გიორგი შაქარაშვილის საქმე: 17 დაკავებული და არც ერთი ბრალდებული. რა არის ცნობილი ამ დროისთვის
19 წლის ფეხბურთელის გარდაცვალების ფაქტზე მიმდინარე გამოძიების ფარგლებში, სამართალდამცველებმა 17 პირი, მათ შორის რამდენიმე სპორტსმენი დააკავეს. საქმეს ჯგუფური ძალადობის კვალიფიკაცია მიეცა.
გამოძიებას ჯერ ბრალდებული არ ჰყავს, თუმცა 17 დაკავებული პირიდან ერთი გამოიკვეთა, რომელიც უშუალოდ მონაწილეობდა შაქარაშვილის გარდაცვალების საქმეში.
ახლობელი გოგონას დაბადების დღეზე წასული გიორგი შაქარაშვილის ცხედარი მაშველებმა 23 ივნისს ოთხდღიანი ძებნის შემდეგ მდინარე არაგვში იპოვეს. ტრაგედიას წინ უძღოდა ჩხუბი და ფიზიკური დაპირისპირება ახალგაზრდების ორ ჯგუფს შორის.
გიორგი მოკლეს თუ იგი უბედური შემთხვევის მსხვერპლი გახდა? – შაქარაშვილის გარდაცვალებიდან მეცხრე დღის თავზე გამოძიებას არც ამ კითხვაზე აქვს პასუხი.
ბუნდოვანი რჩება საბედისწერო დღის სურათიც.
____________
19 ივნისს, დაახლოებით დილის 11 საათზე, 19 წლის გიორგი შაქარაშვილის ოჯახმა პოლიციას შეატყობინა, რომ გიორგი წინა დღით დაბადების დღეზე წავიდა და მას შემდეგ არ დაბრუნებულა.
ოთხდღიანი ძებნის შემდეგ მყვინთავებმა მცხეთასთან, მდინარე არაგვში გიორგის ცხედარი იპოვეს.
მანამდე, ერთი დღით ადრე, მაშველებმა მდინარის ნაპირას გიორგის პატარა, წელზე გასაკეთებელ ჩანთა იპოვეს, სადაც სავარცხელი და თმის ჟელე იდო.
ცხედარს ბევრი დაზიანება ჰქონდა – მრავლობითი მოტეხილობები, თავის არეში დაბეჟილობა.
გამოძიებისთვის ჯერჯერობით უცნობია რა მოხდა.
როგორ აღმოჩნდა მდინარეში ახალგაზრდა ბიჭი, რომელიც მეგობრის დაბადების დღეზე წავიდა?
უცნობია ისიც, თუ რა გახდა გიორგის გარდაცვალების მიზეზი – დაზიანებები მას სიცოცხლეში მიაყენეს თუ უკვე მდინარეში ჩავარდნის შემდეგ მიიღო. სასამართლო-სამედიცინო ექსპერტიზის პასუხი რამდენიმე კვირაში იქნება.
სისხლის სამართლის საქმე სამი მუხლითაა აღძრული: 143-ე მუხლი – თავისუფლების უკანონოდ აღკვეთას, 126-ე მუხლი – ძალადობას და 225-ე მუხლი – ჯგუფურად ჩადენილ დანაშაულს გულისხმობს.
გამოძიება ამბობს, რომ დაკავებულ 17 ადამიანს შორის არის გამოკვეთილი ერთი, რომელიც უშუალოდ მონაწილეობდა შაქარაშვილის გარდაცვალების საქმეში.
გამოძიებამ 50-ზე მეტი მოწმე გამოკითხა, ძირითადად გიორგის თანატოლები. გაჩხრეკილია მათი ბინები, ამოღებულია მათი მობილურები, მანქანები, ტანსაცმელი. გამოთხოვილია სათვალთვალო კამერების ჩანაწერებიც.
გამოძიება ცდილობს აღადგინოს სრული სურათი, თუ რა მოხდა 18 ივნისს მცხეთასთან, ნაქირავებ სააგარაკო სახლში, სადაც 18 წლის გოგო დაბადების დღეს იხდიდა.
სწორედ დაბადების დღის სუფრასთან დაიწყო ჩხუბი, რომელიც ტრაგედიით დასრულდა.
დაბადების დღე მცხეთაში. რა არის ცნობილი ამ დროისთვის:
18 ივნისს გიორგი შაქარაშვილი მეგობრებთან ერთად თანატოლი გოგონას დაბადების დღის აღსანიშნავ წვეულებაზე წავიდა.
წვეულება იმართებოდა ქალაქგარეთ, მცხეთასთან, ნარეკვავის დასახლებაში, სპეციალურად ამ დღისთვის ნაქირავებ კერძო სახლში. მოწვეული იყო დაახლოებით 40-45 სტუმარი, ყველანი ახალგაზრდები.
სტუმრებს შორის იყო 19 წლის გიორგი შაქარაშვილი. იმედისმომცემი ახალგაზრდა ფეხბურთელი „საბურთალოს“ საფეხბურთო აკადემიიდან.
ახალგაზრდების ორ ჯგუფს შორის კონფლიქტი სუფრასთან მალევე გაჩნდა. სიტყვიერი შელაპარაკება ხელჩართულ ჩხუბში გადაიზარდა.
რა თემაზე დაიწყო სტუმრებს შორის კონფლიქტი, ამას გამოძიება არ აკონკრეტებს.
როგორც მოწმეები ამბობენ, გიორგი უშუალოდ კონფლიქტში არ მონაწილეობდა.
რაღაც პერიოდის შემდეგ, კონფლიქტში მონაწილე ახალგაზრდების ერთი ჯგუფი წვეულებიდან თბილისში დაბრუნდა. თუმცა, ისინი დაიმუქრნენ, რომ მეგობრებთან ერთად დაბრუნდებოდნენ.
როგორც გამოძიებით ირკვევა, ეს მოზარდები ასეც მოიქცნენ – ჩავიდნენ თბილისში, შეკრიბეს ჯგუფი, დაგეგმეს ძალადობა და ორი ავტომანქანით ისევ მცხეთისკენ გაემართნენ.
ამასობაში, წვეულება დატოვეს გიორგი შაქარაშვილმა და კიდევ ხუთმა ახალგაზრდამ. აგარაკთან მათ ტაქსი ვერ გამოიძახეს, ამიტომ ფეხით დაიძრნენ და გადაწყვიტეს „ავტოსტოპით“ წამოსვლა თბილისისკენ.
იმ დროს, როდესაც გიორგი შაქარაშვილი და მისი მეგობრები თბილისი-სენაკი-ლესელიძის ავტობანს ფეხით მიუყვებოდნენ, მათ თბილისიდან მომავალი “მერსედესი” წამოეწია.
„ორგანიზებული ჯგუფის წევრები“ – ასე მოიხსენიებს გამოძიება მანქანით მოსულ ახალგაზრდებს, რომლებიც გამოძიების ვერსიით, თავს დაესხნენ გზაზე მიმავალ მოზარდებს.
მოძალადეებისთვის რომ თავი დაეღწიათ, გიორგი შაქარაშვილი და მისი მეგობრები მდინარე არაგვისკენ გაიქცნენ.
მალე შემთხვევის ადგილზე მეორე მანქანაც გამოჩნდა – შავი “ტოიოტა ქამრი”.
ორგანიზებული ჯგუფის წევრები, რომელთა შორის იყვნენ სპორტსმენები – რაგბისტები, ფეხბურთელები, ძიუდოისტები – გაქცეულებს გაეკიდნენ.
გამოძიება ამბობს, რომ გიორგი შაქარაშვილი დევნისგან თავის დაღწევის მიზნით მდინარის კალაპოტის მიმართულებით გაიქცა.
სწორედ აქ, თბილისი-ლესელიძის ავტობანთან გაქრა გიორგის კვალი. ის და მისი მეგობრები სხვადასხვა მხარეს გაიქცნენ, ამის შემდეგ იგი არავის უნახავს.
მანქანიდან გადმოსულებმა მოახერხეს შაქარაშვილის ერთი მეგობრის, 2001 წელს დაბადებული გური ამირხანაშვილის დაჭერა – სცემეს მას და ძალით ჩასვეს მანქანაში.
ამაზე მეტს, ამ ტრაგიკული ამბის შესახებ გამოძიება ჯერჯერობით არაფერს ჰყვება.
მუხლი, რომლითაც აღძრულია საქმე, 16 წლამდე თავისუფლების აღკვეთას ითვალისწინებს.
საინფორმაციო სააგენტო „ინტერპრესნიუსისთვის“ მიცემულ ინტერვიუში, საქმის ერთ-ერთი მოწმე, გიორგი შაქარაშვილის მეგობარი იაკობ ბრეგვაძე ჰყვება, რომ ავტობანზე როცა მოდიოდნენ, მათ წინ გაჩერდა მანქანა, საიდანაც გადმოვიდა ხუთი ადამიანი, რომელთაგანაც ერთ-ერთს ხელში რკინის ხელკეტი ეჭირა:
„ამათ ეგონათ, რომ ჩვენ ისინი ვიყავით, ვინც იქ იყვნენ (აგარაკზე), არადა საერთოდ სხვა “სასტავი” ვიყავით, არაფერ შუაში ვიყავით. ის ერთი ბიჭი საავადმყოფოშია. მოკლედ ყველა გავიქეცით, სამი კაცი გაიქცა ხიდისკენ. ერთი ბიჭი იქვე ბუჩქებში დაიმალა, როგორც მერე გავიგე. მე ღობეზე გადავხტი, მიტოვებულ მშენებარე შენობაში, მეორე სართულზე ავედი და დავრეკე პოლიციაში. პოლიციაში რომ დავრეკე, ვუთხარი, რაც მოხდა, როგორც მოხდა და არაგვის ხიდზე მოდით-მეთქი და სადააო. “კაროჩე”, როცა მორჩა ყველაფერი, მერე მოვიდნენ…”
ბრეგვაძე ჰყვება, რომ მას შემდეგ, რაც მანქანა წავიდა, ის გამოვიდა სამალავიდან, რომ ნაცემ ახალგაზრდას დახმარებოდა, თუმცა, ამ დროს ტრასაზე მეორე მანქანა ჩნდება:
„ტრასაზე იყო ორი ბიჭი, ჩვენები. და ერთი ნაცემი იყო… პირველი მანქანა რომ წავიდა, ორ ან სამ წუთში მოვიდა მეორე მანქანა. სხვა მანქანა იყო სავარაუდოდ, არ ვიცი. იქიდანაც გადმოვიდნენ ბიჭები, თქვენი დედაო და ესენიც სცემეს,“ – ჰყვება ბრეგვაძე.
მისი მონათხრობი ბუნდოვანია და ფრაგმენტული.
იაკობის სიტყვებით, უკვე ღამის ორის წუთები იყო, როცა სამალავიდან გამოვიდა. ამ დროს საავტომობილო ტრასაზე აღარავინ ჩანდა, ავიდა ტყეში და იქიდან კვლავ დაურეკა პოლიციას, თუმცა, მისი თქმით, ამჯერად უკვე გამოძახების გასაუქმებლად:
„დავურეკე, აღარაფერი ხდება და შეგიძლიათ გააუქმოთ-მეთქი. იქიდან რომ ჩამოვედი, მერე მოვიდა პოლიცია, მოვუყევი ეს ყველაფერი და მეთქი, მორჩა ყველაფერი და ერთადერთი თუ შეგიძლიათ, რომ თბილისში წამიყვანოთ-მეთქი და წამიყვანეს თბილისში“.
იაკობ ბრეგვაძე ამბობს, რომ მას არ დაუნახავს, სად გაიქცა გიორგი შაქარაშვილი.
ვინ არიან დაკავებულები და ფიგურანტები
ამ დროისთვის პოლიციას 17 ადამიანი ჰყავს დაკავებული.
გამოძიების ერთ-ერთი მთავარი მოწმეა გური ამირხანაშვილი – გიორგი შაქარაშვილის მეგობარი, ბოლო ადამიანი, რომელმაც ის ნახა.
ამირხანაშვილმა უკვე ამოიცნო მანქანებში მსხდომები.
საქმეში ორი მანქანა ფიგურირებს – ამ მანქანაში ისხდნენ ის ადამიანები, რომლებიც თბილისიდან მოდიოდნენ ანგარიშსწორებისთვის.
თავდაპირველად ტრასაზე „მერსედესი“ გამოჩნდა. შემდეგ „ტოიოტა“.
„მერსედესს“, სავარაუდოდ, მართავდა ძიუდოისტი, ევროპის ჩემპიონი და მსოფლიოს ვერცხლის პრიზიორი ჭაბუკებს შორის, გიგა ტატიაშვილი. სავარაუდოდ, გიგა ტატიაშვილი აგარაკზე, დაბადების დღის სუფრაზეც იმყოფებოდა. “ტოიოტაში” კი, მორაგბეები – არჩილ გაგნიძე და ვასილ მახარაძე იხსდნენ.
