"გახარიას ქმედება იყო სახელმწიფოს პირდაპირი ღალატი" - ბიძინა ივანიშვილი განცხადებას ავრცელებს

პოლიტიკიდან წასვლის შესახებ გაკეთებული განცხადებიდან ხუთი თვის შემდეგ, საქართველოს ყოფილი პრემიერ-მინისტრი და მმართველი პარტია “ქართული ოცნების” დამფუძნებელი ბიძინა ივანიშვილი, პირველად ჩნდება საჯარო სივრცეში.

უფრო სწორად, აქვეყნებს წერილს, სადაც ქვეყანაში მიმდინარე პოლიტიკურ პროცესებს ეხმაურება. კონკრეტულად კი, ივანიშვილი მისი ყოფილი თანაგუნდელის, გიორგი გახარიას პოლიტიკაში მოსვლას აკრიტიკებს.

“მოღალატე” ასე უწოდებს ივანიშვილი გახარიას, ხოლო მის პარტიას – “ფსევდოს”.

__________________________________

● “ვერთიანდებით საქართველოსთვის” – გიორგი გახარიამ პარტია დააფუძნა

___________________________________

ბიძინა ივანიშვილი ამბობს, რომ თებერვალში გიორგი გახარიას ქმედება იყო საკუთარი გუნდის ღალატი, “და რაც კიდევ უფრო მნიშვნელოვანია, ეს იყო საკუთარი სახელმწიფოს პირდაპირი ღალატი.”

“როდესაც უმაღლესი რანგის თანამდებობის პირი კანონის უზენაესობის წინააღმდეგ გამოდის და ამ საბაბით თანამდებობას ტოვებს, ამაზე დიდი პოლიტიკური დანაშაული ძნელი წარმოსადგენია. მინდა მწუხარებით აღვნიშნო, რომ ამ ყველაფერმა ჩემი მძიმე იმედგაცრუება გამოიწვია”, – წერს ივანიშვილი

მისივე თქმით, გიორგი გახარიასთან პოლიტიკური თანამშრომლობა მისთვის ყოვლად მიუღებელია:

“ფსევდოპარტიის შექმნა თავისთავად არასწორი მოვლენაა, გიორგი გახარიასთან პოლიტიკური თანამშრომლობა ჩემთვის ისედაც ყოვლად მიუღებელი იქნებოდა. მთელი ამ წლების მანძილზე, ქართულ პოლიტიკაში უამრავი პოლიტიკური გადაცდომის მომსწრე გავხდით და მეგონა, რომ ამ თვალსაზრისით, აღარაფერი და ვეღარავინ გამაოცებდა. თუმცა, რაც გიორგი გახარიამ მიმდინარე წლის თებერვალში გააკეთა, ამ ფონზეც კი, გაკვირვებას იწვევს.“

ბიძინა ივანიშვილი ასევე ამბობს, რომ გიორგი გახარია ნიკა მელიას დაკავებასთან დაკავშირებით, ითხოვდა კანონის აღსრულების ორი დღით გადავადებას, რის შესახებაც სახელისუფლებო გუნდმა დღემდე ვერავითარი დამაჯერებელი განმარტება ვერ მოისმინა. ივანიშვილისვე თქმით, გახარიას ეს პოზიცია მით უფრო გაუგებარი იყო იმ ფონზე, როცა რამდენიმე დღით ადრე ის საკუთარი გუნდისგან მელიასთვის იმუნიტეტის მოხსნას დაჟინებით მოითხოვდა.

____________________________

● “რასაცა გასცემ შენია” – რა ქონება გადასცა ბიძინა ივანიშვილმა ფონდ „ქართუს”
● ყოფილი პრემიერი, მოქალაქე, მილიარდერი. ივანიშვილი ამბობს, რომ საბოლოოდ წავიდა პოლიტიკიდან
● რას ფიქრობენ ექსპერტები და პოლიტიკოსები ივანიშვილის პოლიტიკიდან წასვლაზე

__________________________________

“უმაღლესი თანამდებობის პირის ამგვარ მოქმედებას, გაუგებრობის ხარისხით, მსოფლიო პოლიტიკის ისტორიაშიც კი ძნელად შეიძლება მოეძებნოს ანალოგი”, – ამბობს ივანიშვილი.

მისი შეფასებით, ამ ყველაფრის ლოგიკური გაგრძელება იყო გიორგი გახარიას მიერ პოლიტიკური პარტიის დაფუძნება, რომელსაც, არ აქვს იდეოლოგიური და კონცეპტუალური საფუძველი. 

“იგი აშკარად მოაზრებულია, როგორც სიტუაციური ინსტრუმენტი მმართველი გუნდისთვის საარჩევნო ხმების თუნდაც მცირე რაოდენობის წასართმევად”. – წერს ბიძინა ივანიშვილი. 

ივანიშვილი საკუთარ წერილში ნაციონალურ მოძრაობასაც ახსენებს და ხაზს უსვამს იმას, რომ “ქართული ოცნება” ნაციონალური მოძრაობისგან განსხვავებით, მყარად იცავს სახელმწიფო ინტერესებს

“ერთ-ერთი მთავარი შედეგი, რასაც ქართულმა ოცნებამ ჩემთან ერთად და პოლიტიკიდან ჩემი გასვლით მიაღწია, სწორედ საქართველოში პიროვნების კულტისა და მესიანიზმის მანკიერი ტრადიციის დასრულებაა”, – აცხადებს ივანიშვილი.

_________________________________

● მესამე ძალა თუ ივანიშვილის სატელიტი? ვინ როგორ აფასებს გახარიას პოლიტიკაში დარჩენას
● მორიგი პოლიტიკური სკანდალი საქართველოში: ფარული ჩანაწერი ივანიშვილის შვილის და პრემიერის მონაწილეობით

______________________________

ივანიშვილის განცხადებას საკუთარ ფეისბუქზე გამოეხმაურა წერილის ადრესატი გიორგი გახარია.

“მოვლენები იმაზე საინტერესოდ და სწრაფად ვითარდება, ვიდრე მოსალოდნელი იყო…

სიმართლეს ვერავინ და ვერაფერი შეაჩერებს. საბოლოო ჯამში, ამას ყველა გაიგებს.

ისევ ჭორაობის გარეშე, ვერთიანდებით საქართველოსთვის, არავის წინააღმდეგ!” – დაწერა გიორგი გახარიამ.

გამოხმაურება

გახარიას ქმედებას ღალატს უწოდებს მმართველი პარტიის წევრი სოზარ სუბარიც. მისი თქმით,  გახარია და მისი გუნდი ჭორებს ავრცელებს, თითქოს მათი პარტიის შექმნა ბიძინა ივანიშვილის ალტერნატიული გეგმა იყო:

“როგორც ჩანს, თვითონ ბიძინა ივანიშვილმა საჭიროდ ჩათვალა, რომ შეფასება მიეცა ამ სიცრუისთვის და ღალატისთვის, რომელიც მართლა ჩაიდინა გიორგი გახარიამ და ჩაიდინეს, მისმა გუნდის წევრებმაც.”

კულტურის მინისტრი თეა წულუკიანი კი აღნიშნავს, რომ ყოფილ პრემიერს გუნდის მსგავსი პოზიცია ჰქონდა ნიკა მელიას დაპატიმრებასთან დაკავშირებით, თუმცა მოულოდნელად შეიცვალა. მისი თქმით, ეს იყო ღალატი და იმედგაცრუება გუნდისთვის.

“და რა ჰქვია ამ ქმედებებს, თუ არა ღალატი, იმედგაცრუება. სალაპარაკო ენაზე რომ ვთქვა, მეც დამრჩა განცდა, რომ ლიდერმა უბრალოდ აიღო და დაგვყარა, მიგვატოვა მაშინ, როცა კანონი იყო დასაცავი, შესაბამისად, ყველაფერს უნდა დაერქვას სახელი. გუნდის ლიდერი, როცა რთული გადაწყვეტილებაა მისაღები, რაც უნდა ეს ყოფილიყო ერთადერთი და სწორი, ის უნდა იყოს გუნდის გვერდით,” – ამბობს წულუკიანი.

რაც შეეხება ოპოზიციას, “ევროპული საქართველოს” ლიდერი გიგა ბოკერია ამბობს, რომ ივანიშვილს სურს, გახარიას გუნდით ხმები გაუყოს საპროტესტო ელექტორატს.

“ჩვენ არ უნდა განვიხილოთ გახარია, როგორც ივანიშვილის წინააღმდეგ მოთამაშე პოლიტიკური ძალა და უნდა ვიყოთ მობილიზებულები, კონსოლიდირებულები და უნდა მოვემზადოთ თვითმმართველობის და ვადამდელი არჩევნებისთვის ოპოზიციური ძალები ერთმანეთთან კონსულტაციით, ტაქტიკასა და სტრატეგიაზე შეთანხმებით და ამომრჩეველთან ჩვენი გზავნილის მიტანით”, – განაცხადა ბოკერიამ.

_______________________________________________________________________

● მესამე ძალა თუ ივანიშვილის სატელიტი? ვინ როგორ აფასებს გახარიას პოლიტიკაში დარჩენას

_________________________________________________________________________

გიორგი გახარიამ პრემიერ-მინისტრის თანამდებობა 18 თებერვალს დატოვა.

როგორც გახარიამ მაშინ განმარტა, მისი გადადგომის ერთ-ერთი მთავარი მიზეზი ნიკა მელიას მიმართ გამოტანილი სასამართლოს გადაწყვეტილებაა. მისი თქმით, მას გაუმართლებლად მიაჩნია ნიკა მელიას დაპატიმრება იმ პირობებში, როდესაც არსებობს პოლიტიკური ესკალაციის საფრთხე.

გახარიას თქმითვე, გადადგომის მიზეზია ისიც, რომ აღნიშნულთან დაკავშირებით გუნდთან შეთანხმებას ვერ მიაღწია.

14 აპრილს მმართველი პარტია “ქართული ოცნება” კიდევ ექვსმა დეპუტატმა დატოვა. მათ ექსპრემიერ გიორგი გახარიასთან ერთად ახალი პარტიის შექმნაა დააანონსეს. მათივე თქმით, დეპუტატები გიორგი გახარიას გუნდის წევრები არიან და გადაწყვეტილება მასთან ერთად მიიღეს.

ოცნება დატოვეს მეათე მოწვევის პარლამენტის დეპუტატებმა: გიორგი ხოჯევანიშვილმა, მიხეილ დაუშვილმა, ბექა ლილუაშვილმა, ანა ბუჩუკურმა, ალექსანდრე მოწერელიამ და შალვა კერესელიძემ. 

მაშინ პარლამენტის თავმჯდომარემ, არჩილ თალაკვაძემ განაცხადა, რომ დიდი ალბათობით, გიორგი გახარიას გუნდი ვადამდელი არჩევნების მოთხოვნას შეუერთდება, რადგან “ისინი პრაქტიკულად გადავიდნენ ოპოზიციაში.”