გენერალ ჩაჩიბაიას, რომელმაც "აგენტების კანონს" მხარი არ დაუჭირა, მანდატის დატოვება უნდა

გენერალ ჩაჩიბაიას მანდატის დატოვება უნდა

საქართველოს შეიარაღებული ძალების გენერალ-ლეიტენანტს და ამჟამად მმართველი “ქართული ოცნების” წევრს, ვლადიმერ ჩაჩიბაიას, რომელმაც ე.წ. რუსულ კანონს აგენტების შესახებ მხარი არ დაუჭირა, მანდატის დატოვება უნდა.

ტელეკომპანია “ფორმულას” გადაცემა “დროებასთან” ინტერვიუში ჩაჩიბაიამ თქვა, რომ ეს მისი “დაჟინებული თხოვნაა”.

“მე ვფიქრობ, რომ საპარლამენტო ცხოვრებისთვის არ აღმოვჩნდი მზად. იცით, რომ 30 წელი ვიყავი ჯარში. ჩემი პირადი სურვილია, გამოვიდე პარლამენტიდან და ვნახოთ, მაგრამ ამავდროულად მე ვრჩები ჩვენი პარტიის ერთგული წევრი.

ჩემი პირადი სურვილი არის, რომ დავტოვო მანდატი, იმიტომ, რომ მე ვფიქრობ, რომ ალბათ საჯარო სამსახურში ან ნებისმიერ სხვა სამსახურში უფრო მეტად მოვახდენ ჩემი თავის რეალიზებას, ვიდრე საპარლამენტო ცხოვრებაში.

ვფიქრობ, რომ ის გადაწყვეტილება, რომელიც იქნება ჩემი მხრიდან მიღებული, ესეც არ მაძლევს იმის უფლებას და საშუალებას, დავრჩე პარლამენტში, ესეც არის ჩემი გარკვეული შინაგანი გამოძახილი, ხმის არმიცემას ვგულისხმობ”, – ამბობს ჩაჩიბაია.

მისივე განმარტებით, კომუნიკაცია პარტიასთანაც ჰქონდა, თუმცა ეს საკითხი “დამატებით განხილვას საჭიროებს” და საბოლოო გადაწყვეტილება, სავარაუდოდ, მალე მიიღებს.

● პენ ცენტრი იუნესკოს მიმართავს, ელისო ბოლქვაძეს მშვიდობის ელჩის სტატუსი მოუხსნას
● “შეიძლება ევროპა მართლაც არ არის სათქვენო” – დასავლელი პარტნიორები ღარიბაშვილის ინტერვიუს ეხმაურებიან
● საპროტესტო ბანერები – აგენტების წინააღმდეგ მიმდინარე დემონსტრაციებიდან

რუსულ კანონპროექტის კენჭისყრაში მონაწილეობა არ მიიღო ოცნების 4-მა დეპუტატმა: ქეთევან დუმბაძემ, ვლადიმერ ჩაჩიბაიამ, ირაკლი მეძმარიაშვილმა და დავით სერგეენკომ.

მოგვიანებით დუმბაძემ და მეძმარიაშვილმა განმარტეს, რომ ტექნიკური ხარვეზი იყო და კანონპროექტს სინამდვილეში მხარი დაუჭრეს, სერგეენკომ კი განაცხადა, რომ კანონპროექტის დეტალებში არ შესულა, თუმცა “აგენტების კანონს” საზოგადოება, აშშ და ევროკავშირი ნეგატიურად აფასებდნენ და მხარიც ამიტომ არ დაუჭირა.

17 თებერვალს ოცნების სატელიტმა “ხალხის ძალამ” პარლამენტში განსახილველად ორი კანონპროექტი დაარეგისტრირა – „უცხოური გავლენის გამჭვირვალობის შესახებ“ კანონპროექტი და მეორე – „უცხოელი აგენტების რეგისტრაციის შესახებ“. როგორც ამას პროცედურები ითვალისწინებს, ორივე კანონპროექტი ვენეციის კომისიაშია გადაგზავნილი.

ამ ორიდან ერთი – „უცხოური გავლენის გამჭვირვალობის შესახებ“ კანონპროექტი 7 მარტს პარლამენტმა 76 ხმით 13-ის წინააღმდეგ პირველი მოსმენით მიიღო. კანონის ინიციირებას თბილისში, რუსთაველის გამზირზე საპროტესტო აქციები მოჰყვა. კანონპროექტის მიღების შემდეგ კი პროტესტი მრავალათასიან მიტინგებში გადაიზარდა, რომელიც ხელისუფლებამ ძალის გამოყენებით დაშალა. მომიტინგეებს დაუშინეს წყლის ჭავლი და ცრემლსადენი გაზი.

ამ კანონპროექტს როგორც საქართველოში, ისე მის ფარგლებს გარეთ ყველა, მთავრობის გარდა, რუსულ კანონს უწოდებს და ამბობს, რომ მისი მიღება ქვეყნისთვის დიდი ბარიერია ევროკავშირისკენ მიმავალ გზაზე.

საბოლოოდ, უმრავლესობამ უკან დაიხია და „რუსული კანონი“ მეორე მოსმენით ჩააგდო. „ხალხის ძალის“ მიერ ინიციირებული კანონპროექტი კენჭისყრაზე განხილვის გარეშე დააყენეს. მის წინააღმდეგ ხმა 35 დეპუტატმა მისცა, მხარი 1-მა დაუჭირა. რუსული კანონპროექტის ერთ-ერთი ავტორი დიმიტრი ხუნდაძე ამბობს, რომ ამ კანონის არმიღებით საზოგადოებამ “ხელიდან შანსი გაუშვა”.

“ქართულმა ოცნებამ” “უცხოური გავლენის გამჭვირვალობის შესახებ” რუსული კანონპროექტის გაწვევის შესახებ 9 მარტს, დილას განაცხადა.