ნეიტრალური პლატფორმა, პარიტეტი, კოალიციის დაუშვებლობა ენმ-ოცნებასთან - რაზეა მზად გიორგი გახარია და რას პასუხობს ხაზარაძე
გიორგი გახარია და მამუკა ხაზარაძე
პარტია “საქართველოსთვის” ლიდერმა გიორგი გახარიამ “ძლიერ საქართველოსთან” მოლაპარაკებასთან დაკავშირებით საგანგებო ბრიფინგი გამართა. ყოფილი პრემიერის თქმით, მისი პარტია უბრუნდება თავდაპირველ მიზანს და საჯაროდ აცხადებენ მათ მზაობას შემდეგი პრინციპებით:
1. ნეიტრალური პლატფორმა;
2. გადაწყვეტილების მიღების სამართლიანი, პარიტეტული პრინციპი;
3. კოალიციის დაუშვებლობის პრინციპი როგორც ქართულ ოცნებასთან, ისე ნაციონალურ მოძრაობასთან;
“ლელოს” ლიდერი მამუკა ხაზარაძე ამბობს, რომ გახარიას ახალი პირობების შესრულება შეუძლებელია. მისი განმარტებით, “პრაქტიკულად პარტიები, ჩვენი კოალიცია, ჩვენი გაერთიანება” უნდა ჩამოშორდეს კამპანიას, რადგან, ხაზარაძის განმარტებით, 30 დღის განმავლობაში შეუძლებელია რაიმე კამპანიის, რაიმე ნომრის, რაიმე სიის, რაიმე ტექნიკური საშუალებების მომზადება, განთავსება და ა.შ..
“მე მას შევთავაზე, რომ რადგან ჩვენ კონფლიქტის წარსულიდან მოვდივართ, ხომ არ ჯობია, ჩვენ არ ვიყოთ სიაში და ახალგაზრდებს დავუჭიროთ მხარი.
თუმცა, მერე მივხვდი გუშინდელ შეხვედრაზე, რომ მან შეიძლება ჩათვალა, თითქოს ვიღაცას უნდა მისი პოლიტიკიდან ჩამოშორება, რაც ასე არ არის და ვუთხარი, რომ კი ბატონო, როგორც კომპრომისი, მზად ვარ, რომ ეს პუნქტი შევცვალოთ და გუშინვე დავუდასტურე, რომ თუ სურვილი აქვს, რომ იყოს სიაში, იყოს სიაში, შესაბამისად, მეც მასთან ერთად.” – განაცხადა ხაზარაძემ.
გახარიამ ბრიფინგზე აღნიშნა, რომ “მეორე მხარის სიხარბემ” პროცესი საბოლოოდ შეიყვანა ჩიხში. მისივე თქმით, მან დათმო ნეიტრალური პლატფორმა, რამაც “სიხარბე წაახალისა”. როგორც გახარია განმარტავს, მამუკა ხაზარაძე ნეიტრალურ პლატფორმასთან ერთად, არ დათანხმდა გადაწყვეტილების მიღების პარიტეტულ პრინციპს და კოალიციის დაუშვებლობას როგორც ქართულ ოცნებასთან, ისე ნაციონალურ მოძრაობასთან.
პარტია “საქართველოსთვის” ლიდერი ასევე აღნიშნავს, რომ მოლაპარაკებების პროცესის არჩევნებამდე “ასე ახლოს და მოუმზადებლად”, ცესკოს სიების წარდგენამდე ერთი კვირით ადრე დაწყება, შეცდომა იყო.
“თუმცა, ჩვენი მხრიდან პრეზიდენტის ამ შემოთავაზებაზე უარის თქმაც, რა თქმა უნდა, არ იქნებოდა სწორი.
მე ეს მოლაპარაკებები უფრო ადრე უნდა დამესრულებინა, მაშინვე, როგორც კი ვერ მოხერხდა ნეიტრალურ პლატფორმაზე შეთანხმება. ჩემი მხრიდან ნეიტრალური პლატფორმის საკითხის დათმობამ მეორე მხარის სიხარბე წაახალისა, რამაც პროცესი საბოლოოდ შეიყვანა ჩიხში” – თქვა მან და განმარტა, რომ ნეიტრალური პლატფორმა ნიშნავს სხვა ნეიტრალურ პარტიას, ორგანიზაციას, ნომერს, რომელიც არ არის არც 25, არც 9, არც “ლელო” და არც “გახარია-საქართველოსთვის.”
მამუკა ხაზარაძესა და გიორგი გახარიას შორის საარჩევნო ერთობაზე მოლაპარაკებები სამი დღის განმავლობაში მიმდინარეობდა. მათ შორის, რამდენიმე შეხვედრა გაიმართა პრეზიდენტ სალომე ზურაბიშვილის სასახლეში.
გუშინ გიორგი გახარიას პარტიამ გააკეთა განცხადება, რომ “ძლიერ საქართველოსთან” შეთანხმების მიღწევა ამ ეტაპზე ვერ მოხერხდა, რადგან მეორე მხარემ “შიდა კონსენსუსს” ვერ მიაღწია. მათივე თქმით, “ლელო – საქართველოსთან” დაწყებული დისკუსია აჩენს პოზიტიურ მოლოდინებს მომდევნო მოწვევის პარლამენტში თანამშრომლობასთან დაკავშირებით.
16 სექტემბერს საქართველოს პრეზიდენტმა, სალომე ზურაბიშვილმა კოალიცია “ძლიერი საქართველოს” ლიდერი, მამუკა ხაზარაძე და პარტია “გახარია – საქართველოსთვის” ლიდერი, გიორგი გახარია 17 სექტემბერს ორბელიანების სასახლეში, გაერთიანების საკითხზე მოსალაპარაკებლად მიიწვია.
პრეზიდენტმა გამართულ ბრიფინგზე აღნიშნა, რომ იგი მზად იყო, მოლაპარაკების პროცესისთვის ხელი შეეწყო, როგორც ნეიტრალურ მხარეს.
17 სექტემბერს ოპოზიციონერები ერთმანეთს ჯერ პრეზიდენტის გარეშე, შემდეგ კი ორბელიანების სასახლეში შეხვდნენ. შეხვედრის დასრულების შემდეგ, გიორგი გახარიამ თქვა, რომ მამუკა ხაზარაძემ “კიდევ ერთი დღე ითხოვა პოზიციების შესათანხმებლად.”
18 სექტემბერს ხაზარაძე და გახარია ორბელიანების სასახლეში კიდევ შეხვდნენ. შეხვედრის შემდეგ გახარიამ განაცხადა, რომ მოლაპარაკებები ხვალ დასრულდებოდა, ხოლო ხაზარაძე ამბობდა, რომ მოლაპარაკებები მარტივი არ იყო, თუმცა “პრინციპულად ახლოს იყვნენ.”
