გერმანიამ საქართველო და მოლდოვა უსაფრთხო ქვეყნების სიაში შეიყვანა

გერმანიაში საქართველო უსაფრთხო ქვეყანაა

გერმანიის კოალიციურმა მთავრობამ შინაგან საქმეთა მინისტრის, ნენსი ფეიზერის შემოთავაზებული კანონპროექტი მიიღო, რომლის მიხედვითაც საქართველო და მოლდოვა უსაფრთხო ქვეყნებად დასახელდა.

გასულ წელს გერმანიის მთავრობას თავშესაფრის მოთხოვნით 8 865-მა ქართველმა და 5 218-მა მოლდოველმა მიმართა. გერმანიის შსს-ს ცნობით, ორივე ქვეყნიდან მიღებული აპლიკაციების 99.9% არ დაკმაყოფილდა.

ლტოლვილთა უფლებების დამცველმა ორგანიზაციამ Pro Asyl-მა გერმანიის მთავრობის ნაბიჯი ეს ნაბიჯი გააკრიტიკა და აღნიშნა, რომ ეს გადაწყვეტილება უგულებელყოფს იმ ფაქტს, რომ რუსეთი ორივე ქვეყანაში სეპარატისტულ რეგიონებს იკავებს, რაც საფრთხეს უქმნის საქართველოსა და მოლდოვის უსაფრთხოებას.

Pro Asyl-მა ასევე ხაზი გაუსვა საქართველოში კანონის უზენაესობის პრობლემას LGBT+ საზოგადოების უფლებების დაცვასთან დაკავშირებით და პრესის თავისუფლების პრობლემას მოლდოვაში.

მინისტრის განმარტებით, საქართველოსა და მოლდოვაში მოქალაქეებს, როგორც წესი, პოლიტიკური დევნა არ ემუქრებათ და ქვეყნებისთვის უსაფრთხო სტატუსის მინიჭება გერმანიას საშუალებას მისცემს, არალეგალი მიგრანტები ქვეყნიდან გააძევოს.

გადაწყვეტილებით შესაძლებელი ხდება ქართველი და მოლდოველი თავშესაფრის მაძიებელი მიგრანტების აპლიკაციების უფრო სწრაფად განხილვა, რაც, აპლიკანტის განცხადების დაუკმაყოფილებლობის შემთხვევაში, მის დეპორტაციასაც დააჩქარებს.

Reuters-ის ცნობით, მინისტრი ასევე ამბობს, რომ ორივე ქვეყანა უსაფრთხოა, რადგან იქ არ არსებობს “სახელმწიფო დევნის შიში და სახელმწიფო იცავს თავის მოქალაქეებს”.

გერმანიას უსაფრთხო ქვეყნების სიაში ამჟამად შეყვანილი ჰყავს: განა, სენეგალი, ბოსნია და ჰერცოგოვინა, სერბეთი, ჩრდილოეთ მაკედონია, ალბანეთი, კოსოვო, მონტენეგრო. უსაფრთხო ქვეყნების სიაში შესული სახელმწიფოების მოქალაქეებს გერმანიაში თავშესაფრის მიღების შანსები ძალიან დაბალ დონეზე აქვთ.

აღსანიშნავია, რომ საქართველოს უსაფრთხო ქვეყნად აღიარება გერმანიას ჯერ კიდევ 2018 წელს სურდა, რისკენაც ბერლინს ოფიციალური თბილისიც მოუწოდებდა, მაგრამ მაშინ საქართველო ნუსხაში ვერ მოხვდა.

● მექსიკის გავლით ამერიკაში – სად და რატომ გარბიან ქართველები
● სამსახური პოლონეთში – ახალგაჭრილი გზა ევროპაში საქართველოს მოქალაქეებისთვის
● საქართველოდან ევროკავშირში თავშესაფრის მთხოვნელთა რაოდენობა გაიზარდა

მიმდინარე წლის 18 ივლისს ბელგიამ საქართველო პარტნიორი უსაფრთხო ქვეყნების სიიდან ამოიღო. ბელგიის სამეფოს მხრიდან განმარტებულია, რომ გადაწყვეტილება კომისრის მოსაზრებას ეფუძნება.

პარტნიორი უსაფრთხო ქვეყნების სიაში საქართველო ალბანეთთან, სერბეთთან, კოსოვოსთან, ბოსნია-ჰერცეგოვინასთან, მონტენეგროსთან, ჩრდილოეთ მაკედონიასთან და ინდოეთთან ერთად იყო.

25 ივლისს კი ცნობილი გახდა, რომ ირლანდიის თავშესაფრის მაძიებელთათვის გამოყოფილ საცხოვრებლებში მცხოვრებ მოქალაქეთა შორის პირველ ადგილს ქართველები იკავებენ.

2 ივლისს გამოქვეყნებული სტატისტიკის მიხედვით, თავშესაფრის მაძიებელთათვის გამოყოფილ საცხოვრებლებში 3432 ქართველი ცხოვრობს და ამ რაოდენობით საქართველო წინ უსწრებს ისეთ ქვეყნებს, როგორიცაა ნიგერია, ალჟირი და სირია. 

Dublin Inquirer-ის ინფორმაციით, თავშესაფრის მოთხოვნასთან დაკავშირებით 2022 წელს საქართველოდან განაცხადი 2700 ადამიანზე მეტმა შეიტანა.