“ღამურების სკანდალი” - სამხრეთ ოსეთში აცხადებენ, რომ საქართველოსა და აშშ-ს შეთქმულება გამოავლინეს
სამხრეთ ოსეთში დისკუსია არ ცხრება უჩვეულო ამბის გარშემო – რესპუბლიკის ხელისუფლებამ საქართველო “ეკოლოგიურ დივერსიაში” დაადანაშაულა. ადგილობრივმა სპეცსამსახურებმა საქართველოს მოქალაქე დააკავეს, რომელმაც კამერის წინ განაცხადა, რომ ცდილობდა ადგილობრივი ღამურების მოპოვებას, რისთვისაც მას დიდ თანხებს დაპირდნენ.
ამ ამბავმა დიდი შთაბეჭდილება მოახდინა სამხრეთ ოსეთის ხელისუფლებასა და მედიაზე, რომლებმაც ღამურებზე უიღბლო მონადირის ამბავი თბილისში არსებულ ამერიკულ ლუგარის ლაბორატორიასა და კორონავირუსის გავრცელებას დაუკავშირეს. საზოგადოებაში მოსაზრებები გაიყო – ზოგი ამ ამბავს სერიოზულად აღიქვამს, ზოგი კი ხელისუფლების ვერსიას ”ბოდვად” მიიჩნევს.
ღამურებზე მონადირე
ხვიჩა მღებრიშვილი 3 ივლისს, სამხრეთ ოსეთის ცხინვალის რაიონის სოფელ აძისარში, სახელმწიფო საზღვრის დარღვევის გამო დააკავეს. სამხრეთ ოსეთის უშიშროების მიერ დაკითხვის დროს, მან თავისი ქმედებები ცხინვალის რეგიონის სოფლებში არცევსა და ღრომში არსებული ღამურების კოლონიისადმი ინტერესით ახსნა.
• პანდემია – შანსი მმართველი პარტიისთვის? საუბარი თორნიკე შარაშენიძესთან და კორნელი კაკაჩიასთან
• მოლდოვაში მიაგნეს ლაბორატორიას, რომელიც „რუსეთისკენ ვირუსებს აგზავნის“
როგორც მღებრიშვილმა თქვა – ადგილობრივ მედიაში მისი დაკითხვის ვიდეო გამოქვეყნდა – ის ამ სოფლებში “ღამურების პარკების” მოპოვებას აპირებდა, რათა საქართველოში გაეყიდა. მას, თითქოს, თითო “პარკში” 5-დან 10 ათას აშშ დოლარამდე დაპირდნენ.
სამხრეთ ოსეთის უშიშროების კომიტეტს არამარტო ეჭვი არ შეუტანია დაკავებულის მონაყოლში, არამედ აღნიშნა, რომ ”2012 წლიდან ინტერესს სამხრეთ ოსეთის ღამურების მიმართ ავლენს ე.წ. ”ლუგარის სახელობის საზოგადოებრივი ჯანმრთელობის ცენტრი”, რომეკლიც თბილისში მდებარეობს”.
ლუგარის ლაბორატორია მანამდე არაერთხელ მოხვდა როგორც სამხრეთ ოსეთის, ისე რუსეთის ხელისუფლებისა და ოფიციალური მედიის ყურადღების ცენტრში, რომლებიც ლაბორატორიას ბიოლოგიურ იარაღის შექმნასა და ბიოლოგიურ დივერსიებში ადანაშაულებდნენ.
სამხრეთ ოსეთის უშიშროების კომიტეტს თავის განცხადებაში მოჰყავს უამრავი დეტალი იმის შესახებ, თუ როგორ არის ლაბორატორიის პერსონალი დაკავებული ღამურების ჭერით საქართველოს შიდა ქართლის რეგიონში.
”2018 წლიდან თავდაცვის საფრთხეების შემცირების სააგენტო (DTRA) მუშაობს ლუგარის ცენტრთან, როგორც საველე ლაბორატორია, ღამურებსა და კორონავირუსებთან დაკავშირებული პროექტის განსახორციელებლად, რომლისთვისაც 2.9 მილიონი აშშ დოლარია გამოყოფილი. პროგრამა 5 წელზეა გათვლილი და არასამთავრობო ორგანიზაცია “Eco Health Alliance”-ს დახმარებით ხორციელდება”, – აცხადებს უწყება.
ამავდროულად, უწყება განმარტავს, რომ ”სამხრეთ ოსეთის რესპუბლიკაში მცხოვრები ღამურის ჯიში – ყურწვეტა მღამიობი, როგორც დანარჩენი ღამურები, ცოცხლად მშობიარეა და არანაირ “პარკებს” არ იკეთებს. აგრეთვე იმას, რომ ეს ცხოველები წითელ წიგნშია შეტანილი და მასზე ნადირობა პატიმრობით ისჯება.
ლუგარის ლაბორატორია, ღამურები და კორონავირუსი
ცხინვალის “კგბ”- ს შემდეგ, განცხადება რესპუბლიკის საგარეო საქმეთა სამინისტრომაც გააკეთა, რომელშიც აღინიშნა, რომ ” საქართველოს სამხედრო ბიოლოგიური თანამშრომლობა შეერთებულ შტატებთან და სხვა ქვეყნებთან” საშიშია.
”ამ ამერიკული სამხედრო ბიოლოგიური ობიექტის გახსნის პირველივე დღიდან აქტიურად გავრცელდა ინფორმაცია აღნიშნულ ცენტრში ქიმიურ და ბიოლოგიურ იარაღზე, ასევე საშიში ვირუსების შტამებზე მიმდინარე მუშაობის შესახებ. ასევე ცნობილია, რომ ღამურები COVID-19 პანდემიის დაწყების სავარაუდო მიზეზია, ”- აცხადებენ სამინისტროში.
სამხრეთ ოსეთის საგარეო საქმეთა სამინისტრო თვლის, რომ დაკავებული მღებრიშვილის ქმედებები “არის არა ჩვეულებრივი პროვოკაცია, არამედ დაგეგმილი სპეცოპერაცია ბიოლოგიური მასალის ამოღების მიზნით.”
“ბიოლოგიური ომი”, “არამეცნიერული ფანტასტიკა”, “ბოდვა”
საზოგადოებაში განსხვავებული მოსაზრებები გამოითქვა ხელისუფლების მიერ გავრცელებული სკანდალური ინფორმაციის შესახებ.
პოლიტოლოგი ალან მამიევი თვლის, რომ ”შეერთებული შტატები მზად არის მსხვერპლად გაწიროს ქართველი ხალხიც კი, რუსეთთან ომის და მისი ეროვნული ინტერესების გამო, ასეთი ლაბორატორიები, უპირველეს ყოვლისა, საფრთხეს წარმოადგენს თვით ქართველებისთვის”.
მაგრამ ხელისუფლების ოფიციალური ვერსიის ყველას არ სჯერა.
”სამხრეთ ოსეთის ტელევიზიამ ამ სახალისო ისტორიიდან არამეცნიერული ფანტასტიკური დრამა შექმნა სასიკვდილო ბიოლოგიური ლაბორატორიით, კორონავირუსებით და მომაკვდინებელი ვამპირი ღამურებით”, – ამბობს ამ სკანდალის შესახებ ვიდეობლოგერი ჩრდილოეთ ოსეთიდან რუსლან ტოტროვი.
მისი აზრით, ეს ბრალდებები არასერიოზულად ჟღერს.
”მესმის, რომ პროპაგანდა უნდა იყოს სახელმწიფო დონეზე. მაგრამ არა ასეთი უხეში, ის უნდა იყოს პროფესიონალური, რომ შეგვეძლოს გარე სამყარო როგორმე დავარწმუნოთ ჩვენი განზრახვების სერიოზულობაში. და არა მხოლოდ საშინელი, სასაცილო ან უბრალოდ უაზრო ისტორიები გავავრცელოთ, ”- ამბობს ტოტროვი.
Facebook– ის მომხმარებლები სამხრეთ ოსეთში ხელისუფლების ვერსიას ძირითადად მხარს უჭერენ.
”სამხრეთ ოსეთის რესპუბლიკიდან ღამურები ლუგარის ლაბორატორიამ დაუკვეთა. ეს გასაგებია, არ უნდა მოვდუნდეთ, მიდის ჰიბრიდული ტერორისტულ-ბიოლოგიური ომი, ვინც ეს არ იცის, უბრალოდ დედამიწაზე არ ცხოვრობს, ”- წერს სოციალური ქსელების ერთ-ერთი მომხმარებელი.
ასევე ისმის სკეპტიკური მოსაზრებები: ”მე არ ვიცი, რა არის “ღამურას პარკი”, იქნებ მღებრიშვილმა თვითონ გვაჩჩვენოს ეს რა არის, რაში აძლევდნენ 5 ათას დოლარს. ეს რაღაც ბოდვას ჰგავს. “
სამოქალაქო აქტივისტი თემურ ცხურბათი მიიჩნევს, რომ სამხრეთ ოსეთის სპეცსამსახურებმა პროფესიონალურად არ იმოქმედეს და რომ დაკავებული “სრულ სისულელეს ლაპარაკობს”.
ამავდროულად, ცხურბათი ცუდს ვერაფერს ხედავს ღამურების მიყიდვაში მათთვის, ვისაც ისინი სჭირდება:
”ღამურებს არანაირი “პარკი” არ აქვთ. თუ თავად ღამურები აინტერესებთ, რატომ არ უნდა მივაწოდოთ, თუ მართლა ამდენს იხდიან? საუკუნეების განმავლობაში, სამხრეთ ოსეთში ღამურები არავის შეუწუხებია. ვფიქრობ, მათ პოპულაციას დიდი არაფერი დააკლდება, ჩვენ კი იმავე ლუგარის ლაბორატორიის შესახებ უფრო მეტს შევიტყობთ. ”
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
