კომენტარი: კორუფციასთან ბრძოლის პროცესი კი არა, ახლა მიმდინარეობს ქონების გადანაწილების პროცესი
გია ხუხაშვილის კომენტარი
პოლიტოლოგმა გია ხუხაშვილმა ყოფილი პრემიერის, ირაკლი ღარიბაშვილის საქმის გარშემო არსებულ ვითარებაზე ისაუბრა და აღნიშნა, რომ ეს არის კრიმინალური გარჩევების ისტორია, რადგან, მისი თქმით, ყველამ იცოდა, რომ ირაკლი ღარიბაშვილი ისედაც კორუფციაში იყო ჩართული და მთელი სისტემა კორუფციაზე დგას.
პოლიტოლოგის თქმით, ქონების გადანაწილების პროცესის კატალიზატორი გახდა ბიზნესმენ ლევან ჯანგველაძის ქეისი (კანონიერი ქურდის, მერაბ ჯანგველაძის ძმა, ბიზნესმენი ლევან ჯანგველაძე თბილისში, 14 მარტს მოკლეს – რედ.) ანუ აქ უკვე შემოვიდა კრიმინალური დაჯგუფებების დაპირისპირება და ჯანგველაძის მკვლელობის თემამ დიდი აფეთქების როლი ითამაშა.
“ქართული ოცნების” რიგებში უპრეცედენტო სკანდალია. საქართველოს
ორგზის პრემიერი, მმართველი პარტიის ყოფილი თავმჯდომარე და ბიძინა ივანიშვილის მთავარი პროტეჟე ირაკლი ღარიბაშვილი კორუფციულ საქმეშია გახვეული.
ღარიბაშვილი უკვე იყო გამოკითხვაზე სახელმწიფო უსაფრთხოების სამსახურში და როგორც ეს უწყება ავრცელებს განცხადებას, ყოფილმა პრემიერმა “სრულად ითანამშრომლა გამოძიებასთან და აღიარა წლების განმავლობაში უკანონო შემოსავლების მიღების ფაქტი”.
ღარიბაშვილთან ერთად კორუფციულ სკანდალში კიდევ ორი ყოფილი გავლენიანი მაღალჩინოსანია გარეული – სახელმწიფო უსაფრთხოების სამსახურის უფროსი, გრიგოლ ლილუაშვილი და გენერალური პროკურორის ოთარ ფარცხალაძე. ჩხრეკა მათ სახლებშიც ჩატარდა.
გია ხუხაშვილი: “ხელისუფლებამ გადაწყვიტა არა კორუფციასთან ბრძოლა, არამედ სალაროს შევსება იმ ადამიანებისგან, ვინც თავის დროზე ფულის საკეთებლად მიუშვეს. მიიღეს პოლიტიკური გადაწყვეტილება, დაიწყეს მოლაპარაკებები ამ ადამიანებთან, ალბათ კონკრეტული რიცხვები დაუსახელეს, რამდენი უნდა მიეტანათ, მათ არ მიიტანეს და ამის შემდეგ, ფაქტობრივად, იძულებული გახდა ხელისუფლება, რომ მუქარა აღესრულებინა და დაეწყო სისხლის სამართლებრივი დევნა.
ჩვენ ახლა სამართლის ისტორიაზე არ ვლაპარაკობთ, ეს არის კრიმინალური ისტორია. ეს ხალხი კორუმპირებული რომ იყო და უკანონო ბიზნესში იყო, ეს ხომ საყოველთაოდ ცნობილი იყო. ჩვენ ახლა სამართლებრივ პროცესში არ ვართ, რომ ვიმსჯელოთ იმაზე, ვიღაცას დაიჭერენ თუ არ დაიჭერენ. დაიჭერენ, თუ ვერ შეუთანხმდებიან და არ დაიჭერენ, თუ შეუთანხმდებიან. ეს არის კრიმინალური ქურდული გარჩევის მაგვარი პროცესი, რასაც ჩვენ დღეს ვხედავთ.
ყველამ იცოდა, რომ ღარიბაშვილი კორუფციაში იყო ჩართული, ყველამ იცოდა, რომ უკანონო ბიზნესში იყო ჩართული და მარტო ის კი არ იყო ჩართული, მთელი სისტემა ამაზე დგას. კორუფციასა და უკანონო შემოსავალზე დგას ნებისმიერი ავტორიტარული რეჟიმი იმიტომ, რომ ავტორიტარიზმი უკანონო შემოსავლებისა და კორუფციის გარეშე ვერ იარსებებს. ეს არის ერთგვარი ურჩხული სისტემა, რომელსაც სჭირდება მუდმივი კვება, სხვანაირად სტაბილურობას ვერ შეინარჩუნებს.
ჩვენ არ ვიცით ჯერ, რა აღიარა. თავისთავად, კორუფციაზე აღიარების ფაქტი ძალიან სასაცილოა. აღიარა რომ კორუმპირებულია?
ღარიბაშვილს უკანონო შემოსავლების მიღების რა შანსი ჰქონდა, პრემიერი რომ არ ყოფილიყო? ამას არ აღიარებენ. კორუფციაა, ჩინოვნიკი რომ ბიზნესების წილში ჩაჯდება ან “ქოლცენტრებს“ რომ დააარსებს და ხელშეუხებელი იქნება.
ხელისუფლების ამოცანა არც ადრე ყოფილა და არც ახლა არის კორუფციასთან ბრძოლა და ღარიბაშვილის, ლილუაშვილისა თუ სხვების დაჭერა – ეს არ არის ამოცანა. ამოცანაა ფულის ამოღება, რომელიც ვერ მოახერხეს და ამიტომ დაიწყეს ახლა სამართლებრივი დევნა. რით დასრულდება ისტორია, იმაზეა დამოკიდებული, რაზე მოილაპარაკებენ. მოლაპარაკებების პროცესი უკვე ფინალურ ეტაპზეა, მაგრამ გრძელდება, ჯერ არ დასრულებულა. სამართალი აქ კორუფციასთან ბრძოლისთვის კი არ არის გამოყენებული, გამოყენებულია ისევ ფულის ამოღების იძულებისთვის.
მოლაპარაკებები გრძელდება, რადგან ადამიანი შევიდა, აღიარა მრავალმილიონიანი უკანონო შემოსავლების ლეგალიზება და ის გამოუშვეს გარეთ, გაუშვეს სახლში. ეს ნიშნავს, რომ მოლაპარაკებები გრძელდება. გასაგებია, რომ მთლად სუფთად ვერ გამოიყვანენ, მაგრამ პირობითი სასჯელები არსებობს, საპროცესო შეთანხმება არსებობს, ბევრი ფორმა არსებობს, რის ბაზაზეც შეუძლიათ… ან ყაველაშვილი აქ ჰყავთ, შეაწყალებინებენ რაღაც პერიოდის შემდეგ, თუ მოილაპარაკეს, რა თქმა უნდა.“
