ჰელსინკის კომისია ზურაბიშვილს პოლიტპატიმრების შეწყალებისკენ მოუწოდებს. რას ამბობს კელი დეგნანი

ჰელსინკის კომისია ნიკა გვარამიას შეწყალებაზე

აშშ-ს მთავრობის ადამიანის უფლებათა დაცვის ორგანიზაცია, რომელიც ჰელსინკის კომისიის სახელითაა ცნობილი, საქართველოს პრეზიდენტს, სალომე ზურაბიშვილს პოლიტპატიმრების შეწყალებისკენ მოუწოდებს. მათ შორისაა “მთავარი არხის” დამფუძნებელი, ნიკა გვარამია.

საქართველოში ამერიკის ელჩის, კელი დეგნანის თქმით, ნიკა გვარამიას შეწყალება მხოლოდ საქართველოს პრეზიდენტის სალომე ზურაბიშვილის პრეროგატივაა და დარწმუნებულია, რომ გადაწყვეტილების მიღებისას ყველა აზრს, მათ შორის ჰელსინკის კომისიის რეკომენდაციასაც გაითვალისწინებს. 

“როგორც საქართველოს ევროატლანტიკური ინტეგრაციისა და მისი დემოკრატიის დაცვის ხმამაღალი მხარდამჭერი, ჩვენ გვჯერა, რომ თქვენი დახმარება ერთი შეხედვით პოლიტიკურად მოტივირებული დევნის აღკვეთაში კრიტიკულად მნიშვნელოვანი ნაბიჯი იქნება.

მოგიწოდებთ, შეიწყალოთ 2022 წლის მაისში უფლებამოსილების ბოროტად გამოყენებისა და გაფლანგვის ბრალდებით დაკავებული ნიკა გვარამია.” – წერია ჰელსინკის კომისიის კონგრესმენების ორპარტიულ წერილში. 

ჰელსინკის კომისიის წერილი პირველი არ არის, რომელიც ნიკა გვარამიას ეხება. მანამდე, ევროპარლამენტმა, აბსოლუტური უმრავლესობით მიიღო რეზოლუცია, რომლითაც საქართველოს ხელისუფლებას მოუწოდებდა, გაეთავისუფლებინა საქართველოს ყოფილი პრეზიდენტი, მიხეილ სააკაშვილი და ნიკა გვარამია. ასევე, მათ ხმამაღლა გამოხატეს შეშფოთება საქართველოს მთავრობის მოულოდნელი გადახვევის შესახებ დასავლური და დემოკრატიული ღირებულებებისგან.

“ჰელსინკის კომისია არის პატივსაცემი ორგანიზაცია, რომელსაც აშშ-ს კონგრესისგან აქვს მანდატი, რომ მონიტორინგი გაუწიოს ადამიანთა უფლებების დაცვას მთელ მსოფლიოში, მათ შორის მედიის თავისუფლების დაცვასაც.

ამ ორგანიზაციამ, ისევე, როგორც საელჩომ, ნათლად განაცხადა, რომ გვარამიას საქმე შეშფოთებას იწვევს, მათ შორის თავდაპირველი ბრალდებები, ამ ბრალდებების დროულობა და შემდგომ პატიმრობის მისჯა. ასე რომ, ეს არის წერილი ორგანიზაციისგან, რომელიც საქართველოს მეგობარი და დემოკრატიული განვითარების, მისი პროგრესის და ევროპული ინტეგრაციის მხარდამჭერ იყო მრავალი წლის განმავლობაში.

საბოლოოდ, რა თქმა უნდა, შეწყალების შესახებ გადაწყვეტილების მიღება მხოლოდ ქალბატონი ზურაბიშვილის პრეროგატივაა და მე დარწმუნებული ვარ, რომ გადაწყვეტილების მიღებისას ის ყველა აზრს, მათ შორის ჰელსინკის კომისიისას, გაითვალისწინებს.” – განაცხადა დეგნანმა. 

● ნინო ლომჯარია: პრეზიდენტის პასუხისმგებლობაც არის, რომ ნიკა გვარამია დღემდე ციხეში ზის
● რატომ დააპატიმრეს ნიკა გვარამია. მოკლედ საქმის არსი და შეფასებები
● “დაუწესდეს სანქციები ივანიშვილს, გათავისუფლდნენ სააკაშვილი და გვარამია” – EPP-ის რეზოლუცია

საქართველოს პრეზიდენტმა, სალომე ზურაბიშვილმა აღდგომის დღესასწაულთან დაკავშირებით 10 მსჯავრდებული შეიწყალა, თუმცა შეწყალებულთა შორის ნიკა გვარამია არ აღმოჩნდა.

“მთავარი არხის” დამფუძნებლის საქმე მოხვდა ამერიკის სახელმწიფო დეპარტამენტის ბოლო ანგარიშშიც. დოკუმენტის ქვეთავებში, რომლებიც პოლიტიკურ პატიმრებსა და გამოხატვის თავისუფლება ეხება, საუბარია მთავარი არხის გენერალური დირექტორი, ნიკა გვარამიას დაკავების შესახებ.

ანგარიშში ხაზგასმულია, რომ სახალხო დამცველის აპარატმა, ადგილობრივმა სამოქალაქო საზოგადოებამ და საერთაშორისო უფლებადამცველმა ორგანიზაციებმა მკაცრად გააკრიტიკეს თბილისის საქალაქო სასამართლოს 16 მაისის გადაწყვეტილება, რომლის მიხედვითაც ნიკა გვარამიას თავისუფლების აღკვეთა მიუსაჯეს.

თეთრი სახლი Amnesty International-ზე დაყრდნობით წერს, რომ გვარამიას საქმემ გამოავლინა “მთავრობის მზარდი გავლენა სასამართლოებზე რიგ საქმეებში”, რომლებიც მიზნად ისახავს მათი კრიტიკოსებისა და ოპონენტების დათრგუნვას.

აშშ-ს სახელმწიფო დეპარტამენტის ანგარიშში ასევე აღნიშნულია, რომ სახალხო დამცველმა და არასამთავრობო ორგანიზაციებმა გვარამიას საქმე პოლიტიკურ დევნად შეაფასეს. მათივე თქმით, ჟურნალისტებმა, არასამთავრობო ორგანიზაციებმა და საერთაშორისო საზოგადოებამ გამოთქვეს სერიოზული შეშფოთება ხელისუფლების მხრიდან გამოხატვის თავისუფლების პატივისცემასთან დაკავშირებით.

ნიკა გვარამია 2022 წლის 16 მაისს, სასამართლო დარბაზში დააპატიმრეს. კრიტიკული მედიის ხელმძღვანელს სამი წლით და ექვსი თვით თავისუფლების აღკვეთა მიესაჯა ეპიზოდზე, რომელშიც მას სამსახურებრივი მანქანის ოჯახის საჭიროებებისთვის გამოყენებას ედავებიან.