გიგა ოთხოზორიას მკვლელობიდან 4 წელი გავიდა. მკვლელი ისევ დაუსჯელია
4 წელი შესრულდა აფხაზი მესაზღვრის, რაშიდ კანჯი-ოღლის მიერ გიგა ოთხოზორიას მკვლელობიდან. მიუხედავად იმისა, რომ ოთხოზორიას მკვლელობა სათვალთვალო კამერითაა გადაღებული, მკვლელი დღემდე დაუსჯელია.
სოხუმის სამხედრო პროკურატურა აცხადებს, რომ საქმეში დანაშაულის ნიშნები არ იკვეთება. ოპოზიცია აცხადებს, რომ ხელისუფლება სათანადო გამოძიებას არ ატარებს და არაფერს აკეთებს “ტატუნაშვილი-ოთხოზორიას” 33-კაციანი სიის გასაფართოებლად, სადაც ოკუპირებულ ტერიტორიებზე საქართველოს მოქალაქეების წინააღმდეგ ჩადენილ მკვლელობაში, გატაცებაში, წამებასა და ამ დანაშაულთა დაფარვაში ბრალდებული და მსჯავრდებული პირები შედიან.
4 წლის წინ მოკლული გიგა ოთხოზორიას ოჯახი სამართალს ამჯერად უკვე სტრასბურგის ადამიანის უფლებათა ევროპულ სასამართლოში ეძებს. ოთხოზორიას ოჯახმა სტრასბურგში სარჩელი 2018 წლის იანვარში შეიტანა. სტრასბურგის ადამიანის უფლებათა ევროპულმა სასამართლომ ოთხოზორიას საქმის არსებითი განხილვა უკვე დაიწყო.
გიგა ოთხოზორიას მკვლელობა
30 წლის გიგა ოთხოზორია 2016 წლის 19 მაისს ზუგდიდის რაიონის სოფელ ხურჩასთან, აფხაზეთის ე. წ. ადმინისტრაციულ საზღვართან, თბილისის მიერ კონტროლირებად ტერიტორიაზე მოკლეს. მას აფხაზმა მესაზღვრემ, რაშიდ კანჯი-ოღლიმ 6 ტყვია ესროლა. ოთხოზორიას მკვლელობა სათვალთვალო კამერითაა გადაღებული. ვიდეომასალაში ჩანს, რომ აფხაზეთის ე.წ. სასაზღვრო სამსახურის წარმომადგენელმა რაშიდ კანჯი-ოღლიმ და ოთხოზორიამ იკამათეს – ზუგდიდში მცხოვრები ოთხოზორია გალში პროდუქტის გაგზავნას ცდილობდა, რის საშუალებასაც აფხაზი მესაზღვრეები არ აძლევდნენ. კამათის შემდეგ კანჯი-ოღლიმ დატოვა საკონტროლო პუნქტი, გადავიდა სოფელ ხურჩის მხარეს და რამდენჯერმე ესროლა შეუიარაღებელ ოთხოზორიას.
ქართულმა მართლმსაჯულებამ რაშიდ კანჯი-ოღლის 14-წლიანი პატიმრობა მიუსაჯა.
ოთხოზორიას მკვლელობის საქმეზე გამოძიება აფხაზეთის სამხედრო პროკურატურამაც დაიწყო. ბრალდებულ კანჯი-ოღლის აფხაზეთის დე ფაქტო რესპუბლიკის სასამართლომ აღმკვეთი ღონისძიების სახით შინაპატიმრობა შეუფარდა. თუმცა, 2017 წლის 21 აპრილს კანჯი-ოღლის წინააღმდეგ სამართლებრივი დევნა შეწყდა და საქმე დაიხურა. სოხუმის სამხედრო პროკურორის, ადგუნ აგრბას თქმით, საქმეში არ გამოიკვეთა დანაშაულის ნიშნები, რადგან ქართულმა მხარემ სოხუმს არ მიაწოდა საქმის განსახილველად საჭირო მასალები.
რას ასაჩივრებს ოთხოზორიების ოჯახი სტრასბურგში?
სტრასბურგის ადამიანის უფლებათა ევროპულ სასამართლოში საჩივარი რუსეთის ფედერაციის წინააღმდეგაა შეტანილი. საჩივრის ავტორები საქართველოს ახალგაზრდა იურისტთა ასოციაცია და „ადამიანის უფლებათა დაცვის ევროპული ცენტრი“ არიან.
- საქართველოს პარლამენტმა “ოთხოზორია-ტატუნაშვილის სია” მიიღო. რას ნიშნავს ეს და როგორ იმუშავებს?
- საქართველომ სტრასბურგში რუსეთის წინააღმდეგ ორი საჩივარი შეიტანა
ევროპულ სასამართლოში წარდგენილ საჩივარში საუბარია იმაზე, რომ რუსეთის ფედერაციამ დაარღვია ევროპული კონვენციის მეორე (სიცოცხლის უფლება) და მეცამეტე (სამართლებრივი დაცვის ქმედითი საშუალების უფლება) მუხლები.
საჩივრის ავტორების შეფასებით, ოკუპირებული აფხაზეთის ტერიტორიაზე ადამიანის უფლებების დარღვევევაზე და ასევე, აფხაზეთის დე ფაქტო ხელისუფლების ქმედებებზე პასუხისმგებლობა რუსეთის ფედერაციას ეკისრება, როგორც აღნიშნულ ტერიტორიაზე ეფექტური კონტროლის განმახორციელებელ სახელმწიფოს.
რა არის ტატუნაშვილი-ოთხოზორიას სია და რას გულისხმობს ის?
საქართველოს პარლამენტმა “მაგნიტსკის სიის” მსგავსი “ოთხოზორია-ტატუნაშვილის სია” 2018 წლის ივნისში დაამტკიცა.
სიის მთავარი მიზანია ოკუპირებულ ტერიტორიებზე საქართველოს მოქალაქეების უსაფრთხოების დაცვა.
ცხინვალსა და ზუგდიდის რაიონის სოფელ ხურჩასთან მოკლული საქართველოს მოქალაქეების – არჩილ ტატუნაშვილის და გიგა ოთხოზორიას სახელი ამ სიას სიმბოლურად ჰქვია. სიაში მხოლოდ ტატუნაშვილის და ოთხოზორიას მკვლელობაში ბრალდებულები არ არიან. პარლამენტის მიერ მიღებული რეზოლუციის თანახმად, სიაში შედიან ოკუპირებულ ტერიტორიებზე საქართველოს მოქალაქეთა მკვლელობაში, გატაცებაში, წამებასა და არაჰუმანურ მოპყრობაში, ჯანმრთელობის მძიმე დაზიანებასა და დანაშაულის დაფარვაში ბრალდებული და მსჯავრდებული პირები.
“ოთხოზორია-ტატუნაშვილის სიაში” მყოფ პირებს დაუყადაღდებათ ის ქონება, რომელზეც საქართველოს მთავრობას ხელი მიუწვდება;
2. მათ შეეზღუდებათ ქონების გადაადგილება თუ შეძენა, ასევე ფინანსური ტრანზაქციების განხორციელება საქართველოს პარტნიორ სახელმწიფოებში;
3. ისინი ვერ მიიღებენ ვიზებს საქართველოს პარტნიორ ქვეყნებში სამოგზაუროდ;
4. ისინი ვერ ისარგებლებენ იმ შეღავათებით, რომლებიც საქართველოს მთავრობას ოკუპირებულ ტერიტორიებზე მცხოვრები ადამიანებისთვის აქვს დაწესებული – მაგალითად, ვერ იმკურნალებენ საქართველოში (2010 წლიდან მოქმედებს ე.წ. ჯანდაცვის პროექტი, რომელიც გულისხმობს აფხაზეთიდან და ოსეთიდან პაციენტების უფასოდ მკურნალობას საქართველოს საავადმყოფოებში).
ოპოზიცია აცხადებს, რომ ხელისუფლებამ „ოთხოზორია-ტატუნაშვილის სია“ თავის დროზე მხოლოდ საზოგადოებრივი ზეწოლის გამო მიიღო და მის გასაფართოებლად არაფერს აკეთებს.
“ევროპული საქართველოს” ერთ-ერთმა ლიდერმა, სერგი კაპანაძემ დაასახელა კონკრეტული გვარები, მათ შორის, გიგა ოთხოზორიას მკვლელობის ადგილზე ვიდეოკამერით გადაღებული პირები. კაპანაძის თქმით, სიაშია გიგა ოთხოზორიას მკვლელობისთვის დაუსწრებლად მსჯავრდებული აფხაზი „მესაზღვრე“, რაშიდ კანჯი-ოღლი, თუმცა, დღემდე არ არიან: „ქაჯაია, ცვეიბა, კუტოღლი, კვეკვესკირი, კორტენკო, მათ შორის, რუსეთის ფედერაციის მოქალაქეები, რომლებიც ვიცით, რომ მონაწილეობდნენ. ერთ-ერთმა, მაგალითად, წაიყვანა საერთოდ, კანჯი-ოღლი იმ ადგილიდან“.
სერგი კაპანაძის განცხადებითვე, სიაში დღემდე არ არიან რუსეთის ფედერაციის ის მოქალაქეებიც, რომლებიც ხელმძღვანელობენ ახალგორსა და ცხინვალში მდებარე სამხედრო ბაზებს და არჩილ ტატუნაშვილის მკვლელობის თანამონაწილეები არიან.
„ევროპულ საქართველოში“ მიიჩნევენ, რომ ხელისუფლება არც იმაზე ფიქრობს, რომ „ოთხოზორია-ტატუნაშვილის სიაში“ შეიყვანონ მშვიდობიანი მოქალაქეების, მათ შორის, ექიმ ვაჟა გაფრინდაშვილის უკანონოდ დაკავებაზე პასუხისმგებელი პირები. სერგი კაპანაძის თქმით, ხელისუფლება არც შესაბამის გამოძიებას ატარებს, რაც პირდაპირი გამოვლინებაა იმისა, რომ თავის დროზე სია მხოლოდ საზოგადოებრივი ზეწოლის გამო მიიღეს.
