპლი. მოდი, ერთად ვიბრძოლოთ, რომ ხალხი ამ უბედურებისგან დავიცვათ“, – განაცხადა ალი ერბაშმა.
„ის ხალხს ბოროტებისა და მტრობისკენ უბიძგებს“
„ჩვენ ძრწოლით ვუყურებდით რელიგიის საქმეთა მინისტრის, ალი ერბაშის გამოსვლას. მან სიძულვილი გამოხატა კაცობრიობის ერთი ნაწილის მიმართ და ის ბრბოს სამიზნედ აქცია“, – განაცხადა ადვოკატთა კოლეგიამ.
„ადამიანი, რომელიც სახელმწიფო სტრუქტურას უდგას სათავეში, წინარეისტორიული სისხლს მოწყურებული არსებასავით მსჯელობს, თავის სიტყვებს წმინდა ფასეულობებით ამართლებს და ხალხს ბოროტებისა და მტრობისკენ უბიძგებს“.
კოლეგია ასევე გვთავაზობს, ყურადღება მიექცეს იმ ფაქტს, რომ მინისტრობის პერიოდში, ის „თვალს ხუჭავდა ბავშვებზე ძალადობაზე“, „მორალურ საფუძველს უქმნიდა ქალთა მიმართ ძალადობას“ და ამისთვის სახელმწიფოსგან ხელფასს იღებდა.
კოლეგიის წევრთა აზრით, თუკი, მიუხედავად ასეთი გამოსვლისა, ალი ერბაში თანამდებობაზე დარჩება, არ იქნება გასაკვირი, რომ სიტყვით შემდეგი გამოსვლისას, მან „ადამიანებს ქუჩაში ჩირაღდნებით გამოსვლისა და მოედნებზე ქალების დაწვისკენ მოუწოდოს, თან მათ ბოროტი სული უწოდოს“.
ვინ არ არის მართალი ამ დავაში – ახლა სასამართლო გადაწყვეტს
ხელისუფლებამ, პრეზიდენტ ერდოღანის მეთაურობით, იუსტიციის მინისტრის ჩათვლით, უკვე ღიად დაუჭირა მხარი ალი ერბაშს.
რეჯეფ თაიფ ერდოღანი: „ერთადერთი სტრუქტურა, რომელიც უფლებამოსილია ისლამზე ისაუბროს – რელიგიის საქმეთა სამინისტროა. კოლეგიის განცხადება – ეს არის ისლამსა და სახელმწიფოზე თავდასხმა“.
ანკარის პროკურატურამ ანკარის ადვოკატთა კოლეგიის წინააღმდეგ სისხლის სამართლის საქმე აღძრა „ხალხის ნაწილის მიერ მიღებული რელიგიური ფასეულობების დამცირების“ ბრალდებით.
ამ ყველაფერს თან ახლდა სასტიკი კამათი სოციალურ ქსელებში.
ხელისუფლების ათობით მომხრემ რელიგიის საქმეთა მინისტრის მხარდამჭერი კამპანია წამოიწყო Twitter-ზე ჰეშთეგით #AliErbaşYalnızDeyildir (#ალიერბაშიმარტოარარის).
პირველი ტვიტი პრეზიდენტის პრესმდივანმა, იბრაჰიმ კალინმა დაწერა: „ისინი, ვინც თავს ესხმიან ალაჰის ბრძანებას, დროისა და სივრცის შემქმნელისა, დაემხობიან როგორც ამქვეყნიურ, ისე იმქვეყნიურ სამყაროში“.
ამავდროულად, ოპოზიციამ, ადვოკატებმა და აქტივისტებმა სოციალურ ქსელებში ადვოკატთა კოლეგიის მხარდამჭერი საკუთარი კამპანია წამოიწყეს, ჰეშთეგით – #AnkaraBarosuYalnızDeyildir (#ანკარისადვოკატთაკოლეგიამარტოარარის).
წამყვანი ოპოზიციური პარტიის, სახალხო რესპუბლიკური პარტიის პრესმდივანმა, ფაიქ ოზთრაქმა ჟურნალისტებს განუცხადა:
„ამ ქვეყანაში, რელიგიის წარმომადგენლებს უფლება აქვთ, საკუთარი აზრი გამოთქვან. მაგრამ მათ არ უნდა გამოიყენონ სიძულვილის ენა სხვისი ცხოვრების წესის მიმართ. ბოლო, რაც ჩვენ გვჭირდება – ეს არის საზოგადოების გამყოფი დისკრიმინაცია“.
ქალაქ იზმირის ადვოკატთა კოლეგიამ, ასევე მოუწოდა ხელისუფლებას „ხელი შეუშალონ არა იურისტებს, არამედ სიძულვილის გამავრცელებლებს“:
„მიგვაჩნია, რომ უნდა დაისაჯონ… ისინი, ვინც საზოგადოებას ყოფს და სიძულვილს თესავს. ჩვენ სიამაყით ვუდგავართ გვერდით ანკარის ადვოკატთა კოლეგიას“.
საზოგადოება, როგორც მოსალოდნელი იყო, ორ ბანაკად გაიყო.
მწერალმა იუსუფ კაპლანმა Twitter-ის საკუთარ გვერდზე, ერდოღანის სიტყვით გამოსვლის ვიდეო გამოაქვეყნა, სადაც მან მხარი დაუჭირა ერბაშს. და დაწერა, რომ სტამბოლის კონვენციის (ევროპის საბჭოს დოკუმენტი ქალთა მიმართ და ოჯახური ძალადობის წინააღმდეგ) გაუქმებას ისურვებდა.
მაგრამ ბევრი პოსტი დაიწერა, სადაც ადამიანები აღშფოთებულები იყვნენ მინისტრის სიტყვებით და არა იურისტების.
